iMatai ni Tui 11:1-43
11 Ia e domona o Tui Solomoni e levu na yalewa vulagi,+ sega ni o luvei Fero ga:+ o ira na yalewa ni Moapi,+ o ira na yalewa ni Amoni,+ o ira na yalewa ni Itomi, o ira na yalewa ni Saitoni,+ kei ira na yalewa ni Itaiti.+
2 Era lewe ni veimatanitu a tukuna o Jiova vei ira na Isireli: “Moni kua ni lakovi ira,* mera kua tale ga ni lako yani vei kemuni, nira na vagolea dina na lomamuni moni muri ira na nodra kalou.”+ Ia e kabiti ira ga o Solomoni qai domoni ira.
3 E 700 na watina era raluve, e 300 na watina lalai, era qai vagolea vakamalua na lomana na watina.
4 Ni sa qase o Solomoni,+ era vagolea na lomana o ira na watina me muria eso tale na kalou,+ e sega ni taucoko* na lomana vei Jiova na nona Kalou me vaka na loma i Tevita na tamana.
5 E mani muri Asetoreci+ na nodra kalou yalewa na kai Saitoni o Solomoni, kei Milikomi+ na nodra kalou vakasisila na Amoni.
6 E qai vakayacora o Solomoni na ka ca ena mata i Jiova, e sega ni muri Jiova vakatabakidua me vaka e cakava o Tevita na tamana.+
7 E qai tara o Solomoni na vanua cecere+ ena ulunivanua donui Jerusalemi vei Kimosi na nodra kalou vakasisila na Moapi, vei Moleke+ tale ga na nodra ka vakasisila na Amoni.+
8 Qori na ka e cakava ena vukudra kece na watina vulagi era cabora tiko na isoro kubou ra qai vakacaboisoro tiko vei ira na nodra kalou.
9 E cudruvi Solomoni vakalevu o Jiova ni sa gole tani na lomana vei Jiova na Kalou ni Isireli,+ o koya e rairai vakarua+ vua,
10 e vakasalataki koya ena ka qo, oya me kua ni muria eso tale na kalou.+ Ia e sega ni muria na ka e vakaroti koya kina o Jiova.
11 E kaya o Jiova vei Solomoni: “Ni o vakayacora qo o qai sega ni muria na noqu veiyalayalati kei na noqu lawa au vakaroti iko kina, au na kaliraka sara ga vei iko na matanitu, au na solia vua e dua na nomu dauveiqaravi.+
12 Au na sega ga ni vakayacora qori ena nomu gauna ena vuku i Tevita na tamamu. Au na kaliraka mai liga i luvemu tagane,+
13 ia au na sega ni kaliraka na matanitu taucoko.+ E dua na yavusa au na solia vei luvemu tagane+ ena vuku i Tevita na noqu dauveiqaravi, ena vuku i Jerusalemi tale ga au digitaka.”+
14 E mani vakatubura o Jiova e dua me vorati Solomoni,+ oya o Etati na kai Itomi, e kawa ni tui Itomi.+
15 Ni vakadrukai Itomi o Tevita,+ e lako cake o Joapi na iliuliu ni mataivalu me buluti ira na vakamatei, e saga me mokuti ira kece na tagane ni Itomi.
16 (E ono na vula na nona tiko e kea o Joapi kei ira kece na Isireli mera vakamatei ira kece na tagane e Itomi.)
17 Ia e dro o Etati kei na so na kai Itomi era dauveiqaravi nei tamana mera lako i Ijipita, oya ni se gonelailai o Etati.
18 Era biuti Mitiani sara mera lako i Perana. Era kauta eso na tamata mai Perana+ mera lako i Ijipita vei Fero na tui Ijipita, e mani solia vua e dua na vale, e vota vua na kakana, e solia vua na qele.
19 E taleitaki Etati vakalevu na mata i Fero, mani soli nona daku me watina, na taci Tapanesi na ranadi.*
20 E qai vakasucuma o taci Tapanesi e dua na luvena tagane, o Kinupaca, e susugi* koya o Tapanesi ena vale i Fero, e tiko ga o Kinupaca ena vale i Fero, e maliwai ira na luvei Fero.
21 E rogoca mai Ijipita o Etati ni sa davo vata kei ira na tukana o Tevita,+ sa mate tale ga o Joapi na iliuliu ni mataivalu.+ E kaya sara vei Fero o Etati: “Mo talai au meu lako ina noqu vanua.”
22 Ia e kaya vua o Fero: “Na cava e sega vei iko ni o tiko vata kei au, mo via lako kina ina nomu vanua?” E kaya o koya: “E sega ni dua na ka, ia au kerea mo talai au meu lako.”
23 E vakatubura tale ga na Kalou e dua tale me vorati Solomoni,+ oya o Risoni na luvei Eliata, e drovaki Etateseri+ na tui Sopa na nona turaga.
