Era sega ni soro na tacida nira vakarerei, era sosoqoni vata tiko ga. Era vakatulewa vakayalomatua tale ga na qase mera taqomaki kina na dautukutuku. E nanuma lesu o Brother André Carbonneau na loya mai Kenada a valataka nodra kisi ni veilewai na tacida: “E dau yadra tu e dua na tacida ena vanua ni soqoni, qai soli vua e dua na mobail. Ke raica nira gole yani e dua na ilala dauvakacaca, ena qiriti ratou sara na qase.”

Gauna kece era tusaqati kina na mataveitacini, erau dau veisiko e rua mai na valenivolavola ni tabana me rau lai veivakayaloqaqataki. E kaya o André: “Dua dina na ka totoka nodrau raica na tacida mai na valenivolavola nira mamarau qai matadredredre tu ga na mataveitacini ena vanua ni soqoni.”

Era sega tale ga ni soro na mataveitacini era sega ni tusaqati, wili kina o ira na vuli iVolatabu. E nanuma lesu o André nodrau veitalanoa kei na dua na yalewa sa rawata na ivakatagedegede me dautukutuku bera ni papitaiso. A tukuna vei André na yalewa qori: “Na veibuturaki au  sarava ena tivi e vakaraitaka vei au o cei e lotu vaKarisito dina, au vinakata meu dua na lotu vaKarisito dina.”

Era sotava na ituvaki dredre na mataveitacini, ia era gugumatua tu ga ena cakacaka vakavunau. Era ivakaraitaki vinaka ni vakabauta kei na yaloqaqa. Na itovo e rua qori e laurai tale ga vei ira era dau valataka nodra kisi ni veilewai na tacida.

Era beitaki vakailasu ena tabana ni itukutuku na  mataveitacini nira vakavuna na kavoro ni vuvale, era sega ni vinakata na veiqaravi vakavuniwai, era dau saqata tale ga na matanitu. Era bole eso na loya mera valataka nodra kisi ni veilewai na tacida, ke mani vakaleqai mada ga kina na kedra irogorogo se na nodra cakacaka.

E kaya o John Burns na loya ni valenivolavola ni tabana mai Kenada a vukei ira na mataveitacini e Georgia: “Era bole mera veivuke na mataveitacini era loya. Era sega ni kauaitaka ke ra vakacegui mai na nodra cakacaka, era sega tale ga ni rere na vakaraitaka ena  mataveilewai nira iVakadinadina i Jiova.” O ira na tacida yaloqaqa qori era veivuke ena “kena taqomaki na itukutuku vinaka qai tauyavutaki vakalawa.”—Fpai. 1:7.

E vakayacori tiko ga vei ira na mataveitacini na ivalavala kaukaua. Qori na vuna era veisoliyaka kina na tacida ena ika8 ni Janueri, 2001, e dua na ivola ni kerekere mera taqomaki mai vei ira na ilala dauvakacaca, mera veilewaitaki tale ga na dau veibuturaki vakaveitalia.

E kaya o Brother Burns me baleta na inaki ni ivola ya: “Keimami vinakata me kilai ni dua ga na ilawalawa lailai e vakavuleqa tiko, e levu na lewenivanua e Georgia era sega ni taleitaka na ivalavala kaukaua e vakayacori tiko vei keimami na iVakadinadina i Jiova.”

 Ena loma ga ni rua na macawa, era sainitaka na nodra ivola ni kerekere na tacida e le 133,375 mai na veiyasa i Georgia, levu vei ira qori era lotu Orthodox. A lai soli na ivola vua na peresitedi o Shevardnadze, ia e sega ni oti na ivalavala kaukaua. Era taketetaki ira toka ga na mataveitacini na meca.

E vakalougatataki ira tiko ga na nona tamata o Jiova ena gauna dredre qori. Na kaukaua ga ni nodra veivakacacani na meca, na levu tale ga ni lewenivanua e vakayarayarataki ira tani mai na lotu lasu o Jiova.

Dua e dau solibula ena cakacaka ni lotu Orthodox e Georgia o Babilina Kharatishvili. Ni se yabaki 30 vakacaca, e dau gole ina veitauni kei na veikorokoro me veivakavulici ena veika vakalotu.

Ia e via kila vinaka na Kalou o Babilina, e mani lai vuli ena koronivuli ni lotu Orthodox e Georgia. Dua na gauna e vakaraitaka vei ira na vakarorogo e dua na italatala na ivola Na ka Mo Kila Mo Bula Tawamudu Kina, qai tukuna mera kerea e dua na nodra ilavelave vei ira na iVakadinadina i Jiova. E kaya na italatala: “O na kila ena ivola qo e levu na ka me baleta na iVolatabu.”

E sega ni dau taleitaki ira na iVakadinadina o Babilina, e kurabui kina ni tukuna na italatala mera kerea nodra ivola! E kaya lo o Babilina, ‘Ke ra na vakavulici au ena veika me baleta na Kalou na iVakadinadina i Jiova, na cava tale au se cakava tiko eke?’ E vaqarai ira na iVakadinadina ena korolevu o Poti, qai vulica na iVolatabu.

