EDA vakamarautaka vakacava na Kalou? E rawa beka meda solia vua e dua na ka?— E kaya o Jiova: “Sa noqu ga na pulumokau kila kecega mai na veikau.” E kaya tale ga: “Sa noqu na siliva, ka sa noqu na koula.” (Same 24:1; 50:10; Akeai 2:8) Ia, e dua na ka e rawa nida solia vua na Kalou. Na cava oya?—

E vakatarai keda o Jiova meda digitaka se eda via qaravi koya se sega. E sega ni vakasaurarataki keda meda cakava na ka e vinakata. Daru tovolea ni raica mada na vuna e buli keda kina na Kalou meda dui digitaka ga se eda via qaravi koya se sega.

O rairai kila beka na matakau e yavalata na misini na robot. E buli na misini oqo me cakava na ka ga e vinakata o koya e bulia. E sega ni rawa ni vakataulewa na matakau e yavalata na misini oya. Ke a rawa ni buli keda o Jiova meda vaka na robot. Ke a rawa ni buli keda meda cakava ga na veika e vinakata meda cakava. Ia e sega ni cakava na Kalou oya. O kila na vuna?— E so na iyaya ni vakatatalo era vaka na robot. Ni o tabaka na kena bulukau se vakasaribariba, e cakava ga na ka e nakita o koya e bulia. O sa bau raica e dua na iyaya ni vakatatalo vaka oya?— So na gauna eda sa sega  tale ni taleitaka na iyaya ni vakatatalo e cakava tiko ga na ka e nakiti me cakava. Na Kalou e sega ni vinakata meda talairawarawa vua baleta nida vaka na robot se da vakasaurarataki meda qaravi koya. E vinakata ga o Jiova meda qaravi koya baleta nida lomani koya da qai vinakata meda talairawarawa vua.

E raica vakacava na Tamada vakalomalagi na noda vinakata meda talairawarawa vua?— Tukuna mada vei au se rau raica vakacava na nomu itubutubu na nomu ivakarau?— E kaya na iVolatabu ni “gone vuku sa vu ni reki vei tamana: ia na gone lialia sa vu ni rarawa vei tinana.” (Vosa Vakaibalebale 10:1) O bau vakila ni rau marau o tinamu kei tamamu ni o cakava na veika erau vinakata?— Ia vakacava ke o talaidredre vei rau?—

Daru vakasamataka mada na Tamada vakalomalagi, o Jiova. E dau vakaraitaka vei keda na sala meda vakamarautaki koya kina. Vakacava mo cega mada nomu iVolatabu ena Vosa Vakaibalebale 27:11. E vosa tiko vei keda na Kalou ni kaya: “Mo vuku, na luvequ, ka vakamarautaka na lomaqu, me dua na vosa me’u tauca vua sa beitaki [se, “vakalialiai,” NW] au.” O kila na ibalebale ni nona vakalialiai e dua?— E rawa ni vakalialiai iko e dua ni dredrevaki iko ena nona kaya ni o sega ni rawa ni cakava na ka o kaya o rawa ni cakava. E vakalialiai Jiova vakacava o Setani?— Daru raica mada.

 Nanuma ni daru a vulica ena Wase 8 ni ivola oqo ni o Setani e vinakata me rogo, e vinakata tale ga me talairawarawa vua na tamata. E kaya o Setani nira qaravi Jiova ga na tamata baleta ni yalataka vei ira o Jiova na bula tawamudu kevaka era qaravi koya. E bolea na Kalou o Setani ni sa rawai rau oti o Atama kei Ivi me rau talaidredre vei Jiova. E tukuna vua na Kalou: ‘Era qaravi kemuni tiko na tamata baleta nira rawa ka tiko vei kemuni. Vakatarai au mada, au na rawa ni moici ira mera talaidredre vei kemuni.’

Dina ni sega ni volai na veivosa oqori ena iVolatabu. Ia nida wilika na itukutuku kei Jope, e laurai kina ni a tukuna e dua na ka vaka oya vua na Kalou o Setani. E bibi vei rau ruarua o Jiova kei Setani na nona yalodina se sega o Jope. Daru cega mada na nodaru iVolatabu ena Jope wase 1 kei na 2 me daru raica kina na ka e yaco.

