iKarua ni Veigauna 4:1-22
4 E qai cakava o Solomoni e dua na icabocabonisoro kopa+ e 20 na kiupiti na kena balavu, e 20 na kiupiti na kena raba, e tini na kiupiti na kena cere.
2 E cakava o koya na Wasawasa*+ ena kaukamea vakawaicalataki. E mokimokiti na kena ibulibuli, e 10 na kiupiti mai na dua na batina ina dua tale na batina, e 5 na kiupiti na kena cere, e rawa ni wavokita na wa ni vakarau e 30 na kiupiti na kena balavu.+
3 E wavokita na ruku ni batina na iukuuku vago,+ e wavokita taucoko, e dua na kiupiti e tiko kina e tini, e wavokita na Wasawasa. E rua na iyatu vago, e vakawaicalataki vata ga.
4 E dabe toka e dakudratou na 12 na bulumakau tagane,+ e 3 e qara ina vualiku, e 3 e qara ina ra, e 3 e qara ina ceva, e 3 e qara ina tokalau, e toka e dakudratou na Wasawasa qai qara i loma na dibidratou.
5 Na kena vavaku e vaka na rabaniliga,* na batina e caka me vaka na bati ni bilo, e vaka na senilili. E rawa ni tawa ena tani e 3,000 na ivakarau paca.*
6 E cakava tale ga o koya e tini na beseni ni savasava, e biuta e lima ena imatau e lima ena imawi.+ Era dau savata kina na ka me cabori me isoro kama.+ Ia na Wasawasa mera sasavui kina na bete.+
7 E qai cakava o koya e tini na itutu ni cina koula+ me vaka e tukuni,+ e biuta sara ena valenisoro, e lima ena imatau e lima ena imawi.+
8 E cakava tale ga e tini na teveli qai biuta ena valenisoro, e lima ena imatau e lima ena imawi,+ e cakava e 100 na boulu koula.
9 E qai cakava na nodra raranivale+ na bete,+ na raranivale* levu+ kei na katuba ni raranivale, e ubia na katuba ena kopa.
10 E biuta sara na Wasawasa ena imatau me qara ina tokalau donuya na ceva.+
11 E cakava tale ga o Airami na sedre, na isivi, kei na boulu.+
E mani vakaotia o Airami na cakacaka e cakava vei Tui Solomoni ena vale ni Kalou dina:+
12 na rua na duru+ kei na iukuuku vaka na boulu ena ulu ni duru ruarua, na rua na lawalawa+ me robota na iukuuku vaka na boulu e toka ena ulu ni duru,
13 na 400 na pomekaraneti+ ena rua na lawalawa, e rua na iyatu pomekaraneti ena dua na lawalawa me robota na rua na iukuuku e vaka na boulu e tiko ena duru,+
14 e tini na qiqi* kei na tini na beseni ena delaniqiqi,+
15 na Wasawasa kei na 12 na bulumakau tagane e tiko e rukuna,+
16 kei na sedre, na isivi, kei na icula,+ kei na kena iyaya kece e cakava o Airami-abivi+ ena kopa caliva vei Tui Solomoni me baleta na vale i Jiova.
17 E cakava qori na tui ena yasayasa na Joritani ena qele vavaku ena tadrua kei Sukoci+ kei Sirata.
18 E bulia vakalevu na iyaya kece qo o Solomoni, e sega ni kilai rawa na bibi ni kopa.+
19 E cakava o Solomoni na iyaya kece+ me baleta na vale ni Kalou dina: na icabocabonisoro koula,+ na teveli+ e toka kina na madrai dauraici,+
20 na itutu ni cina kei na cina e koula dina,+ me waqa ena mata ni rumu sara e loma me vaka na kena ivakaro,
21 na senikau, na cina, kei na iqamu ni vauvau ni cina e koula, na koula dina,
22 na ikotinivauvau ni cina, na boulu, na bilo, na itawatawa ni bukawaqa e koula dina, na matamata ni vale, na katuba ni Loqi Tabu Sara,+ kei na katuba ni valenisoro, e koula.+