A uqeti Babilina na veika e vulica ena iVolatabu me  veisautaka nona bula. E kaya ena dua na gauna: “Au biuta vakadua na qaravi matakau ena gauna au raica sara ga kina e mataqu ena iVolatabu ni cala na sokaloutaki ni ivakatakarakara. Au sega ni veivutunitaka na ka au cakava qori.” Sa yabaki 70 toka vakacaca o Babilina ena gauna e vakatulewataka kina me dua na iVakadinadina i Jiova.

E ka ni rarawa ni se bera toka ni papitaiso o Babilina sa tauvimate qai mate ena 2001. A qai papitaiso ga e dua na makubuna o Izabela, se qaravi Jiova tiko ga ena yalodina ena gauna qo.

A vinakata o Eliso Dzidzishvili me sisita ni lotu ena gauna e yabaki 28 kina. E sega ni dua na itikotiko ni lotu e Tkibuli na tauni e tiko kina, mani toki i Tbilisi ena 2001. A lai vakavulici ira toka e kea eso na gone ni se waraka tiko na macala ni nona veiqaravi ena itikotiko ni  lotu. Dua vei ira na nona gonevuli e iVakadinadina na tinana o Nunu.

E kaya o Eliso: “Keirau dau veitalanoa vakalevu ena iVolatabu. Au sega ni via rogoca e dua na ka e vakalasui kina na lotu Orthodox, ia na ivakamacala kece i Nunu e yavutaki sara ga mai na iVolatabu. Keirau veitalanoataka ena dua na siga na ivola Na Cava e Loma ni Kalou vei Keda? Au vakadeitaka ena parakaravu kei na veitikinivolatabu keirau wilika ni cata na Kalou me sokaloutaki na ivakatakarakara.”

Dua na siga a lai vakatataro tu o Eliso vua na bete. E taura rawa mai na nona isaunitaro na bete ni sega ni yavutaki ena iVolatabu na ivakavuvuli ni lotu. (Mari. 7:7, 8) E vakadeitaka e keri ni sa kunea na ka dina, e mani vulica na iVolatabu qai papitaiso me iVakadinadina i Jiova.

A laurai ena 2001 ni vinakati me tara eso na vale ni soqoni ni tubu tiko ga na iwiliwili ni ivavakoso, e vinakati e rauta ni 70 na Vale ni Soqoni. E yaco tu e Georgia na veitusaqati, ia e sega ni tarova qori na sasaga ni kena tara na Vale ni Soqoni.—Esera 3:3.

Era vakavinakataka e liu na timi ni tarataravaki e dua na vale era dau vakayagataka tu e vica na ivavakoso e Tbilisi. Oti qori a tara e rua tale na Vale ni Soqoni, dua e Tbilisi kei na dua tale e Chiatura ena ra kei Georgia.

E nanuma lesu o Brother Tamazi Khutsishvili, a veivuke ena tarataravaki e Chiatura: “Keimami le tinikalima na tara vale e veisiga. E vaka ga na kama ni veigasau na totolo ni nodra kila na lewenivanua ni keimami tara tiko e dua na vale ni soqoni vou. Keimami dau rogoca tale ga ena so na gauna nira via mai vakacaca ena Vale ni Soqoni na dauveitusaqati.”

Vakacava ena vakaoti vinaka na tara ni Vale ni Soqoni?  E kaya o Tamazi: “E toso ga na cakacaka qai vakaoti na Vale ni Soqoni ena loma ni tolu na vula. Era veivakarerei wale tu ga na dauveitusaqati, sega ni bau laurai yani na matadra.” *

Ni tekivu tara ena Okotova, 2003, na Vale ni Soqoni ena korolevu o Samtredia, era baci vakarerei ira na mataveitacini na meca. A se qai vakaduri ga na lalaga, se bera tale ga ni mamaca na palasita era sa mai talaraka tale na vale na dauveitusaqati.

Ia era marautaka na mataveitacini e Georgia na veisau a yaco ena Noveba 2003. Ni veisau ena yabaki qori na matanitu e veiliutaki, sa soli vakalevu vei ira na tacida  na galala ni sokalou. Era vesu tale ga e levu na lewe ni lotu Orthodox era dau vakavu ca tiko vei ira na mataveitacini.

Gauna e oti kina na veitusaqati, era vakila na tamata i Jiova e Georgia e levu na veivakalougatataki. A sevutaki ena soqo ni tikina ena 2004 na Vakadewa ni Vuravura Vou ena iVolatabu vaKirisi ena vosa vakaGeorgia.

Dua tale na ka guiguilecavi dredre a yaco ena soqo ni tikina ena 2006 e kena usutu “Voleka Noda Vakabulai!” E sega ni tukuni rawa na levu ni nodra marau na tiko  ena soqo nira rogoca ni na vunau o Geoffrey Jackson, e lewe ni iLawalawa Dauvakatulewa. Dua na ka nodra kurabui ni kacivaka o Brother Jackson na sevutaki ni Vakadewa ni Vuravura Vou, na iVolatabu taucoko ena vosa vakaGeorgia!

Era tagi e levu era tiko ena soqo ena levu ni nodra marau. E kaya e dua na tacida yalewa: “Au sega ni vakamacalataka rawa na levu ni noqu marau ni sa qai dua na vakadewa ni iVolatabu taucoko. . . . Dua dina na soqo vakairogorogo.” Era marautaka na kana magiti vakayalo e sivia na 17,000, na veika tale ga e yaco ena soqo qori e dua na cavuikalawa levu ena kedra ivolatukutuku na tamata i Jiova e Georgia.