E vakaraitaka na Jope wase 1 ni a tu mai lomalagi o Setani ena gauna era lako kina na agilosi vei Jiova. A tarogi Setani  o Jiova: ‘O lako mai vei?’ E sauma o Setani ni a tu mai vuravura. Mani taroga o Jiova: ‘O bau raica na nona qaravi au o Jope kei na nona dau caka dodonu?’​—Jope 1:6-8.

Sega ni bera nona kaya o Setani: ‘E qaravi kemuni tiko ga o Jope baleta ni se sega ni sotava na veika dredre. Kevaka o ni sega ni taqomaki koya o ni qai sega ni vakalougatataki koya, ena vosavakacacataki kemuni.’ E sauma o Jiova: ‘Sa vinaka, Setani, cakava vua na ka ga o vinakata, ia kua ga ni vakamavoataki koya.’​—Jope 1:9-12.

Na cava e qai cakava o Setani?— E uqeti ira e so mera butakoca na bulumakau kei na asa nei Jope, ra qai vakamatei ira tale ga na kedra ivakatawa. E tibi na liva qai vakarusa vakadua na nona qelenisipi kei ira na kedra ivakatawa. Era lako tale ga mai e so ra qai butakoca na nona kameli kece ra qai vakamatei ira na kedra ivakatawa. Me kena iotioti, e vakavuna o Setani me liwa mai e dua na batinicagi qai vakabalea na vale eratou tiko tinitini kina na luve i Jope qai vakamatei iratou kece. Ia e yalodina tiko ga o Jope ena nona qaravi Jiova.​—Jope 1:13-22.

Ni raici Setani tale, e vakaraitaka vua o Jiova ni se yalodina tiko ga o Jope. E  kaya o Setani: ‘Kevaka oni vakatara meu vakamavoataka na yagona, ena vosavakacacataki kemuni o koya.’ E vakatara o Jiova me vakamavoataka na yago i Jope, ia me kua ga ni vakamatei koya.

E vakavuna o Setani me tauvi karokaro lelevu na yago taucoko sara i Jope. Ena ca ni kena iboi, e sega ni dua e via tiko volekati koya. E bau tukuna tale ga vei Jope o watina: “Vosavakacacataka na Kalou, ka mo mate ga.” Eratou mai sikovi Jope o iratou na kaya ni ratou nona itokani, ia sa qai rarawa ga vakalevu o Jope baleta ni ratou kaya ni rairai sauti koya na veika ca e cakava. Dina ga ni kaukaua sara na veivakararawataki e vakavuna o Setani me tarai Jope, e yalodina tiko ga o Jope ena nona qaravi Jiova.​—Jope 2:1-13; 7:5; 19:13-20.

Na cava o nanuma, e raica vakacava o Jiova na yalodina i Jope?— E marautaka, baleta ni rawa kina ni tukuna vei Setani: ‘Raici Jope! E lomana dina me qaravi au.’ O na vakataki Jope beka, me rawa kina vei Jiova me cavuti iko mo ivakaraitaki e vakalasui kina o Setani?— E ka dokai dina na noda vakalasui Setani ena nona kaya ni rawa ni vagolei keda tani mai na noda qaravi Jiova. E raica tale ga vaka oya o Jisu.

E sega ni bau vakatarai Setani na Qasenivuli Levu me vakamuai koya me cakava na ka e sega ni dodonu. Vakasamataka mada na nona marautaka o Tamana na ivakaraitaki vinaka i Jisu! E rawa ni cavuti Jisu o Jiova ena nona sauma vei Setani: ‘Raici Luvequ mada! E yalodina tiko ga baleta ni lomani au!’ Vakasamataka tale ga na nona marautaka o Jisu na nona vakamarautaki Tamana. Na marau oya e vakavuna me vosota kina o Jisu na nona vakamatei ena kaunirarawa.​—Iperiu 12:2.

O bau vinakata tale ga mo vakataki koya na Qasenivuli Levu mo vakamarautaki Jiova?— Vulica tiko ga na veika e vinakata o Jiova mo cakava, qai vakamarautaki koya ena nomu cakava sara ga na veika oya!