E vica na iVakadinadina i Jiova o bau kila? De dua eso oni tiko veitikivi, oni cakacaka vata se vuli vata. Rairai keimami a veitalanoataka kei kemuni na iVolatabu ena dua na gauna. O cei sara mada o keimami? Na cava keimami dau vakamacalataka kina na ka keimami vakabauta?

Keimami tauvanua ga. E duidui na neimami isususu kei na ituvaki ni neimami bula. Eso vei keimami a lewena tu e dua tale na lotu, eso tale ga a sega ni vakabauta tu na Kalou. Ni bera ni keimami dua na iVakadinadina i Jiova, keimami a dikeva vakavinaka na ivakavuvuli ena iVolatabu. (Cakacaka 17:11) Keimami vakadinata na ka keimami vulica, qai neimami vakatulewa sara ga me keimami qarava na Kalou o Jiova.

Keimami vakila na yaga ni vuli iVolatabu. Keimami dau sotava tale ga na leqa e veisiga qai tu na neimami dui malumalumu. Na neimami saga me keimami muria e veisiga na ivakavuvuli ni iVolatabu, keimami raica ni vinaka sara kina neimami ivakarau ni bula. (Same 128:1, 2) Qori e dua na vuna keimami wasea kina vei ira tale eso na veika vinaka keimami vulica ena iVolatabu.

Keimami muria na itovo vakalou. Na itovo kece vakalou e vulici ena iVolatabu, e vukea e dua me vinaka qai uqeta na veidokai, e salavata tale ga kei na itovo me vaka na daudina kei na yalovinaka. Na itovo kece qori ena vukea e dua me lewenivanua vinaka, qai uqeta na duavata ni vuvale kei na itovo savasava. Keimami vakabauta ni “sega ni dau veivakaduiduitaki na Kalou,” keimami umani kina ena dua na mataveitacini vakayalo ena vuravura raraba, e sega kina na veivakaduiduitaki vakamatatamata se vakapolitiki. Keimami tauvanua ga, ia keimami duatani.​—Cakacaka 4:13; 10:34, 35.

• Era tautauvata vakacava na iVakadinadina i Jiova kei ira na lewenivanua?

• Na itovo cava soti era vulica ena iVolatabu na iVakadinadina i Jiova?