SO NA gauna e dau dredre meda kila se meda talairawarawa vei cei. Rau tukuna beka o tinamu kei tamamu mo kitaka e dua na ka. De tukuna vei iko o qasenivuli se ovisa mo cakava na kena veibasai. Ke yaco oya, e dodonu mo talairawarawa vei cei?—

Ena Wase 7 ni ivola oqo, daru a wilika kina na Efeso 6:1-3, VV. A tukuni kina mera talairawarawa na gone vei ira na nodra itubutubu. E kaya na iVolatabu: “Ni talairawarawa vei ira na nomuni i tubutubu e na ka sa vinaka vua na Turaga.” O kila na ibalebale ni nodra talairawarawa na gone vei ira na nodra itubutubu ‘ena ka sa vinaka vua na Turaga’?— E kena ibalebale mera talairawarawa vei ira na nodra itubutubu ni rau vakavulici ira mera talairawarawa ina lawa ni Kalou.

Ia e so na uabula era sega ni vakabauti Jiova. Vakacava ke dua vei ira e kaya ni sega ni cala mera butako isaunitaro ena gauna ni veitarogi na gonevuli se mera butakoca e dua na ka mai na sitoa? E dodonu li me butako o gone?—

Nanuma ni a vakarota o Tui Nepukanesa mera cuva sobu kece na tamata vua na matakau koula e vakaduria. Ia eratou sega ni cuva o Setareki, Mesaki, kei Apetiniko. O kila na vuna?— Baleta ni kaya na iVolatabu ni dodonu ga mera sokalou vei Jiova na tamata.​—Lako Yani 20:3; Maciu 4:10.

Ni sa mate o Jisu, eratou kau na nona yapositolo ina Sanadrini, na nodra mataveilewai na lotu vakajiu. A kaya na Bete Levu o Kaiafa: “Keitou a sega beka ni vakarota matua vei kemudou, mo dou kakua  ni vakatavuvuli e na yaca oqo [i Jisu], oi? ka raica, dou sa vakasinaiti Jerusalemi e na nomudoui vakavuvuli.” Na cava eratou sega ni talairawarawa kina ina ivakaro ni Sanadrini na yapositolo?— Ni vosa ena vukudratou na yapositolo o Pita, e kaya vei Kaiafa: “Sa kilikili kei keitou me keitou talairawarawa vua na Kalou, me kakua ga vei ira na tamata.”​—Cakacaka 5:27-29.

Era kaukaua sara tiko ena gauna oya na iliuliu ni lotu vakajiu. Ia, a liutaka tiko na nodra vanua na matanitu o Roma. E iliuliu ni matanitu o Sisa. Dina nira sega ni vinakata na Jiu me liutaki ira o Sisa, ia a vakarautaka na matanitu o Roma e levu na veika vinaka me baleti ira na lewenivanua. E levu tale ga na ka era vakarautaka na veimatanitu ena gauna oqo vei ira na lewenivanua. Na cava e so vei ira na ka oya?—

Na matanitu e dau taya na gaunisala qai saumi ira na ovisa kei na daubokobuka mera taqomaki keda. E vakarautaka tale beka ga na koronivuli mera vuli kina na gone, kei na vale mera qaravi kina na malumalumu. E vinakati na ilavo me saumi kina na veika oqori. O kila se kauta mai e vei na nona ilavo na matanitu?— Era solia  na lewenivanua. Na ilavo era solia na lewenivanua e vakatokai me ivakacavacava.

Ni bula tiko e vuravura na Qasenivuli Levu, e levu na Jiu era sega ni via saumi ivakacavacava ina matanitu o Roma. Dua na siga era saumi ira e so na tamata na bete mera lai tarogi Jisu ena taro e nakiti me coriti kina. Oqo na taro, ‘E tara li meda saumi ivakacavacava vei Sisa se sega?’ E sagai me coriti o Jisu ena taro qaseqase oya. Ke sauma o Jisu, ‘Io, e dodonu mo ni saumi ivakacavacava,’ era na sega ni taleitaka e levu na Jiu na ka e tukuna o Jisu. Ia e sega ni rawa ni kaya o Jisu, ‘Sega, e sega ni dodonu mo ni saumi ivakacavacava.’ Ena cala ke tukuna oya.

