ERA kerea na mataveitacini ena 1933 me kaburaka e dua na siteseni ni retio e Jakarta, na katokatoni vakavalagi ni nona ivunau o Brother Rutherford. E dau wilika mai na retio eso tale na ivunau ena vosa vakaNecaladi e dua na turaga e taleitaka na ka dina. E vakavu kauai sara vakalevu na ka e kaburaki ena retio, era solia rawa kina na mataveitacini e levu na ivola ena cakacaka vakavunau.

E vakacudrui ira sara ga na italatala ni Katolika na ivunau warumisa i Brother Rutherford a kaburaki ena retio, na kena iulutaga “Effect of Holy Year on Peace and Prosperity (Na Yabaki Tabu ni Veisaututaki kei na Tiko Nuidei).” * A solia na katokatoni ni ivunau qori o Brother De Schumaker. Era vakayagataki ira eso na lewenilotu na italatala mera beitaki Brother De Schumaker ena “vakaucaca, veivakasewasewani, kei na vakatubuca.” Dua na ka nona sasaga o Brother De Schumaker me sabaya na veibeitaki. Ia e totogitaki me sauma e 25 na guilder, * kei na isau ni veilewai. E tabaki na veilewai qori ena tolu na niusiveva kilai levu, era rogoca kina na itukutuku vinaka e levu.

A biubiu mai Ositerelia na waqa ni isoqosoqo na Lightbearer, e 16 na mita na kena balavu me soko i Jakarta. Oti e ono na vula sa qai kele yani ena 15 Julai, 1935. Eratou vodo tiko ena waqa qori e vitu na tacida tagane, eratou painia gugumatua. Eratou vinakata me ratou lai vunautaka na itukutuku vinaka e Idonisia, Sigapoa, kei Malesia.

 E veiveisau na vanua e kele kina na Lightbearer ena rua na yabaki vakacaca era soko voli kina na painia e Idonisia, ra qai veisoliyaki e levu sara na ivola vakaivolatabu. Ni yaco yani na waqa ena dua na ikelekele ni waqa, e kaya o Jean Deschamp “nira dau vakatagitaka na kaimua ena misini ni katokatoni na ivunau i J. F. Rutherford, a peresitedi tiko ni isoqosoqo ena gauna ya. Era kurabui na lewenikoro ena vanua tu yawa qo nira raica e dua na yota levu ra qai rogoca ni voqa vinaka tiko mai kina e dua na domo. Dua na ka nodra qoroqoro.”

Era katakata na italatala nira vunau tiko ga ena doudou na mataveitacini. Era mani vakacuruvosa vei ira na vakailesilesi me kua ni kele na Lightbearer ena levu na ikelekele ni waqa e Idonisia. Ni biuti Idonisia na Lightbearer ena Tiseba 1937 me soko lesu i Ositerelia, sa laurai toka na mawe ni nodratou gugumatua na tacida.