ENA sega li ni totoka kevaka eda caka vinaka kece?— Ia e sega ni dua e rawa ni cakava tu ga na ka vinaka. O kila na vuna eda caka ca kina, dina ga nida gadreva meda cakava na ka e vinaka?— E baleta nida sucukaya mai na ivalavala ca. Ia e so era dau caka ca sara ga vakalevu. Era cati ira na tani ra qai nakita mera vakamavoataki ira. O nanuma ni rawa vei ira mera veisau ra qai vulica na veika e vinaka?—

Raica mada na turaga e tucake tu oqori e maroroya tiko na nodra isulu na vakaviriki Sitiveni tiko. E yacana vakaiperiu o Saula, ia e yacana vakaroma o Paula. E marautaka o koya na nona vakamatei o Sitiveni, na tisaipeli ni Qasenivuli Levu. Daru raica mada se cava e cakava kina o Saula na veika ca oya.

O Saula a lewe ni dua na ilawalawa ni lotu Vakajiu era vakatokai mera Farisi. E tu vei ira na Farisi na Vosa ni Kalou, ia era vakabibitaka ga na nodra ivakavuvuli e so na nodra iliuliu ni lotu. Oqo na vuna e dau caka ca kina o Saula.

Ni vesu o Sitiveni mai Jerusalemi, a tu e kea o Saula. E lewai o Sitiveni ina mataveilewai e bau so tiko na kena turaganilewa era Farisi. Dina ga ni sega ni vinaka na ka e dau tukuni me baleti Sitiveni, ia e sega ni rere o koya. E vakamacalataka ga ena doudou vei ira na turaganilewa na veika e baleta na Kalou o Jiova kei Jisu.

Ia era sega ni taleitaka na turaganilewa na veika era rogoca. Sa levu na ka era kila tu me baleti Jisu. E se sega mada ga ni dede na nodra vakavuna me vakamatei o Jisu! Ia e kauti Jisu lesu i lomalagi  o Jiova. Era sega ni veisautaka na turaganilewa na nodra ivalavala baleta nira sa saqati ira tale ga na tisaipeli i Jisu.

Era tauri Sitiveni na turaganilewa ra qai kauti koya ina taudaku ni koro. Era vakabalei koya ra qai vakaviriki koya ena vatu. O rawa ni raica ena iyaloyalo oqo ni a saravi ira tiko o Saula. E nanuma o koya ni dodonu vinaka na nona vakamatei o Sitiveni.

O kila se cava e vaka kina oya na nanuma i Saula?— Ni Farisi o koya, e vakabauta ni dodonu vinaka na nodra ivakavuvuli na Farisi. E raici ira na vo ni Farisi mera nona ivakaraitaki, e mani vakatotomuri ira sara.​—Cakacaka 7:54-60.

Na cava e cakava o Saula ni sa mate o Sitiveni?— E saga me vakawabokotaki ira na vo ni tisaipeli i Jisu! E curuma na nodra vale qai kauti ira mai tuba na tagane kei na yalewa. E biuti ira i valeniveivesu. Era mani biuti Jerusalemi e levu na tisaipeli, ia e sega ga ni tarova na nodra vunautaki Jisu.​—Cakacaka 8:1-4.

Sa qai cati ira ga vakaukaua na tisaipeli i Jisu o Saula. E lako vei  Kaiafa na Bete Levu me vakadonui koya me lai vesuki ira na lotu Vakarisito ena koro o Tamasiko. E vinakata o Saula me kauti ira lesu mai i Jerusalemi mera mai totogitaki. Ia e yaco e dua na ka veivakurabuitaki ena nona lako tiko i Tamasiko.

E cilavi koya na rarama mai lomalagi qai rogoca e dua na domo ni kaya: “I Saula, I Saula! Na cava ko vakacacani au tiko kina?” E vosa tiko mai lomalagi o Jisu! Ena kaukaua ni rarama oya e boko sara ga kina na mata i Saula, e qai tuberi ga i Tamasiko.

