iKarua ni Samuela 19:1-43
19 E tukuni vei Joapi: “E tagi tiko na tui, e lolositaki Apisalome+ tiko.”
2 Na qaqa* ena siga oya sa vuki me lolosi vei ira kece na lewenivanua nira rogoca ni rarawa tiko na tui ena vuku i luvena.
3 Era lesu lo ena siga oya na lewenivanua ina koro+ me vaka na lewenivanua era madua nira drovaka na ivalu.
4 E ubia na matana na tui, e tagi tiko ga ena domolevu: “Na luvequ Apisalome! Apisalome na luvequ, na luvequ!”+
5 E qai lako i vale o Joapi vua na tui, e kaya: “Oni sa vakamaduataki ira kece na nomuni dauveiqaravi nikua, o ira na vakabulai kemuni nikua kei na nodra bula na luvemuni tagane,+ o ira na luvemuni yalewa,+ o ira na watimuni, kei ira na watimuni lalai.+
6 Oni lomani ira na cati kemuni, oni cati ira na lomani kemuni, ni oni vakaraitaka nikua ni sega na betedra vei kemuni o ira na iliuliu kei ira na dauveiqaravi, niu kila vinaka ni donu vei kemuni ke bula tiko o Apisalome me keimami mate na kena vo nikua.
7 Ia qo moni tucake, ni lako i tuba moni vakayaloqaqataki* ira na nomuni dauveiqaravi, niu bubului vei Jiova ke oni sega ni lako i tuba, ena sega ni dua me tiko vata kei kemuni ena bogi nikua. Ena ca sara qo vei kemuni ni vakatauvatani kei na ka rarawa kece oni donuya ena gauna oni se cauravou kina me yacova qo.”
8 E tucake sara na tui me lai dabe ena matamatanikoro, e qai tukuni vei ira kece na lewenivanua: “Sa dabe tiko na tui ena matamata.” Era lako sara yani vua na tui na lewenivanua kece.
Ia era dui dro na Isireli ina nodra vale.+
9 Era veiba na lewe ni yavusa kece e Isireli, era kaya: “E vakabulai keda na tui vei ira na keda meca,+ e vakabulai keda tale ga vei ira na kai Filisitia, ia qo sa drovaka na vanua ena vuku i Apisalome.+
10 Sa balemate ena ivalu+ o Apisalome, o koya eda lumuta me liutaki keda.+ Ia qo na cava oni sega ni cakava kina e dua na ka moni kauta lesu mai na tui?”
11 E talatala o Tui Tevita vei rau na bete o Setoki+ kei Epaiaca:+ “Drau vosa vei ira na qase ni Juta,+ mo drau kaya, ‘Na cava moni iotioti kina moni kauta lesu na tui ina nona vale, ni rogoca na tui ena nona vale na ka era tukuna kece na Isireli?
12 O kemuni ga na taciqu, oni suiqu oni lewequ.* Na cava moni iotioti kina moni kauta lesu mai na tui?’
13 Mo drau kaya vei Amasa,+ ‘O sega ni suiqu se lewequ? Me vakayacora mada ga vei au na Kalou me kuria tale ga ke o sega ni mai noqu turaganivalu tiko ga, me kua ni o Joapi.’”+
14 E qai rawa na lomadra kece na lewe i Juta me vaka nira le dua ga na tamata, era talatala sara vua na tui: “Moni lesu mai, o kemuni kei ira kece na nomuni dauveiqaravi.”
15 E lesu na tui me yaco sara ina Joritani, era lako yani na Juta i Kilikali+ mera tavaka na tui, mera kauti koya nira takosova na Joritani.
16 E qai vakatotolo me lako sobu o Semeai+ na luvei Kira na Penijamini mai Peurimi kei ira na Juta mera tavaki Tui Tevita,
17 era tomani koya e 1,000 na tamata vei ira na Penijamini. E vakusakusa tale ga ina Joritani o Sipa+ na dauveiqaravi ena vuvale i Saula ni bera ni yaco yani na tui, kei na 15 na luvena tagane, kei na 20 na nona dauveiqaravi.
18 E takosova o koya* na vanua mamatia me kauti ira na nona lewenivuvale na tui, me cakava tale ga na ka e vinakata. Ia e tekiduru e matana na tui o Semeai na luvei Kira ni vakarau takosova na Joritani.
19 E kaya vua na tui: “Me kua ni lewai au na noqu turaga niu cala, moni kua ni nanuma na nona cala na nomuni dauveiqaravi+ ena siga e biuti Jerusalemi kina na noqu turaga na tui. Me kua ni tugana e lomana na tui,
20 ni kila vinaka na nomuni dauveiqaravi ni cala ga o koya, ia nikua au liu duadua ena vuvale i Josefa meu lako sobu meu tavaka na noqu turaga na tui.”
21 E kaya sara o Apisai+ na luvei Seruaia:+ “Vakacava, me kua ni vakamatei o Semeai ena vuku ni ka qo, ni vosavakacacataka na lumuti i Jiova?”+
22 Ia e kaya o Tevita: “Me icavai vei kemudou na luvei Seruaia+ mo dou saqati au nikua? Vakacava, me vakamatei nikua e dua e Isireli? Seu lecava niu sa tui Isireli nikua?”
