iMatai ni iVola Vei Ira mai Korinia 1:1-31
1 O yau o Paula, au kacivi meu yapositolo+ i Karisito Jisu me salavata kei na loma ni Kalou, kei Sosiceni na tacida,
2 vei kemuni ena ivavakoso ni Kalou mai Korinica,+ oni sa vakasavasavataki moni tisaipeli i Karisito Jisu,+ oni sa kacivi moni yalosavasava, kei ira kece ena veivanua era masuta na yaca ni noda Turaga o Jisu Karisito,+ na nodra Turaga, e noda tale ga:
3 Me sobuti kemuni mada ga na loloma soli wale kei na vakacegu ni Kalou na Tamada kei na Turaga o Jisu Karisito.
4 Au dau vakavinavinakataki kemuni vua na noqu Kalou, me baleta na loloma soli wale ni Kalou e soli vei kemuni ena vuku i Karisito Jisu,
5 ni oni sa mai vakavutuniyautaki ena ka kece ena vukuna, ena vosa kece kei na kilaka kece,+
6 me vaka sa dei vei kemuni na vunautaki ni itukutuku kei Karisito,+
7 moni rawata kina na isolisoli kece, ena nomuni nanamaki tiko ena nona vakatakilai na noda Turaga o Jisu Karisito.+
8 Ena vukei kemuni tale ga moni dei me yacova na iotioti, moni kua kina ni beitaki ena dua na ka ena siga ni noda Turaga o Jisu Karisito.+
9 E dau dina na Kalou,+ o koya e kacivi kemuni moni vakaivotavota vata kei na Luvena, na noda Turaga o Jisu Karisito.
10 Qo au uqeti kemuni raveitacini ena yaca ni noda Turaga o Jisu Karisito moni duavata ena ka oni tukuna, moni kua ni veisei,+ ia moni duavata ena nomuni rai kei na nomuni inaki.+
11 Eratou mai tukuna vei au na lewe ni vuvale i Kiloi ni oni duiyaloyalo tiko na taciqu.
12 Qo na ka au kaya tiko, eso vei kemuni era tukuna: “Au nei Paula,” “Au nei Apolosa,”+ “Au nei Kifa,”* “Au nei Karisito.”
13 Sa veisei na Karisito? A sega ni vakamatei ena kau o Paula ena vukumuni, se vakacava? Se oni a papitaiso ena yaca i Paula?
14 Au vakavinavinakataka na Kalou niu sega ni papitaisotaka e dua vei kemuni, vakavo ga o Kirisipo+ kei Keio,+
15 e sega kina ni dua vei kemuni e rawa ni kaya ni papitaiso ena yacaqu.
16 Au papitaisotaki ratou tale ga na vuvale i Sitifana.+ Kena vo au sega ni kila, seu papitaisotaka tale e dua se sega.
17 Ni sega ni talai au na Karisito meu veipapitaisotaki, meu vunautaka ga na itukutuku vinaka,+ sega ena nodra vosa na tamata vuku, de vakatawayagataki kina na kaunirarawa* i Karisito.
18 E ka sesewa vei ira na vakarau rusa+ na itukutuku me baleta na kaunirarawa,* ia vei keda eda vakabulai tiko, qo na kaukaua ni Kalou.+
19 Me vaka e volai: “Au na vakaotia na nodra vuku na tamata vuku, au na cata* na nodra kilaka na vuli.”+
20 I vei na tamata vuku? I vei na vunivola?* I vei na dauveiba ni vuravura qo?* Vakacava, e vakaraitaka na Kalou ni ka sesewa na vuku ni vuravura?
21 E vuku na Kalou, ia o vuravura e sega ni kila rawa na Kalou+ ena kena vuku,+ ia ena nona vuku na Kalou e raica ni yaga na ka eda vunautaka, e dina nira okata eso me ka sesewa,+ nira na bula kina o ira na vakabauta.
22 Era kere ivakatakilakila na Jiu,+ era vaqara vuku na kai Kirisi,
23 ia o keda, eda vunautaka nona vakamatei ena kau o Karisito, qo e vakatarabetaki ira na Jiu, e ka sesewa vei ira na lewe ni veimatanitu.+
24 Ia vei ira na kacivi, se ra Jiu se ra kai Kirisi, e kaukaua ni Kalou o Karisito, e vuku tale ga ni Kalou.+
25 Baleta na ka e sesewa vua na Kalou e vuku cake vua na tamata, kei na ka e malumalumu vua na Kalou e kaukaua cake vua na tamata.+
26 Ni oni sa raica na taciqu na nona kacivi kemuni, ni sega ni levu na vuku vakavuravura,+ sega ni levu na vakaitutu, sega tale ga ni levu na sucuturaga.*+
27 Ia na Kalou e digitaka na veika sesewa ni vuravura qo me vakamaduataki ira kina na vuku, e digitaki ira na ka malumalumu ni vuravura qo na Kalou me vakamaduataki ira kina na kaukaua,+
28 na Kalou e digitaka tale ga na veika wale ni vuravura qo, na ka beci, kei na ka e dau raici tu me tawayaga, me vakatawayagataki kina na ka e dau sakitaki tu,+
29 me kua kina ni dua e sakitaki koya ena mata ni Kalou.
30 Ena vukuna ga oni mai tisaipeli kina i Karisito Jisu, o koya na vuku ni Kalou vei keda, e yalododonu,+ e vakasavasavataki keda,+ e sereki keda tale ga ena ivoli,+
31 me yaco kina na ka e volai: “O koya e sakitaka e dua na ka, me sakitaki Jiova* ga.”+
iVakamacala e ra
^ Kilai tale ga me o Pita.
^ Raica na iVakamacala ni Vosa.
^ Raica na iVakamacala ni Vosa.
^ Se “na biuta vakatikitiki.”
^ Oya e dua e kila vinaka na Lawa.
^ Se “ni itabagauna qo.” Raica na iVakamacala ni Vosa.
^ Se “na vuvale kawaturaga.”