Ni oti e tolu na siga e vosa o Jisu ena raivotu vua e dua na nona tisaipeli e Tamasiko o Ananaiasa. E tukuna vei Ananaiasa o Jisu me lai sikovi Saula, tabaki koya me rai rawa, me qai vosa tale ga vua. Ni vosa vua o Ananaiasa, e vakabauta sara o Saula na veika dina e baleti Jisu. E rai rawa tale. E veisautaka sara ga na ivakarau ni nona bula, qai yaco me dua na dauveiqaravi yalodina ni Kalou.​—Cakacaka 9:1-22, VV.

O sa qai kila na vuna e dau caka ca kina o Saula?— E baleta ni cala na ka e vakavulici kina. E muri ira na tamata era sega ni yalodina vua na Kalou. A lewe tale ga ni ilawalawa era dau vakaliuca na vakasama ni tamata me bibi cake mai na Vosa ni Kalou. Ia na cava e veisautaka kina o Saula na ivakarau ni nona bula me caka vinaka nira se saqata tiko ga na Kalou na Farisi?— E baleta ni sega ni cata na ka dina o Saula. Oya na vuna e talairawarawa kina ina ka dina ni vakaraitaki vua.

O kila se a qai kilai me cava o Saula?— Io, e qai kilai me yapositolo o Paula, na yapositolo i Jisu. Qai nanuma tale ga ni o Paula e levu duadua na ivola ena iVolatabu e vola.

E levu tale ga era rawa ni veisau me vakataki Saula. Ia e sega ni ka rawarawa oya baleta ni dua e saga sara tiko vakaukaua mera caka ca na tamata. O kila se o cei oya?— E cavuti koya o Jisu ena gauna e rairai kina vei Saula ena gaunisala i Tamasiko. E kaya vei Saula o  Jisu ena gauna oya ni vosa mai lomalagi: ‘Au sa talai iko mo lai dolava na matadra na tamata, mera saumaki mai na butobuto ina rarama, mai na kaukaua i Setani ki vua na Kalou.’​—Cakacaka 26:17, 18.

Io, e sagai keda kece tiko o Setani na Tevoro meda caka ca. Bau so na gauna o vakila ni dredre mo cakava na ka e dodonu?— Eda vaka kece oqori. E vakadredretaka tiko o Setani meda caka vinaka. Ia e tiko tale e dua na vuna e dau dredre kina meda caka vinaka. O kila na vuna oya?— E baleta nida sucu kaya mai na ivalavala ca.

Na ivalavala ca oqo e dau vakavuna me rawarawa kina vei keda meda caka ca qai dredre meda caka vinaka. Na cava gona e vinakati meda cakava?— Meda saga vakaukaua meda caka vinaka. Nida cakava oya, ena vukei keda o Jisu baleta ni lomani keda.

Ni tiko e vuravura o Jisu, e lomani ira na tamata era dau caka ca ia era sa veisau. E kila ni dredre dina nodra veisautaki ira. E kena ivakaraitaki e so na yalewa era dau veiyacovi kei ira e levu na tagane. E sega ni dodonu na ka era cakava oya. Na iVolatabu e vakatokai ira na yalewa oqori mera dautagane.

 Dua na gauna e rogoca na irogorogo kei Jisu e dua na yalewa vaka oya, qai lako sara ina vale ni Farisi a tiko kina o Jisu. E lumuta na yava i Jisu ena waiwai qai qua na wainimatana mai na yava i Jisu ena drauniuluna. E veivutunitaka dina na nona ivalavala ca, e mani vosoti koya o Jisu. Ia e nanuma na Farisi oya ni sega ni dodonu me vosoti.​—Luke 7:36-50.

O kila na ka e tukuna vei ira e so na Farisi o Jisu ena dua na gauna?— A tukuna vei ira: ‘Era na curu e liu vei kemudou ina Matanitu ni Kalou o ira na dautagane.’ (Maciu 21:31) E tukuna na vosa oqori o Jisu baleta nira vakabauti koya na dautagane, era veisautaka tale ga na nodra ivalavala. Ia era cakava tiko ga na veika ca na Farisi vei ira na tisaipeli i Jisu.

O koya gona, ke vakaraitaka na iVolatabu ni ca na ka eda cakava tiko, e dodonu meda veisautaki keda. Nida kila na veika e vinakata o Jiova meda cakava, e dodonu meda cakava ena marau na veika oya. Ena qai marautaki keda o Jiova, ena solia tale ga vei keda na bula tawamudu.