23 E qai kaya na tui vei Semeai: “O na sega ni mate.” E bubului sara vua na tui.+
24 E lako sobu tale ga o Mefiposeci+ na makubui Saula me tavaka na tui. E sega ni savata* na yavana, se toroya na nona sominiwai, se savata na nona isulu ena siga e lako kina na tui me yacova ni lesu mai ena vakacegu.
25 Ia ni yaco* i Jerusalemi me tavaka na tui, e kaya vua na tui: “Na cava o sega ni tomani au kina, Mefiposeci?”
26 E kaya o koya: “Kemuni na noqu turaga na tui, e dabui au na noqu dauveiqaravi.+ A tukuna na nomuni dauveiqaravi, ‘Meu vakarautaka na idabedabe ni asa* meu vodoka meu lako vata kei na tui,’ ni lokiloki na nomuni dauveiqaravi.+
27 E qai vakaucacataka na nomuni dauveiqaravi vua na noqu turaga na tui.+ Ia e vaka na agilosi ni Kalou dina na noqu turaga na tui, moni vakayacora ga na ka e vinaka vei kemuni.
28 E rawa sara ga ni vakamatei ira kece na vuvale i tamaqu na noqu turaga na tui, ia oni lesia ga na nomuni dauveiqaravi me tiko kei ira era kana tiko ena nomuni teveli.+ Na cava tale e dodonu meu tagica vua na tui?”
29 Ia e kaya vua na tui: “Na cava o vosa tiko ga kina va qo? Au sa lewa oti mo drau wasea kei Sipa na vanua.”+
30 E kaya vua na tui o Mefiposeci: “Me nona kece ga, ni sa lesu mai ena vakacegu na noqu turaga na tui ina nona vale.”
31 E qai biuti Rokilimi o Pasilai+ na kai Kiliati me lako sobu ina Joritani me tomana na tui ina Joritani.
32 Sa kenaturaga sara o Pasilai, sa yabaki 80, e dau vakarautaka na kena na tui ena gauna e tiko kina mai Meneimi,+ ni turaga vutuniyau sara.
33 E mani kaya na tui vei Pasilai: “Me daru takoso vata, au na vakarautaka na kemu mai Jerusalemi.”+
34 Ia e kaya o Pasilai vua na tui: “Sa vo e vica na yabaki meu bula tiko kina meu lako cake vata kei na tui i Jerusalemi?
35 Au sa yabaki 80 nikua.+ Vakacava, au se rawa ni vakaduiduitaka na ka vinaka kei na ka ca? Se rawa ni kila na nomuni dauveiqaravi na ka e kania kei na ka e gunuva? Au se rawa ni rogoca na domodra na tagane kei na yalewa daulagasere?+ Na cava gona me vakaogai kemuni tale kina na noqu turaga na tui na nomuni dauveiqaravi?
36 Sa rauta ga me kauta na tui ina Joritani na nomuni dauveiqaravi. Na cava me saumi au kina va qo na tui?
37 Yalovinaka me lesu ga na nomuni dauveiqaravi, meu mate ga ena noqu koro volekata na ibulubulu nei tamaqu kei tinaqu.+ Ia qo na nomuni dauveiqaravi o Kimami.+ Me takoso mada ga o koya kei na noqu turaga na tui, moni vakayacora vua na ka e vinaka vei kemuni.”
38 E mani kaya na tui: “Keirau na takoso vata kei Kimami, au na vakayacora vua na ka e vinaka vei iko, na ka ga o kerea au na vakayacora vei iko.”
39 Era takosova sara na Joritani na lewenivanua kece, ni sa takoso na tui e reguci Pasilai+ na tui qai vosa vakalougatataki koya, e lesu sara o Pasilai ina nona vanua.
40 Ni takoso yani na tui i Kilikali,+ e takoso vata kei koya o Kimami. O ira kece na lewe i Juta kei na veimama na lewe i Isireli era kauta i tai na tui.+
41 Era lako yani vua na tui na lewe i Isireli kece, era kaya vua: “Na cava era butakoci kemuni kina na taci keimami, o ira na lewe i Juta, mera qai kauta na tui kei na nona vuvale ena tai ni Joritani, kei ira kece na nomuni tamata?”+
42 Era sauma kece na lewe i Juta vei ira na lewe i Isireli: “Ni keimami veiwekani kei na tui.+ Na cava oni cudruvaka kina na ka qo? Vakacava e sauma na tui na keimami, se soli vei keimami e dua na iloloma?”
43 Ia era kaya na lewe i Isireli vei ira na lewe i Juta: “E tini na neimami ivotavota vua na tui, e levu kina na neimami lewa vei kemuni ena ka me baleti Tevita. Na cava gona oni beci keimami kina? Na cava me keimami sega ni liu kina ni keimami kauta lesu na tui?” Ia e kaukaua sara na nodra vosa na lewe i Juta vei ira na lewe i Isireli.
iVakamacala e ra
^ Ipe., “era vakabulai.”
^ Ipe., “uqeta na lomadra.”
^ Se “wekaqu vakadra.”
^ Se rawa ni, “ira.”
^ Na vosa vakaIperiu e rawa ni okati tale ga kina nona kotiva na itaukuku ni yavana.
^ Se rawa ni, “lesu mai.”
^ Se “asa yalewa.”
