Aisea 66:1-24
66 Qo na ka e kaya o Jiova:
“Na noqu itikotiko vakaturaga o lomalagi, ia o vuravura na itutuniyavaqu.+
I vei gona na vale oni tara me noqu,+I vei na noqu ivakavakacegu?”+
2 “Na ligaqu e bulia na ka kece qo,Era bula rawa kina,” e kaya o Jiova.+
“Au na golevi koya qo,O koya e yalomalumalumu qai vusolo na lomana, e rerevaka na noqu vosa.+
3 O koya e vakamatea na bulumakau tagane e vakataki koya e vakamatea na tamata.+
O koya e cabora na sipi e vakataki koya e taya na domo ni koli.+
O koya e cabora na isolisoli e vaka e cabora na dra ni vuaka!+
O koya e cabora na drega boivinaka+ me ivakananumi e vakataki koya e cavuta na veivakalougatataki ena vosa vuni.*+
Era digia ga na sala mera muria,Era taleitaka na ka vakasisila.
4 Au na digia na ka mera totogitaki kina,+Na ka sara ga era domobulataka au na vakayacora vei ira,Niu kaci e sega ni dua e sauma mai,Niu vosa e sega ni dua e rogoca.+
Era vakayacora tiko ga na ka ca e mataqu,Era digia na ka au sega ni taleitaka.”+
5 Moni rogoca na ka e tukuna o Jiova o kemuni na rerevaka na nona vosa:
“Era cati kemuni na tacimuni, era tawasei kemuni ena vuku ni yacaqu, era kaya, ‘Me vakalagilagi o Jiova!’+
Ia ena rairai mai o koya moni marau kina,Era na vakamaduataki o ira qori.”+
6 E rogo na ue mai na koro, e rogo mai na valenisoro!
Na domo ni nona sauma o Jiova na ka e ganiti ira na kena meca.
7 Ni bera ni taratara o koya, sa vakasucu.+
Ni bera ni vutu, sa vakasucuma e dua na gonetagane.
8 O cei e bau rogoca na ka va qo?
O cei e raica na ka va qori?
Ena sucu e dua na vanua ena dua ga na siga?
Se sucu e dua na matanitu ena dua ga na gauna?
Ia ni taratara ga o Saioni, e vakasucumi ira sara na luvena.
9 “Meu dolava na katonigone au qai tarova na vakasucu?” e kaya o Jiova.
“Seu vakavuna na vakasucu au qai sogota na katonigone?” e kaya na nomu Kalou.
10 Moni marau vata kei Jerusalemi, moni reki vata kei koya+ o kemuni kece na lomani koya.+
Moni marau vakalevu vata kei koya o kemuni na tagicaki koya tiko,
11 Ni oni na sucuma na sucuna dau veivakacegui moni mamau kina,Oni na gunuva vakalevu, oni na marautaka na levu ni nona lagilagi.
12 Qo na ka e tukuna o Jiova:
“Au na vakalevutaka na nona vakacegu me vaka na uciwai+
Kei na nodra lagilagi na veimatanitu me vaka na dave ni wai.+
Oni na sucu, oni na keve e dibina,Oni na tene e duruna.
13 Me vaka e dua na gonetagane e vakaceguya o tinana,Au na vakacegui kemuni tiko ga.+
Oni na vakacegui ena vuku i Jerusalemi.+
14 Oni na raica qo, ena reki na lomamuni,Ena bulabula na suimuni me vaka na co vou.
Ena kilai na liga* i Jiova vei ira na nona tamata,Ia ena cudruvi ira na kena meca.”+
15 “Ni na lako mai o Jiova me vaka na bukawaqa,+Kei na nona qiqinivalu me vaka na cagi kaukaua,+Me veisausaumi ena cudru waqawaqa,Me veivunauci ena yameyame ni bukawaqa.+
16 Ni na vakataulewa o Jiova ena bukawaqa,Io ena nona iseleiwau, me vakamatei ira kece na tamataEna levu sara e vakamatea o Jiova.
17 “O ira na vakatabui ira tiko, era vakasavasavataki ira mera lako ina basenikau*+ nira muria e dua e toka e lomadonu, o ira na kania na lewe ni vuaka,+ na ka vakasisila kei na kalavo,+ era na rusa kece,” e kaya o Jiova.
18 “Niu kila na nodra cakacaka kei na nodra nanuma, au na lako yani meu kumuni ira kece na lewe ni veimatanitu kei na duivosavosa, era na lako mai mera raica na noqu lagilagi.”
19 “Au na vakarautaka vei ira e dua na ivakatakilakila, au na tala eso vei ira na dro ina veimatanitu, i Tasisi,+ i Puli, i Luti,+ o ira na loveca na dakaititi, i Tupali kei Javana,+ na veiyanuyanu tu yawa era se sega ni rogoca na kequ itukutuku se raica na noqu lagilagi, era na tukuna na noqu lagilagi ina veimatanitu.+
20 Era na kauti ira kece mai na tacimuni mai na matanitu kece+ mera iloloma vei Jiova, ena ose, ena qiqi, ena kareti vakaiubi, ena meule, kei na kameli totolo, mera lako cake ina noqu ulunivanua tabu o Jerusalemi,” e kaya o Jiova, “me vaka na nodra kauta mai na lewe i Isireli na nodra iloloma ena itawatawa savasava ina vale i Jiova.”
21 “Au na kauta tale ga eso me nodra na bete, eso tale me nodra na Livai,” e kaya o Jiova.
22 “Me vaka ni na tu ga e mataqu na lomalagi vou kei na vuravura vou+ au cakava,” e kaya o Jiova, “era na tu tale ga na luvemuni* kei na yacamuni.”+
23 “Mai na vula vou ina vula vou, mai na Siga ni Vakacecegu ina Siga ni Vakacecegu,Era na lako mai na tamata kece mera cuva e mataqu,”*+ e kaya o Jiova.
24 “Era na lako yani mera raica na yagodra mate na tamata era talaidredre vei au,Ni na sega ni mate na kedra ulo,Ena sega ni boko na kedra buka,+Era na vakasisilataka na tamata kece.”
iVakamacala e ra
^ Se rawa ni, “vakacaucautaka na matakau.”
^ Se “na kaukaua.”
^ Oya na basenikau duatani e qaravi kina na matakau.
^ Ipe., “kawa.”
^ Se “mera qaravi au.”
