KAYA mada ni dua e solia vei iko e dua na iloloma totoka. Ena vakacava na nomu ciqoma?— O na vakavinavinakataka beka ga o qai guilecavi koya sara e solia vei iko na iloloma? Se o na nanumi koya kei na ka e vakayacora vei iko?—

Na Kalou o Jiova e solia vei keda e dua na iloloma totoka. E tala mai na Luvena me mai mate ena vukuda. O kila na vuna e mai mate kina o Jisu ena vukuda?— Oqo e dua na ka bibi e dodonu meda kila vinaka.

Daru vulica ena Wase 23, ni valavala ca o Atama ena gauna e beca kina na lawa ni Kalou. E dewavi keda na ivalavala ca baleta ni tamada kece o Atama. Na cava gona e vinakati?— E vinakati me dua na tamada vou, me dua e uasivi nona bula ena gauna e bula voli kina e vuravura. O cei o vakasamataka e rawa ni tamada?— O Jisu.

O Jiova e talai Jisu mai i vuravura me mai vaka e tamada me sosomitaki Atama. E kaya na iVolatabu: “Sa yaco na i matai ni Atama me tamata bula, ia sa yaco na i otioti ni Atama me dau soli bula.” O cei na imatai ni Atama?— O koya a bulia na Kalou mai na kuvu ni soso. O cei na ikarua ni Atama?— O Jisu. E vakadeitaka oqo na iVolatabu ni kaya: “Sa buli na i matai ni Atama mai na kuvu ni soso, ia na i karua ni Atama [o Jisu] sa lako mai lomalagi.”​—1 Korinica 15:45, 47, VV; Vakatekivu 2:7.

Ni tokia na Kalou na bula i Jisu mai lomalagi qai biuta ina kete i Meri, e sega ni takavi Jisu kina na ivalavala ca i Atama. Oqo na vuna e tamata uasivi kina o Jisu. (Luke 1:30-35) Oya tale ga na vuna e kaya kina na agilosi vei iratou na ivakatawa ni sipi ena siga e sucu  kina o Jisu: ‘Sa sucu vei kemuni edaidai, na iVakabula.’ (Luke 2:11, VV) Ia me rawa ni qai noda iVakabula, na cava e vinakati taumada vei Jisu?— E vinakati me tubu cake me uabula, me vakataki Atama. Me qai rawa kina ‘me ikarua ni Atama.’

Ena yaco tale ga na noda iVakabula, o Jisu, me “Tama ni gauna tawa mudu.” Oya na yaca e vakatokai kina ena iVolatabu. (Aisea 9:6, 7) Io, sa yaco na tamata uasivi o Jisu me tamada me sosomitaki Atama e valavala ca. Sa na rawa kina meda digitaka ‘na ikarua ni Atama’ me tamada. Ia, o Jisu tale ga e tiko na tamana, e Luve ni Kalou o Jiova.

Nida kilai Jisu vinaka, sa na qai rawa me noda iVakabula o koya. O se nanuma tiko se eda na vakabulai mai na cava?— Io, mai na ivalavala ca kei na mate e vakataka vei keda o Atama. Na bula uasivi e cabora o Jisu ena vukuda e vakatokai me ivoli. E vakarautaka o Jiova na ivoli oqori me rawa ni bokoci kina na noda ivalavala ca.​—Maciu 20:28; Roma 5:8; 6:23.

Eda na sega ni vinakata meda guilecava na ka erau cakava vei keda na Kalou kei Luvena, se vakaevei?— A vakaraitaka o Jisu vei ira na nona imuri e dua na sala uasivi e rawa meda nanuma tiko kina na ka e cakava. Daru veitalanoataka mada.

Kaya mada ni o tiko ena tabavale e cake ni dua na vale tabarua e Jerusalemi. Sa bogi na vanua. Era dabe toka  ena teveli o Jisu kei iratou na nona yapositolo. E toka e dela ni teveli e so na tiki ni lami e vavi, so na madrai rabaraba, kei na waini damudamu. Era vakayagataka tiko e dua na ivakayakavi duatani. O kila na vuna?—

Na ivakayakavi oqo e dau nanumi kina na ka e cakava o Jiova ena vica na drau na yabaki sa oti vei ira na nona tamata, na Isireli, nira bobula tu e Ijipita. A tukuna vei ira na nona tamata o Jiova: ‘Ni vakamatea e dua na lami na veivuvale kece, ni qai boroya na kena dra ena duru ni nomuni katuba.’ E kuria: ‘Ni curu ena loma ni nomuni vale, ni qai kania na lami.’

