LESONI 41
Cava na Rai ni iVolatabu me Baleta na Veiyacovi?
E sega ni dau rawarawa vei ira e levu mera veitalanoataka na veiyacovi. Ia na iVolatabu e tukuna vakamatau qai vakadodonu na ka me baleta na veiyacovi, e yaga qai vakaibalebale vei keda. Ni Dauveibuli o Jiova, e kila na ka ena vinaka vei keda. E tukuna na ka meda cakava meda vakamarautaki koya, kei na sala meda marau kina me tawamudu.
1. Na cava na rai i Jiova me baleta na veiyacovi?
E isolisoli i Jiova na veiyacovi. E vinakata me marautaka qori na tagane kei na yalewa erau vakawati. E rawa kina ni rau vakaluveni, me rau vakaraitaka tale ga nodrau veidomoni kei na nodrau veitaleitaki. Ya na vuna e kaya kina na Vosa ni Kalou: “Mo marautaka mada ga na yalewa o vakawatitaka mai na gauna o se cauravou kina.” (Vosa Vakaibalebale 5:18, 19) E namaka o Jiova mera yalodina na lotu vaKarisito vei ira na kedra isa, mera kua ni veibutakoci.—Wilika Iperiu 13:4.
2. Na cava na veiyacovi tawadodonu?
E tukuna na iVolatabu ni o ira na “dauveiyacovi tawadodonu . . . era na sega ni rawata na Matanitu ni Kalou.” (1 Korinica 6:9, 10) O ira na vola na iVolatabu vaKirisi era vakayagataka na vosa na por·neiʹa me dusia na veiyacovi tawadodonu. Na vosa qori e okati kina (1) nodrau veiyacovi a e rua erau sega ni vakamau (2) na veiyacovi vakamataqali vata, kei na (3) veiyacovi kei na manumanu. Nida ‘vakatabui keda mai na veiyacovi tawadodonu,’ ena marau o Jiova, ena yaga tale ga vei keda.—1 Cesalonaika 4:3.
VAKEKELI
Dikeva na sala mo qarauna kina na veiyacovi tawadodonu, kei na kena yaga ni savasava nomu itovo.
3. Dro tani mai na veiyacovi tawadodonu
A sega ni rawarawa vua na cauravou yalodina o Josefa me savasava tiko ga nona itovo. Wilika Vakatekivu 39:1-12, qai veivosakitaka na taro qo:
-
Na cava e uqeti Josefa me dro?—Raica na tikina e 9.
-
O nanuma ni vakatulewa vinaka o Josefa? Na vuna?
Era na vakatotomuri Josefa vakacava na itabagone nikua mera dro tani mai na veiyacovi tawadodonu? Sarava na VIDIO.
E vinakata o Jiova meda cata na ivalavala vakasisila kece. Wilika 1 Korinica 6:18, qai veivosakitaka na taro qo:
-
Na cava e rawa ni vakavuna me veiyacovi tawadodonu e dua?
-
O na dro tani vakacava mai na veiyacovi tawadodonu?
4. O rawa ni vorata na veitemaki
Na cava ena vakadredretaka mo vorata na veitemaki ni veiyacovi tawadodonu? Sarava na VIDIO, qai veivosakitaka na taro tarava.
-
Na cava e cakava na tacida tagane ena vidio ni liaca ni ka e vakasamataka, kei na ka e cakava e rawa ni tawayalodina kina vei watina?
E sega ni rawarawa vei ira na lotu vaKarisito yalodina me savasava tiko ga nodra vakasama. O na vorata vakacava na vakasama dukadukali? Wilika Filipai 4:8, qai veivosakitaka na taro qo:
-
Na cava meda dau vakasamataka?
-
Eda na vorata vakacava na veitemaki nida wili iVolatabu qai ogaoga ena itavi vakalou?
5. E yaga na ivakatagedegede i Jiova
E kila o Jiova na ka ena vinaka vei keda. E tukuna na sala me savasava tiko ga kina noda itovo, kei na kena yaga nida muria. Wilika Vosa Vakaibalebale 7:7-27 se sarava na VIDIO, qai veivosakitaka na taro tarava.
-
E lai temaki tu vakacava na cauravou qo?—Raica na Vosa Vakaibalebale 7:8, 9.
-
E tukuni ena Vosa Vakaibalebale 7:23, 26, ni veiyacovi tawadodonu e rawa ni kauta mai e levu na leqa. Ke savasava tiko ga noda itovo, na leqa cava eda na sega ni sotava?
-
Ena yaga vakacava na savasava ni noda itovo meda marau me tawamudu?
Eso era nanuma ni sa rui kaukaua tale na ka e tukuna na iVolatabu me baleta na veiwatini vakamataqali vata. Ia o Jiova na Kalou dauloloma, e vinakata meda marautaka kece na bula me tawamudu. Me rawati qori, ena vinakati meda muria nona ivakatagedegede. Wilika 1 Korinica 6:9-11, qai veivosakitaka na taro qo:
-
Mai na rai ni Kalou, e cala duadua ga na veiwatini vakamataqali vata?
Me rawa nida vakamarautaka na Kalou, ena vinakati meda cakava na veiveisau. Vakacava e yaga qori? Wilika Same 19:8, 11, qai veivosakitaka na taro qo:
-
O nanuma ni yaga na ivakatagedegede savasava i Jiova? Na vuna?
O Jiova sa vukei ira e levu mera muria nona ivakatagedegede savasava, ena vukei iko tale ga
KA ERA KAYA ESO: “Ke rau sa veivinakati ga e rua, e sega ni ca me rau veiyacovi.”
-
Cava o na kaya?
KA O VULICA
Na veiyacovi e nona isolisoli o Jiova vei rau na veiwatini me rau marautaka.
Railesuvi
-
Na cava na veiyacovi tawadodonu?
-
Na cava ena vukei keda meda vorata na veiyacovi tawadodonu?
-
Ena yaga vakacava nida muria na ivakatagedegede savasava i Jiova me baleta na itovo?
IKURI
Dikeva na vuna e bibi kina vua na Kalou na vakamau.
Dikeva ni iVolatabu e sega ni uqeta nodra cati na vakawati vakamataqali vata.
“E Cala na Veimoceri Vakatagane se Vakayalewa?” (Ulutaga ena jw.org)
Vulica na sala e taqomaki keda kina na lawa ni Kalou mai na ivalavala kece ni veiyacovi.
“E Okati me Veiyacovi na Vakayagataki ni Gusu ena Yago Tabu?” (Ulutaga ena jw.org)
Ena ulutaga “Era Dokai Au,” dikeva nona veisautaka nona bula e dua na vakasalewalewa me rawa ni vakamarautaka na Kalou.
“E Veisautaka na Bula na iVolatabu” (Na Vale ni Vakatawa, 1 Epereli, 2011)
a Qori e okati kina na vakayagataki ni gusu, sala ni valelailai, kei na yago tabu me vakacegui kina na gagadre ni veiyacovi.
Rawa ni o Wilika Tale ga
TARO E TAROGI WASOMA
Era Veivakavulici Vakacava na iVakadinadina i Jiova ena iVolatabu?
E sega ni saumi nodra veivakavulici na iVakadinadina i Jiova ena iVolatabu. O rawa ni vakayagataka ga na ivakadewa ni iVolatabu o vinakata. Rawa tale ga ni o sureti ratou nomu vuvale, se itokani me ratou veitomani ena vuli.
