Dauveilewai 14:1-20
14 E lako sobu sara i Timinaca o Samisoni, e raica e Timinaca e dua na yalewa* ni Filisitia.
2 E mani lako cake me tukuna vei tamana kei tinana: “Au raica e dua na yalewa ni Filisitia mai Timinaca, au vinakata mo drau lai kauta mai me watiqu.”
3 Ia erau kaya vua o tamana kei tinana: “Sa sega na yalewa vei ira na wekamu kei ira kece na kainoda?+ Mo lai kauta mai kina na watimu vei ira na kai Filisitia sega ni cili?” Ia e kaya vei tamana o Samisoni: “Mo kauti koya mai vei au ni donu vei au.”*
4 Erau sega ni kila o tamana kei tinana ni vakavuna qori o Jiova, ni qara tiko o koya e dua na gauna vinaka me valuti Filisitia kina, nira liutaki ira tiko na Isireli na kai Filisitia ena gauna oya.+
5 E lako sobu sara i Timinaca o Samisoni kei rau na tamana kei na tinana. Ni yaco ena loganivaini e Timinaca, kemudou! e tagi yani vua e dua na laione.*
6 E qai vakaukauataki koya na yalo i Jiova+ mani basuka rua na laione me vaka ga na nona basuka rua na luvenime e dua e ligana. Ia e sega ni tukuna vei tamana kei tinana na ka e cakava.
7 E lako sobu sara me vosa vua na yalewa, se donu tiko ga e matai Samisoni na yalewa qori.+
8 Oti ni lesu tiko me kauti yalewa i vale,+ e lako vakatikitiki me raica na yago ni laione mate, sa tu ena yago ni laione na qelenioni kei na denioni.
9 E karia sara na denioni me biuta e ligana, e kania ni lako tiko. Ni lesu vei tamana kei tinana e solia sara vei rau eso me rau kania. Ia e sega ni tukuna vei rau ni karia mai na denioni ena yago ni laione.
10 E lako sobu vua na yalewa o tamana, e vakarautaka sara e kea o Samisoni e dua na kanavata, qori na ka era dau vakayacora na cauravou.
11 Nira raici koya ga era kauta sara yani e 30 na tagane mera nona itokani, mera tiko vata kei koya.
12 E qai kaya vei ira o Samisoni: “Meu tukuna mada vei kemuni e dua na vatavatairalago. Ke oni kila oni qai tukuna vei au na kena ibalebale ena loma ni vitu na siga ni kanavata, au na solia vei kemuni e 30 na isulu lineni kei na 30 na isulu me tokari.
13 Ia ke oni sega ni tukuna rawa vei au na kena ibalebale, moni solia vei au e 30 na isulu lineni kei na 30 na isulu me tokari.” Era kaya sara vua: “Tukuna mai na nomu vatavatairalago, keimami via rogoca.”
14 E kaya vei ira:
“E basika na ka me laukana vei koya na daukana,E basika na ka kamikamica vei koya e kaukaua.”+
Era sega ni kila rawa na ibalebale ni vatavatairalago me tolu na siga.
15 Ena ikava ni siga era tukuna vei wati Samisoni: “Mo dabuitaki watimu+ me tukuna vei keimami na ibalebale ni vatavatairalago. Ke sega keimami na vakamai iko kei na vuvale i tamamu ena bukawaqa. Vakacava, dou sureti keimami ga mai eke mo dou taura na ka keimami taukena?”
16 E tagi sara vei Samisoni na watina, e kaya: “O sega ni taleitaki au, o sega ni lomani au.+ O tukuna vei ira na kainoqu e dua na vatavatairalago, o sega mada ga ni tukuna vei au na kena ibalebale.” E kaya sara vua o Samisoni: “Ae, au sega mada ga ni tukuna vei tamaqu kei tinaqu! Na cava meu tukuna kina vei iko?”
17 Ia e tagi tiko ga vua ena loma ni vitu na siga ni kanavata. E qai tukuna vua o Samisoni ena ikavitu ni siga ni sa rui vakasosani koya. E mani tukuna vei ira na kainona na ibalebale ni vatavatairalago.+
18 Ena ikavitu ni siga ni bera ni dromu na matanisiga* era qai tukuna vua na lewenikoro:
“Na cava e uasivia na kamikamica ni denioni,Na cava e kaukaua vua na laione?”+
E kaya sara vei ira o Samisoni:
“Ke oni sega ni siviyara ena noqu luvenibulumakau yalewa,*+Oni na sega ni kila na ibalebale ni noqu vatavatairalago.”
19 E qai vakaukauataki koya na yalo i Jiova,+ e lako sobu sara i Asikiloni+ qai vakamatea e 30 na nodra tagane, e luvata na nodra isulu me solia vei ira na tukuna na ibalebale ni vatavatairalago.+ E cudru katakata ni lesu tiko ina vale i tamana.
20 E soli sara na wati Samisoni+ vua e dua ga na nona itokani erau dau tiko vata.+
iVakamacala e ra
^ Ipe., “dua na yalewa na luvedra na kai Filisitia.”
^ Ipe., “donu e mataqu.”
^ Se “luvenilaione kaukaua.”
^ Se rawa ni, “bera ni curu o Samisoni ina rumu e loma.”
^ Oya nira cikevi watina.