 Era cakava vaka kina na Isireli. Ena bogi ga oya, e lako voli kina ena vanua o Ijipita na agilosi ni Kalou. E vakamatei ira na ulumatua na agilosi ena levu na vuvale. Ia ni raica na agilosi ni boroi tu e dua na duru ni katuba, e lako sivita na vale oya. Era sega ni vakamatei na gone ni vale oya. E rerevaka dina na tui Ijipita, o Fero, na ka e cakava na agilosi oya. Mani tukuna vei ira na Isireli o Fero: ‘O ni sa sereki. Ni lako tani mai Ijipita!’ Era vakavodoka na nodra iyaya ina nodra kameli kei na asa, ra biubiu sara.

A sega ni vinakata o Jiova mera guilecava na nona tamata na nona sereki ira. E tukuna kina: ‘Vakadua ena dua na yabaki mo ni kania kina na kakana oni kania ena bogi nikua.’ E vakatokai na ivakayakavi duatani oya me kanavata ni Lakosivia. O kila na vuna?— Baleta ena bogi oya e ‘lako sivita’ kina na agilosi ni Kalou na veivale e vakatakilakilataki ena dra.​—Lako Yani 12:1-13, 24-27, 31.

Oqo na ka eratou vakasamataka tiko o Jisu kei na nona yapositolo ni ratou vakayagataka tiko na kanavata ni Lakosivia. Ni oti oya sa qai cakava o Jisu e dua na ka bibi. Ni bera oya sa vakatalai i tuba na yapositolo tawayalodina, o Jutasa. E taura o Jisu e dua na ibuli madrai e vo tu, e masulaka, dovia, qai veisoliyaka vei iratou na nona tisaipeli. E kaya, “Dou taura, ka kania.” E tukuna vei iratou: ‘Oqo e vakatakarakarataka na yagoqu au na solia niu mate ena vukumudou.’

E taura tale ga o Jisu na bilo ni waini damudamu. Ni masulaka oti e solia tale ga vei iratou qai kaya: “Dou gunu kece kina.” E tukuna vei iratou: ‘Na waini oqo e vakatakarakarataka na noqu dra. Sa voleka meu livia na noqu dra me bokoci kina na nomudou ivalavala ca. Dou kitaka tiko oqo mo dou vakananumi au kina.’​—Maciu 26:26-28, VV; 1 Korinica 11:23-26.

O raica rawa ni tukuna vei iratou na nona tisaipeli me ratou  cakava tiko ga na ka oya me ratou nanumi koya tiko kina?— Eratou sa na sega ni vakayagataka ena veiyabaki na kanavata ni Lakosivia. Sa na sosomitaka oqori e dua na ivakayakavi me ratou dau nanumi Jisu kina kei na nona mate. E vakatokai me iVakayakavi ni Turaga. Nikua eda dau vakatoka tale ga me iVakananumi. Baleta?— Nida vakananuma kina na ka erau cakava ena vukuda o Jisu kei Tamana, na Kalou o Jiova.

Na madrai e dodonu meda nanuma kina na yago i Jisu. E lomasoli ni solia na yagona me rawa kina nida bula tawamudu. Ia vakacava na waini damudamu?— Eda nanuma kina na yaga ni dra i Jisu. E uasivi sara na kena yaga mai na dra ni lami ni Lakosivia e vakamatei mai Ijipita. O kila na vuna?— E vakaraitaka na iVolatabu ni bokoca na ivalavala ca na dra nei Jisu. Ni sa bokoci kece na noda ivalavala ca, eda sa na sega ni tauvimate tale, se qase, se mate. Meda vakasamataka tiko oya nida dau tiko ena soqo ni iVakananumi.

E dodonu beka meda vakayagataka kece na madrai kei na waini ena gauna ni iVakananumi?— A tukuna o Jisu vei ira era na vakayagataka: ‘Dou na vakaitavi ena noqu matanitu, dou na dabe vata kei au ena idabedabe ni tui mai lomalagi.’ (Luke 22:19, 20, 30) E kena ibalebale oqo nira na lako i lomalagi mera lai tui vata kei Jisu. O koya gona e sega ni dodonu meda vakayagataka kece na madrai kei na waini, o ira ga e nodra inuinui mera tui vata kei Jisu mai lomalagi.

Ia e dodonu mera tiko tale ga ena iVakananumi o ira na sega ni vakayagataka na madrai kei na waini. O kila na vuna?— Baleta ni mate tale ga ena vukuda o Jisu. Eda vakaraitaka nida sega ni guilecava na ka oya nida lako ena iVakananumi. Eda lai nanuma kina na isolisoli totoka ni Kalou.