WASE 1
“Au na Vaqarai Koya e Yali”
E kana voli na sipi ena vanua veico mani yawaki ira na kena vo. Sa sega ni raica na qelenisipi se na ivakatawa. E veilecayaki. Sa totolo mai na buto. Sa tu ena vanua e tiko kina na manumanu kila, e sega ni dua me taqomaki koya. E qai rogoca na domo e kila, na domo ni ivakatawa ni cici yani, e taura cake, e ologa ena ilobi ni nona isulu qai kauta i vale.
O JIOVA e dau vakatauvatani koya me vaka sara ga na ivakatawa qori. E vakadeitaka vei keda ena nona Vosa: “Au na vaqarai ira ga na noqu sipi, au na karoni ira.”—Isikeli 34:11, 12.
“Na Sipi Au Karona”
O cei o ira na sipi i Jiova? Kena itukutukuni rawarawa ga, o ira na lomani koya ra qai sokalou vua. E kaya na iVolatabu: “Meda sokalou qai cuva, meda tekiduru e mata i Jiova na Dauveibuli. Ni noda Kalou o koya, eda tamata tale ga ni nona veico, na sipi e dau karona o koya.” (Same 95:6, 7) Me vaka na sipi e muria na kena ivakatawa, o ira tale ga na sokaloutaki Jiova era yalorawarawa ni muria na nodra iVakatawa. Vakacava era uasivi? Sega. Ena so na gauna era vaka na sipi “veiseyaki” era “yali” ra qai “lako sese.” (Isikeli 34:12; Maciu 15:24; 1 Pita 2:25) Ia ke biubiu mada ga e dua, ena vakanuinui tiko o Jiova ni na lesu mai.
Vakacava o nanuma ni se nomu iVakatawa tiko ga o Jiova? E vakadinadinataka vakacava o koya ni se iVakatawa tiko ga ena gauna qo? Raica mada e tolu na ivakadinadina:
E vakani keda vakayalo. E kaya o Jiova: “Au na vakani ira ena veico vinaka. . . . Era na davo mai kea ena vanua veico vinaka, era na kana ena veico bulabula.” (Isikeli 34:14) E dau vakani keda o Jiova ena veimataqali kakana bulabula vakayalo ena kena gauna donu. O nanuma e dua na ulutaga, vunau, se vidio e saumi kina nomu masu? Vakacava o lomavakacegu ni kauaitaki iko o Jiova?
E taqomaki keda qai tokoni keda. E yalataka o Jiova: “Au na vakalesui koya mai e lako sese, au na vadretitaki koya e mavoa, au na vakaukauataki koya e malumalumu.” (Isikeli 34:16) O Jiova e vakaukauataki ira na malumalumu se nuiqawaqawa. E vadretitaki ira na nona sipi ni vinakata me mavo na nodra mavoa e rairai vakavuna na tacidra. E vakalesui ira mai era lako sese kei ira na yalolailai.
E nona itavi. E kaya o Jiova: “Au na vakabulai ira mai na vanua kece era veiseyaki kina. . . . Au na vaqarai koya e yali.” (Isikeli 34:12, 16) Ena rai i Jiova, e sega ni yali vakadua na sipi e lako sese. Ni kila ni yali e dua na sipi, e vaqara, e marau vakalevu ni sa kunea. (Maciu 18:12-14) E kacivi ira tale ga na sokaloutaki koya ena yalodina mera “noqu sipi, na sipi au karona.” (Isikeli 34:31) O dua gona vei ira na sipi qori.
Ena rai i Jiova, e sega ni yali vakadua na sipi e lako sese. E marau vakalevu ni sa kunea
“Vakavoutaka na Neimami Siga me Vaka e Liu”
Na cava e vaqarai iko kina o Jiova qai uqeti iko mo lesu vua? Ni vinakata mo marau. E yalataka ni na “tau mai na veivakalougatataki me vaka na uca” vei ira nona sipi. (Isikeli 34:26) Ena yaco dina na vosa ni yalayala qori. O sa vakadinadinataka oti.
Vakasamataka mada na ka o vakila ni o mai kilai Jiova. Kena ivakaraitaki, vakacava na imatai ni gauna o vulica kina na ka dina talei me baleta na yaca ni Kalou kei na nona inaki me baleti keda? Vakacava, o vakauqeti ni o duavata kei ira na tacimu lotu vaKarisito ena soqo lelevu? Ni o wasea rawa na itukutuku vinaka vua e dua e tataleitaki, vakacava o lomavakacegu ni o lesu i vale?
O rawa ni vakila tale na marau qori. E masuta e dua na dauveiqaravi ni Kalou ena gauna makawa: “Moni vakalesui keimami vei kemuni, Jiova, keimami na makutu ni lesu yani vei kemuni. Moni vakavoutaka na neimami siga me vaka e liu.” (Lele i Jeremaia 5:21) E rogoca o Jiova na masu qori, era mani lesu na nona tamata mera qaravi koya tale ena marau. (Niemaia 8:17) Ena cakava tale ga qori vei iko.
Ia e ka ni sasaga toka mo lesu vei Jiova. Raica mada eso na ka ena vakadredretaka nomu lesu kei na sala mo vorata kina.