24 E kumuni ira na tamata mera tomani koya, e qai nodra iliuliu na ilala daukabakoro, ena gauna a vakadrukai* ira kina o Tevita.+ Era mani lako i Tamasiko+ mera vakaitikotiko kina, era veiliutaki sara e Tamasiko.
25 E vorati Isireli ena gauna taucoko i Solomoni, e kuria na ca e cakava o Etati, e cati ira matua na Isireli ena gauna e veiliutaki kina e Siria.
26 Ia o Jerepoami+ na luvei Nipati e dua na Ifireimi mai Sirata, e dauveiqaravi nei Solomoni,+ e yada o tinana na yacana o Sirua. E tekivu vorata* tale ga na tui o koya.+
27 Qo na vuna e vorata kina na tui: E tara na Buke*+ o Solomoni qai sogota na vanua e tadola tu ena Koro i Tevita na tamana.+
28 Ia o Jerepoami qo e turaga qaqa. Ni raica o Solomoni ni dau cakacaka na cauravou qo, e lesi koya sara me lewa+ na cakacaka kece ena vuvale i Josefa.
29 E biuti Jerusalemi ena gauna oya o Jerepoami, e raici koya e gaunisala na parofita o Eaija+ na turaga ni Sailo. E dara tiko o Eaija e dua na isulu vou, erau tiko taurua ga ena were.
30 E taura sara o Eaija na isulu vou e dara tiko qai dresulaka me 12 na tikina.
31 E qai tukuna vei Jerepoami:
“Mo taura e tini na tikina, ni qo na ka e tukuna o Jiova na Kalou ni Isireli: ‘Au sa kaliraka tani na matanitu mai na liga i Solomoni, au na solia vei iko e tini na yavusa.+
32 Ia ena nona tiko ga e dua na yavusa+ ena vuku i Tevita+ na noqu dauveiqaravi, ena vuku i Jerusalemi tale ga na koro au a digitaka vei ira na yavusa kece e Isireli.+
33 Au na vakayacora qo nira sa biuti au,+ ra qai cuva sobu vei Asetoreci na nodra kalou yalewa na kai Saitoni, vei Kimosi na kalou ni Moapi, kei Milikomi na nodra kalou na Amoni, era sega ni muria na noqu sala mera vakayacora na ka e donu e mataqu, mera vakabauta na noqu lawa kei na noqu lewa me vaka e cakava o Tevita na tamana.
34 Ia au na sega ni taura mai ligana na matanitu taucoko, au na lesi koya me turaga ena nona bula taucoko, ena vuku i Tevita na noqu dauveiqaravi au digitaka+ ni muria na noqu ivakaro kei na noqu lawa.
35 Au na kauta tani ga na veiliutaki vakatui mai na liga i luvena meu solia vei iko, oya e tini na yavusa.+
36 Au na solia vei luvena tagane e dua na yavusa, me tiko ga e mataqu e dua na cina nei Tevita na noqu dauveiqaravi e Jerusalemi,+ na koro au digitaka me tiko kina na yacaqu.
37 Au na kauti iko, o na lewa na ka kece o vinakata, o na qai tui e Isireli.
38 Ke o talairawarawa ena ka kece au vakaroti iko kina mo muria na noqu sala, mo cakava na ka e donu e mataqu ni o muria tiko na noqu lawa kei na noqu ivakaro me vaka e vakayacora o Tevita na noqu dauveiqaravi,+ au na tokoni iko tale ga. Au na tara vei iko e dua na vale tudei me vaka au tara vei Tevita,+ au na qai soli Isireli vei iko.
39 Au na vakamaduataka na kawa i Tevita ena vuku ni ka qo,+ ia ena sega ni tawamudu.’”+
40 E mani saga o Solomoni me vakamatei Jerepoami, ia e dro i Ijipita o Jerepoami vei Sisaki+ na tui Ijipita,+ e tiko ga mai Ijipita me mate mada o Solomoni.
41 Na vo ni itukutuku me baleti Solomoni, na ka kece a cakava kei na nona vuku, e volai ena ivola ni itukutuku nei Solomoni?+
42 E 40 na yabaki na balavu ni nona veiliutaki e Jerusalemi o Solomoni me lewai Isireli taucoko.
43 E qai davo vata kei ira na tukana o Solomoni, e bulu ena Koro i Tevita na tamana, e veiliutaki sara o Riopoami+ na luvena me sosomitaki koya.
iVakamacala e ra
^ Se “Moni kua ni veiwatini veicurumaki kei ira.”
^ Se “yalodina.”
^ Na ranadi e sega ni veiliutaki.
^ Se rawa ni, “kali koya.”
^ Ipe., “vakamatei.”
^ Ipe., “dodoka na ligana.”
^ Se “Milo.” Na vosa vakaIperiu e kena ibalebale “bulu.”
