E dau valuti ira na Isireli o Penietati na tui Siria. Ia e dro bula na tui Isireli ni dau vakasalataki koya o Ilaisa na parofita. E mani saga o Penietati me vesuki Ilaisa. E rogoca ni tiko na parofita ena koro o Tocani, e tala sara na mataivalu ni Siria me lai vesuki koya mai.

Era yaco i Tocani na kai Siria ni sa bogi. Ena mataka, ni curu i tuba na dauveiqaravi nei Ilaisa, e raica sara ni sa wavokita tu na koro e dua na mataivalu levu. Dua na ka nona domobula, e kailavaka: ‘Ilaisa, cava me daru cakava?’ E kaya vua o Ilaisa: ‘E levu era tokoni kedaru, lailai e tokoni ira.’ E qai dolava o Jiova na matana na dauveiqaravi me raica ni sa robota tu na veiulunivanua na ose kei na qiqinivalu bukawaqa.

Nira via vesuki Ilaisa na sotia ni Siria, e masuta: ‘Kemuni Jiova, yalovinaka moni vakamatabokotaki ira.’ Era rai vinaka tu na sotia, ia vakasauri ga era sa sega ni kila na vanua era tu  kina. E kaya vei ira o Ilaisa: ‘E cala na koro oni mai tu kina qo. Ni muri au mai, au na kauti kemuni vua na turaga oni vaqara tiko.’ Era muri Ilaisa sara me yaco i Samaria, na vanua e tiko kina o Tui Isireli.

Nira kila na kai Siria nira sa tu e Samaria, era sega ni cakava rawa e dua na ka. E tarogi Ilaisa o Tui Isireli: ‘Meu vakamatei ira?’ Vakacava ena sauma o Ilaisa na ka era via cakava na kai Siria? Sega. E kaya: ‘Kua ni vakamatei ira. Vakani ira qai tukuna mera lako.’ E mani vakarautaka vei ira na tui e dua na kakana levu, oti e qai tukuna mera lesu ina nodra vanua.