Levu na gauna era biuti Jiova na lewe i Juta mera qarava na kalou lasu. E saga tiko ga o Jiova me vukei ira ena vica vata na yabaki. E tala e levu na parofita me vakasalataki ira, ia era sega ni muria. Era vakalialiai ira ga na parofita qori. E qai vakaotia vakacava o Jiova na nodra qaravi matakau?

E vakadruka o Nepukanesa na tui Papiloni e vica vata na vanua. Na imatai ni gauna e vakadrukai Jerusalemi kina, e vesuki Tui Jioakini, ira na turaga, na sotia, kei ira na matai. E kauti ira i Papiloni kei na iyaya kece ni valenisoro i Jiova. Oti e buli Setekaia me Tui Juta.

E dau talairawarawa o Setekaia vei Nepukanesa. Ia era uqeti koya na matanitu voleka kei ira na parofita lasu me talaidredre vei Papiloni. E vakasalataki koya o Jeremaia: ‘Ke o talaidredre, ena yaco na veivakamatei, na dausiga kei na matedewa e Juta.’

Oti e walu na yabaki nona veiliutaki o Setekaia, e vakatulewataka me talaidredre vei Papiloni. E kerea na mataivalu ni Ijipita me vukei koya. E mani tala o Nepukanesa nona mataivalu me valuti Jerusalemi, era keba wavokita na koro. E kaya o Jeremaia vei Setekaia: ‘E kaya o Jiova ke o soro vei Papiloni, o na bula, ena bula tale ga na koro. Ke sega, era na vakamai Jerusalemi na kai Papiloni, era na kauti iko tale ga vakavesu.’ E kaya o Setekaia: ‘Au na sega ni soro!’

Oti e dua veimama na yabaki, era basuka na bai kei  Jerusalemi na mataivalu ni Papiloni. Era vakama na koro, na valenisoro, vakamatea e levu ra qai kauta vakavesu e vica vata na udolu.

E dro mai Jerusalemi o Setekaia, era qai cicimuri koya na kai Papiloni. Era vesuki koya volekati Jeriko, era kauti koya sara vei Nepukanesa. E vinakata o Tui Papiloni me raica o Setekaia ni ratou vakamatei na luvena tagane. E qai vakamatabokotaki koya, e biuti koya tale ga e valeniveivesu. E mani mate e kea ni toso na gauna. Ia e yalataka o Jiova vei ira na Juta: ‘Oti e 70 na yabaki, au na qai kauti kemuni i Jerusalemi.’

Na cava ena yacovi ira na itabagone era kau vakavesu i Papiloni? Era na yalodina tiko ga vei Jiova?