iKarua ni Tui 24:1-20
24 Ena gauna i Jioiakimi e lako o Tui Nepukanesa+ mai Papiloni me valuti koya, e qai nona dauveiqaravi o Jioiakimi me tolu na yabaki. Ia e vuki me saqati koya.
2 E mani tala vua o Jiova na ilala daukabakoro ni Kalitia,+ ni Siria, ni Moapi kei na Amoni. E talai ira tiko ga i Juta mera valuta mera vakarusa, me vaka na vosa i Jiova+ era tukuna na nona dauveiqaravi na parofita.
3 E yaco dina qori vei Juta ena ivakaro i Jiova mera kau tani mai matana+ ena vuku ni valavala ca kece e vakayacora+ o Manasa,
4 ena vuku tale ga ni nona vakadavea+ na nodra dra o ira na sega ni cala, ni vakasinaiti Jerusalemi ena nodra dra o ira na sega ni cala qai sega ni via vosota o Jiova.+
5 Na vo ni itukutuku me baleti Jioiakimi, na ka kece e cakava, e volai ena ivola ni itukutuku ni nodra gauna na tui Juta.+
6 E qai davo vata kei ira na tukana+ o Jioiakimi, e tui sara o Jioakini na luvena me sosomitaki koya.
7 E sega tale ni biuta mai na nona vanua na tui Ijipita, ni sa taura na tui Papiloni na ka kece e nei tui Ijipita+ mai na Waimaca* o Ijipita+ me yacova na Uciwai na Uferetisi.+
8 E tui o Jioakini+ ni sa yabaki 18, e veiliutaki e Jerusalemi+ me tolu na vula. Na yaca i tinana o Niusita na luvei Elinecani mai Jerusalemi.
9 E vakayacora tiko ga na ka ca ena mata i Jiova me vaka na ka kece e cakava o tamana.
10 Ena gauna oya era lako cake i Jerusalemi na dauveiqaravi nei Tui Nepukanesa mai Papiloni, e mani viribaiti+ na koro.
11 E lako ina koro o Tui Nepukanesa mai Papiloni nira viribaita tiko na nona dauveiqaravi.
12 E lako sara o Tui Jioakini e Juta vua na tui Papiloni+ vata kei tinana, o ira na nona dauveiqaravi, o ira na nona turaga vakaitutu,+ kei ira na nona vakailesilesi, e kauti koya vakavesu na tui Papiloni ena ikawalu ni yabaki ni nona veiliutaki.+
13 E qai kauta mai kea o koya na iyau kece ni vale i Jiova kei na iyau ni valenitui.+ E tatalaka na iyaya koula kece a cakava o Solomoni na tui Isireli ena valenisoro i Jiova.+ E qai yaco qo me vaka ga e tukuna o Jiova.
14 E kauti ira vakavesu na lewe i Jerusalemi taucoko, o ira kece na turaga,+ o ira kece na tamataivalu qaqa, o ira kece na liga maqosa kei ira na matai ni kaukamea,*+ e kauta vakavesu o koya e 10,000. E sega ni dua e vo tu mai, o ira ga na lewenivanua dravudravua.+
15 E kauti Jioakini+ vakavesu i Papiloni,+ e kauta tale ga na tinana na tui, o ira na watina na tui, o ira na nona vakailesilesi, kei ira na turaga dokai ena vanua, e kauti ira vakavesu mai Jerusalemi i Papiloni.
16 E kauta tale ga vakavesu i Papiloni o tui Papiloni na tamataivalu kece era le 7,000, vaka kina o ira na liga maqosa kei ira na matai ni kaukamea* era le 1,000, era tamata qaqa kece ra qai vulica na ivalu.
17 E lesi Matanaia o tui Papiloni na tamana lailai o Jioakini+ me tui me sosomitaki koya, e qai veisautaka na yacana me o Setekaia.+
18 E tui o Setekaia ni sa yabaki 21, e veiliutaki e Jerusalemi me 11 na yabaki. Na yaca i tinana o Emutali+ na luvei Jeremaia mai Lipina.
19 E vakayacora tiko ga na ka ca ena mata i Jiova me vaka na ka kece e cakava o Jioiakimi.+
20 E yaco qo ni cudruvi Jerusalemi kei Juta o Jiova me biuti ira tani mai matana.+ E talaidredre o Setekaia vei tui Papiloni.+
iVakamacala e ra
^ Raica na iVakamacala ni Vosa.
^ Se rawa ni, “o ira na dau tara bainivalu.”
^ Se rawa ni, “o ira na dau tara bainivalu.”