Na cava e qai cakava o Jisu? E kaya: ‘Vakaraitaka mada vei au e dua na ilavo siliva.’ Nira vakaraitaka vua, e qai tarogi ira o Jisu: ‘Na mata i cei kei na yaca i cei e ceuti kina?’ Era kaya: ‘Nei Sisa.’ Mani kaya o Jisu: “Ni solia vua na Sisa na ka sa nona na Sisa, ka solia vua na Kalou na ka sa nona na Kalou.”​—Luke 20:19-26, VV.

E sega ni bau dua e vakacala na isau ni taro oya. Ke qaravi ira na lewenivanua o Sisa, e dodonu ga me vakayagataka na ilavo e rawata me saumi kina na veika e vakarautaka. E vakaraitaka e ke o Jisu ni  dodonu meda sauma na veika e vakarautaka na matanitu ena noda saumi ivakacavacava.

O se rui gone ena gauna oqo mo saumi ivakacavacava. Ia e dua na ka o rawa ni solia ina matanitu. O kila se cava oya?— Mo talairawarawa ina lawa ni matanitu. E kaya na iVolatabu: ‘Talairawarawa vei ira na veiliutaki ena matanitu.’ Oqo o ira na vakailesilesi ena matanitu. O koya gona e tukuna sara ga na Kalou meda talairawarawa ina lawa ni matanitu.​—Roma 13:1, 2, VV.

De tukuna na lawa ni tabu meda kolotaka na pepa se benu e gaunisala. E dodonu li mo talairawarawa ina lawa oya?— Io, baleta ni vinakata na Kalou mo talairawarawa. E dodonu li mo talairawarawa tale ga vei ira na ovisa?— Na matanitu e saumi ira na ovisa mera taqomaki keda. Nida talairawarawa vei ira e vaka ga eda talairawarawa ina matanitu.

Ke o via takoso e gaunisala qai tukuna vei iko na ovisa “Wawa!” na cava e dodonu mo cakava?— Ke ra takoso ga e so, e dodonu beka mo takoso tale ga?— E dodonu mo wawa, veitalia ke o mani wawa duadua toka. E tukuna vei iko na Kalou mo talairawarawa.

De yaco e dua na vakacaca ena vanua o vakaitikotiko kina, qai tukuna na ovisa: “Ni kua ni lako mai i gaunisala levu. Ni kua ni curu mai tuba.” Ia ni o rogoca na maue de o via kila sara na ka sa yaco tiko. E dodonu beka mo curu i tuba mo lai raica?— Oqo beka na talairawarawa “vei ira era veiliutaki e na matanitu”?—

Ena levu na vanua, e tara na koronivuli na matanitu qai saumi ira na kena qasenivuli. E vinakata beka na Kalou meda talairawarawa vei ira na qasenivuli?— Vakasamataka mada. Na matanitu e saumi ira na qasenivuli mera veivakavulici, me vaka ga e saumi ira na ovisa mera veitaqomaki. O koya gona nida talairawarawa vei ira na ovisa se qasenivuli e vaka ga nida talairawarawa tiko ina matanitu.

 Ia vakacava ke tukuna o qasenivuli mo cuva ina matakau, se vakarokorokotaka e dua tale na ivakatakarakara? Na cava o na cakava?— Eratou sega ni cuva sobu ina matakau na tolu na Jiu, dina ga ni tukuna o Nepukanesa me ratou cuva. O se nanuma tiko na vuna?— Baleta ni ratou sega ni via talaidredre vua na Kalou.

E vola e dua na dauvola itukutuku makawa o Will Durant nira ‘sega ni talairawarawa vakatabakidua vei Sisa’ na lotu Vakarisito taumada. Era talairawarawa vakatabakidua ga vei Jiova! Meda nanuma dei tiko meda vakaliuca ga na Kalou.

Eda talairawarawa ina matanitu baleta ni vinakata na Kalou meda talairawarawa. Ia kevaka e tukuni meda cakava na ka e vakatabuya na Kalou, na cava e dodonu meda cakava?— E dodonu meda tukuna tale ga na ka eratou kaya na yapositolo vua na bete levu: “Sa dodonu me keitou vakarorogo vua na Kalou, ka me keitou kakua ni vakarorogo vei ira na tamata.”​—Cakacaka 5:29, VV.