Nodra Cakacaka na Yapositolo 14:1-28
14 Ni rau tiko mai Ikoniona o Paula kei Panapasa erau curu sara ina nodra valenilotu na Jiu me rau vunau. Na momona ni ka erau tukuna era lai vakabauta kina e levu na Jiu kei na kai Kirisi.
2 Ia o ira na Jiu era sega ni vakabauta era vakaucaca ra qai rawai ira na lewe ni veimatanitu mera saqati ira na veitacini.+
3 E mani dede toka kina nodrau vakamacala ena doudou ena vuku ni lewa i Jiova,* o koya e vakadinadinataka na vosa ni nona loloma soli wale, qai solia me rau cakamana, me rau cakava tale ga eso na ka e veivakurabuitaki.+
4 Era tawase e dua na ilala levu ena koro, so era vakabauti ira na Jiu, so era vakabauti rau na yapositolo.
5 Nira saga na lewe ni veimatanitu, o ira na Jiu, kei ira na nodra iliuliu mera cakava vei rau eso na ka mera vakamadualaki rau kina, mera vakaviriki rau tale ga ena vatu,+
6 erau qai rogoca na yapositolo rau mani dro sara ina koro o Lisitira kei Tapi mai Likeonia, kei na vanua volekata.+
7 Rau vunautaka tale ga kina na itukutuku vinaka.
8 E tiko e Lisitira e dua na tagane sa dabe tu ga ni lokiloki na yavana, se sega vakadua ni lako ni sucu lokiloki.
9 E vakarogoci Paula na tagane qo ni vakamacala tiko. E wanonovi koya o Paula, e raica vua na vakabauta e ganita me vakabulai kina,+
10 mani kaya ena domoilevu: “Tucake e yavamu.” E lade na tagane, e lako sara.+
11 Nira raica na lewenivanua na ka e cakava o Paula, era qai kailavaka yani ena vosa vakaLikeonia: “Era sa rairai mai vakatamata na kalou, era sa lako sobu mai vei keda!”+
12 Era mani vakatokai Panapasa me o Seusi,* o Paula me o Eremesi* ni nodrau daunivosa tiko.
13 Na bete i Seusi tale ga, e toka na nona valenisoro ena matamatanikoro, e kauta yani eso na bulumakau tagane kei na salusalu ina matamatanikoro ni via vakacaboisoro vata kei ira na lewenivanua.
14 Ia ni rau rogoca qo na yapositolo, o Panapasa kei Paula, erau dresulaka nodrau isulu qai cici yani vei ira na lewenivanua, erau kacivaka:
15 “Kemuni na veiwekani, na cava oni cakava? Keirau tamata ga, keirau malumalumu ga me vakataki kemuni.+ Keirau vunautaka tiko vei kemuni na itukutuku vinaka moni vakanadakuya kina na veika matewale qo, moni qarava ga na Kalou bula e bulia na lomalagi, na vuravura, na wasawasa, kei na ka kece e tu kina.+
16 Ena veitabatamata sa oti, a vakatarai ira na veimatanitu kece mera cakava na ka ga era vinakata,+
17 ia e laurai votu na ivakadinadina+ ni nona caka vinaka tiko ga, e vakatauca vei kemuni na uca mai lomalagi, e solia na gauna vinaka ni tatamusuki,+ e vakamamautaki kemuni ena kakana kei na lomamuni ena marau.”+
18 Ni rau cavuta oti na vosa ya, sa qai dredre ga me rau tarova na nodra via vakacaboisoro vei rau na ilala levu qo.
19 Ia era sa qai yaco mai na Jiu mai Anitioki kei Ikoniona. Era bukani ira na ilala levu ya,+ ra mani vakaviriki Paula ena vatu ra yarataki koya ina taudaku ni koro, nira nanuma ni sa mate.+
20 Nira sa wavokiti koya na tisaipeli, e tucake qai lako ina koro. Ena siga tarava e mani gole kei Panapasa i Tapi.+
21 Ni rau vunautaka oti na itukutuku vinaka ena koro ya, rau vukea tale ga eso mera tisaipeli, rau mani lesu i Lisitira, Ikoniona, kei Anitioki.
22 Erau vakayaloqaqataki ira na tisaipeli,+ rau vakauqeti ira mera dei tiko ga ena vakabauta, rau qai kaya: “Eda na vakararawataki mada vakalevu, eda na qai curu ina Matanitu ni Kalou.”+
23 Erau sa qai lesia eso na qase ena ivavakoso yadua,+ erau masu rau lolo,+ erau sa qai tataunaki ira vei Jiova,* o koya era sa mai vakabauta.
24 Erau muria yani na sala i Pisitia, rau yaco sara i Pamifilia,+
25 ni rau vunautaka oti na vosa ni Kalou e Perika, erau gole sobu sara i Atalia.
26 Mai kea, erau soko sara i Anitioki, na vanua erau a taura mada yani kina na nodrau ilesilesi ena loloma soli wale ni Kalou, na ilesilesi erau sa mai vakacavara vakavinaka.+
27 Ni rau yaco yani i kea, erau kumuni ira vata na lewe ni ivavakoso rau qai talanoataka vei ira na veika e cakava na Kalou ena vukudrau, kei na nona dolava na katuba ni vakabauta vei ira na veimatanitu.+
28 O koya gona, e dede toka na gauna erau tiko vata kina kei ira na tisaipeli.
