O KILA se cava na veivakaduiduitaki?— Na ibalebale ni veivakaduiduitaki oya na nomu sega ni taleitaka e dua baleta ni duidui na kena irairai se ni vosataka e duatani na vosa. O koya gona o veivakaduiduitaki ke o cata e dua ni se bera mada ga ni o kilai koya vinaka.

Cava o nanuma? E dodonu beka mo cata e dua ni bera mada ga nomu kilai koya vinaka se baleta ga ni duatani o koya?— Sega, e ca na veivakaduiduitaki, e sega tale ga ni ivakaraitaki ni yalololoma. Meda kua ni vakaraitaka nida sega ni yalololoma vua e dua baleta ni duatani vei keda.

Vakasamataka mada. O bau kila e dua e sega ni tautauvata na roka ni yagomudrau se duatani na nona vosa?— De o kilai ira e so e duatani na ibulibuli ni yagodra baleta nira mavoa se tauvimate. O dau vakaraitaka nomu yalololoma ni o lomani ira era duatani vei iko?—

Ke da vakarorogo vua na Qasenivuli Levu, o Jisu Karisito, eda na lomani ira kece na tamata. Veitalia se ra cavutu mai na vanua cava se vakacava na roka ni kulidra. Meda vakaraitaka ga vei ira na noda yalololoma. Oqo na ivakavuvuli i Jisu, dina ga nira sega ni vakabauta na tamata kece. Daru veitalanoataka mada.

A lako mai vei Jisu e dua na Jiu e dau veivakaduiduitaki qai taroga, ‘Na cava meu kitaka meu rawata kina na bula tawamudu?’ Sa kila tu o Jisu ni vinakata na turaga oya me tukuna o Jisu ni dodonu  meda yalololoma ga vei ira eda kaivata. E sega ni sauma na nona taro o Jisu, e tarogi koya ga: ‘Na cava e kaya na Lawa ni Kalou meda cakava?’

E sauma na turaga oya: ‘Mo lomani Jiova na nomu Kalou ena lomamu taucoko, mo lomani ira tale ga na kai nomu me vaka nomu lomani iko.’ Mani kaya o Jisu: ‘E dodonu na nomu isaunitaro. Cakava tiko ga na veika oqori mo rawata kina na bula tawamudu.’

Ia na turaga oya e sega ni via vakaraitaka na nona yalololoma vei ira era duatani vua. E mani vaqara ulubale. E tarogi Jisu: “O cei e kai noqu?” De a vinakata me tukuna o Jisu: “Era kai nomu na nomu itokani” se, “O ira e tautauvata na kemu irairai.” Me sauma na taro oqori, e talanoataki rau e dua na Jiu kei na dua na kai Samaria o Jisu. Oqo na italanoa.

E dua na tamata e lako sobu tiko mai na koro o Jerusalemi me gole i Jeriko. E Jiu o koya. Ni taubale tiko, era qai vesuki koya na daubutako. Era vakabalei koya ra qai taura na nona ilavo kei na nona isulu. Era mokulaki koya ra qai biuti koya cibaciba tu e bati ni gaunisala.

 Sega ni dede sa basika mai e gaunisala e dua na bete. E raica na tamata sa mavoa levu tu oya. Na cava beka o na cakava?— E vakatikitiki na bete ina yasa ni gaunisala kadua. E sega mada ga ni tu vakadua. E sega ni vukea na tamata oya.

E lako sobu tale ga mai ena gaunisala oya e dua na tamata dau lotu. Oqo e dua na Livai e veiqaravi tiko ena valenisoro mai Jerusalemi. Ena tu beka me veivukei?— Sega. E muria ga na ka e cakava na bete.

E muri sara mai e dua na kai Samaria. O raici koya rawa ni lako tiko mai e gaunisala?— E raici koya na Jiu ni sa mavoa levu tu. Meda nanuma tiko nira dau veicati na kai Samaria kei ira na Jiu.  (Joni 4:9) E kena ibalebale beka oqo ni na sega ni vukei koya na tamata oya na kai Samaria? Ena kaya beka: ‘Na cava meu vukea kina na Jiu oqo? Ena vukei au beka keu mavoa’?

Ni raici koya na tamata e davo koto e bati ni gaunisala na kai Samaria, e lomani koya sara ga. Ena sega ni rawa me biuti koya tu me mate. E sobu mai na nona manumanu, lako vua na tamata oya, qai qarava nona mavoa. E sova kina na waiwai kei na waini. Ena mavo totolo kina na mavoa. Sa qai vadretitaka ena isulu.

E laveti koya vakamalua qai vakavodoki koya na kai Samaria ina nona manumanu. Rau sirova sobu vakamalua na sala oya me yacova ni rau yaco yani ina dua na bure ni vulagi, se otela lailai. E sauma na kai Samaria na rumu me tiko kina na tamata oya, qai qaravi koya tale ga.

Sa qai taroga na turaga e vosa tiko vua o Jisu: ‘O cei vei iratou na tolu oqo e kai nona?’ Na cava o nanuma o iko? Na bete, na Livai, se na kai Samaria?—

E sauma na turaga oya: ‘E kai nona na tamata e sobu qai qarava na tamata e mavoa.’ E kaya o Jisu: ‘O dina. Lako, lai kitaka vaka kina.’​—Luke 10:25-37.

 E sega beka ni italanoa totoka oya? E vakamatatataka se o cei dina e kai noda. E sega ni o ira ga na noda itokani voleka. E sega ni o ira ga e tautauvata na roka ni yagoda se era vosataka na noda vosa. E vakavulici keda o Jisu meda lomani ira na tamata kece ga veitalia se era cavutu mai vei, se vakacava na kedra irairai, se mani duatani na nodra vosa.

E vaka sara ga oya na rai ni Kalou o Jiova. E sega ni veivakaduiduitaki. ‘Ni vakacabea na nona matanisiga na Tamada vakalomalagi vei ira na tamata ca kei ira na tamata vinaka,’ e kaya o Jisu. ‘E vakatauca tale ga na uca vei ira na tamata vinaka kei ira na tamata ca.’ E dodonu gona meda ucuya na Kalou ena noda yalololoma vei ira na tamata kece ga.​—Maciu 5:44-48.

O koya gona, ke o raica e dua e mavoa, na cava mo cakava?​— Vakacava ke cavutu mai na duatani na vanua qai duatani na roka ni yagona? E se kai nomu tiko ga, e dodonu mo vukei koya. Ke o sega ni vukei koya rawa baleta ni o gone, kerea e dua e qase cake me vukei koya. Se o rawa ni kerea e dua na ovisa se qasenivuli. Oya sara ga na yalololoma, me vaka e vakaraitaka na kai Samaria.

E vinakata na Qasenivuli Levu meda yalololoma. E vinakata meda vukei ira na tani, veitalia se ra kai vei. Oya sara ga na vuna e talanoataka kina na kai Samaria yalololoma.