iKarua ni Veigauna 22:1-12
22 Era qai buli Esaia na luvena gone duadua me tui me sosomitaki koya o ira na lewe i Jerusalemi, ni vakamatei ira kece na tuakana na ilala daukabakoro e lako vata mai kei ira na kai Arapea ina keba.+ E tekivu veiliutaki sara o Esaia na luvei Jorami me tui Juta.+
2 E tui o Esaia ni sa yabaki 22, e dua na yabaki na nona veiliutaki e Jerusalemi. Na yaca i tinana o Acalaia+ na makubui* Omirai.+
3 E muria tale ga o koya na nodra ivalavala na vuvale i Eapi,+ ni nona daunivakasala o tinana me cakava na ka ca.
4 E cakava tiko ga na ka ca ena mata i Jiova me vaka na vuvale i Eapi, nira nona daunivakasala ni sa mate o tamana, e mani rusa kina.
5 E muria na nodra ivakasala qai lako vata kei Jorami na luvei Tui Eapi e Isireli me rau valuti Tui Eseli+ e Siria mai Remoci-kiliati,+ na vanua era vanai Jorami kina na dauvana dakaititi.
6 E lesu i Jesirieli+ me bula mai na nona mavoa era vakamavoataki koya kina mai Rama ni valuti Tui Eseli e Siria.+
E lako sobu i Jesirieli o Esaia* na luvei Jorami+ na tui Juta me raici Jorami+ na luvei Eapi ni mavoa* tu.+
7 E vakavuna na Kalou me druka o Esaia ni lako vei Jorami, ni yaco yani e lako vata kei Jorami me tavaki Jeu+ na makubui* Nimesai, o koya e lumuta o Jiova me vakarusa* na vuvale i Eapi.+
8 Ena gauna e totogitaki ira tiko kina na vuvale i Eapi o Jeu, e raici ira na turaga ni Juta kei na luvedra na taci Esaia, era dauveiqaravi nei Esaia qai vakamatei ira.+
9 E vaqarai Esaia sara, era vesuki koya ni vuni tiko mai Samaria, era kauta vei Jeu. Era vakamatea ra qai buluti koya,+ era kaya: “E makubui Josafati, o koya e vaqarai Jiova ena lomana taucoko.”+ E sega ni dua ena vuvale i Esaia e tu vua na kaukaua me lewa na matanitu.
10 Ni raica o Acalaia+ na tinai Esaia ni sa mate na luvena, e vakarau o koya me vakawabokotaki ira kece na kawa vakatui* ena vuvale i Juta.+
11 Ia o Jiosapici na luvena yalewa na tui e kauti Joasi+ na luvei Esaia, e butakoci koya mai na kedra maliwa na luvenitui era vakarau vakamatei qai biuti koya ena rumunimoce e loma kei na marama e dau mei koya. E vunitaki koya o Jiosapici na luvei Tui Jorami+ (o Jiosapici e wati Jioiata+ na bete, na ganei Esaia) me kua ni raici koya o Acalaia de vakamatei koya.+
12 E tiko vata ga kei ira o koya me ono na yabaki, e vuni tiko ena vale ni Kalou dina ni veiliutaki tiko o Acalaia ena vanua.
iVakamacala e ra
^ Ipe., “luvena yalewa.”
^ Se “tauvimate.”
^ Ena so na ivolavivigi vakaIperiu, o “Asaraia.”
^ Ipe., “luvena tagane.”
^ Ipe., “muduka.”
^ Ipe., “o ira kece na kawa ni matanitu.”
