Na Kalou a tuvanaki ira na kawa ni peteriaki o Eparama me dua na matanitu qai vakarautaka na lawa mera muria. E vakatoka na matanitu me o “Isireli,” e lesi ira tale ga mera taqomaka na sokalou dina kei na nona vosa. (Same 147:19, 20) E rawa nira vakalougatataki kina na tamata mai na veimatanitu ena vukudra na Isireli.​—Wilika Vakatekivu 22:18.

A digitaki ira na Isireli na Kalou mera nona ivakadinadina. Na kedra ivolatukutuku makawa e vakaraitaka na sala e yaga kina na noda muria na tamata na lawa ni Kalou. (Vakarua 4:6) Ena vukudra gona na Isireli, e rawa kina vei ira eso tale mera kila na Kalou dina.​—Wilika Aisea 43:10, 12.

A sega ni vakadonui ira na Isireli na Kalou ni toso na gauna, qai sosomitaka o Jiova na matanitu oya ena ivavakoso vaKarisito. (Maciu 21:43; 23:37, 38) Nikua, era sa sosomitaki Isireli na lotu vaKarisito dina mera ivakadinadina i Jiova.​—Wilika Cakacaka 15:14, 17.

A tuvanaki ira na nona imuri o Jisu mera vunau, mera veivakatisaipelitaki tale ga ena veimatanitu. (Maciu 10:7, 11; 24:14; 28:19, 20) Sa voleka sara ni cava na cakacaka qori ena ivakataotioti ni veika vakavuravura qo. E se qai vakadua ena itukutuku ni kawatamata me veivakaduavatataki o Jiova ena sokalou dina vei ira e vica vata na milioni mai na veimatanitu. (Vakatakila 7:9, 10) Era tuvanaki na lotu vaKarisito dina mera dau veivakauqeti, mera dau veivukei tale ga. E tautauvata na ka era vulica ena iVolatabu ena nodra soqoni e veiyasa i vuravura.​—Wilika Iperiu 10:24, 25.

A tekivu ena veiyabaki ni 1870 na isoqosoqo ni iVakadinadina i Jiova ena gauna qo. Era vulica tale na ka dina ena iVolatabu sa yali tu vakadede e dua na ilawalawa lailai ni gonevuli ni iVolatabu. Era kila ni tuvanaka o Jisu mera vunau na lewe ni ivavakoso vaKarisito, era mani vunautaka sara e veiyasa i vuravura na Matanitu ni Kalou. Era qai vakatokayacataki ena 1931 mera iVakadinadina i Jiova.​—Wilika Cakacaka 1:8; 2:1, 4; 5:42.

Ena imatai ni senitiuri, a tiko e dua na ilawalawa dauvakatulewa era lewena na tagane matua vakayalo mera liutaka na cakacaka ni ivavakoso kece vaKarisito ena duidui vanua. O ira na tagane qori era kila ni Ulu ni ivavakoso o Jisu. (Cakacaka 16:4, 5) Nikua, e liutaka tale ga na nodra cakacaka na iVakadinadina i Jiova e vuravura raraba na iLawalawa Dauvakatulewa era lewena na tagane matua vakayalo. E qarava tiko na ilawalawa qori na valenivolavola ni tabana ni iVakadinadina i Jiova e caka kina na vakadewa kei na tabaivola, qai vakauta na ivola e vulici kina na iVolatabu ena sivia na 600 na vosa. E rawa gona ni vakayagataka na ivola vakaivolatabu qori na iLawalawa Dauvakatulewa me veivakayaloqaqataki qai veidusimaki kina ena sivia e 100,000 na ivavakoso e vuravura raraba. Ena ivavakoso kece era na veiqaravi tiko kina na tagane era rawata na kena ivakatagedegede mera qase ni ivavakoso se ra dau veivakatawani. O ira na tagane qo era qarava vakayalololoma na qelenisipi ni Kalou.​—Wilika 1 Pita 5:2, 3.

Era tuvanaki na iVakadinadina i Jiova mera vunautaka na itukutuku vinaka, mera veivakatisaipelitaki tale ga. Me vakataki ira ga na yapositolo, era dau vunau tale ga na iVakadinadina i Jiova e veivale. (Cakacaka 20:20) Era dau veisureti mera vulica na iVolatabu o ira era via kila sara ga na ka dina. Ia era sega wale ga ni lewe ni dua na isoqosoqo na iVakadinadina i Jiova, era lewe sara ga ni dua na vuvale e tiko na Tamadra dauloloma ra qai dau veikauaitaki vakamataveitacini. (2 Cesalonaika 1:3) Nira tuvanaki na tamata i Jiova mera vakamarautaka na Kalou ra qai vukei ira tale na so, era lewena kina na vuvale mamarau duadua e vuravura.​—Wilika Same 33:12; Cakacaka 20:35.