E MARAMA yalovinaka qai veikauaitaki o tinaqu, e doka tale ga na iVolatabu. A vulica na iVolatabu kei Gertrud Ott, na daukaulotu e Manado, North Sulawesi, qai ciqoma na ka dina. Na tamaqu o Erwin e vakaitutu levu ena baqe, e jeameni tale ga ni tabana ni voli sea e Jakarta. E sega sara ga ni taleitaka na lotu vou i tinaqu.

Sa qai solia vei Nana na digidigi ena dua na siga.

E taroga ena cudru: “Na cava o vinakata, nomu lotu se o watimu?”

E vakasama vinaka sara o Nana. Sa qai tukuna vakamalua, “Au vinakata ruarua, na watiqu, meu qaravi Jiova tale ga.”

E sega sara ga ni vosa rawa o tamaqu, mai malumu yani nona cudru.

Toso na gauna, sa malumu nona veitusaqati ni lomani Nana vakalevu qai qoroya na nona ivakasala yaga.

 E vinakata o tinaqu me tomani koya ena sokalou dina o tamaqu, mani masulaka qori e veisiga. E vakasamataka sara ni dau via vulica eso tale na vosa o Tata. Sa qai vakabira ena so na vanua e lomanivale na tikinivolatabu e volai vakavalagi, e kaya vei Tata ni cakava ya me kila vinaka kina na vosa vakavalagi. Ni kila ni dau taleitaka o Tata na vosa e matanalevu, e kerea sara o Nana me rau vakatovotovotaka vata na nona itavi ena Koronivuli ni Vuli Vunau. E vakadonuya o Tata. Ni raica ni turaga dauveikauaitaki, e kerea o Nana me rau vakaicilitaka na ivakatawa ni tabacakacaka. E vakadonuya tale o Tata. Ni kila ni bibi vei tamaqu na nona vuvale, e kerea o Nana me keitou lai dabe vakaveitamani ena soqo ni veiwasewase, keitou mani gole vata.

E vakamalumu wakanikau na vosovoso i tinaqu kei na nona qaseqasetaka na ka e cakava. E tekivu gole ina soqoni o Tata ni keitou tiko voli mai Igiladi, rau lai veitokani sara kei John Barr a qai lewe ni iLawalawa Dauvakatulewa ni iVakadinadina i Jiova. Dua na ka na marau nei tinaqu ena gauna e papitaiso kina o tamaqu. Sa qai lomani Nana ga vakalevu ena veiyabaki e muri.

Era kaya eso na neitou itokani ni o Nana e vakataki Litia, na marama lotu vaKarisito ena imatai ni senitiuri e dau veikauaitaki. (Caka. 16:14, 15) Ia ena noqu rai, o Nana e vakataki Sera ena nona dau vakamalumalumu mai vu ni lomana vua na watina o Eparama. (1 Pita 3:4-6) E tarai ira kece na kilai tinaqu na nona itovo rakorako, veidokai, kei na nona matua vakayalo. Na nona ivakaraitaki e uqeti tamaqu tale ga me gole mai ena dina. Io, e ucui Sera vinaka sara ga.