Dauveilewai 16:1-31
16 Dua na gauna e lako i Kesa o Samisoni, e raica e dua na saqamua mani lako vua.
2 E tukuni vei ira na lewe i Kesa: “A lako mai ke o Samisoni.” Era mani wavokiti koya, era waraki koya tiko ena matamatanikoro ena bogi taucoko. Era vakanomodi voli ena bogi taucoko, era kaya: “Ni kida ga na mataka eda na vakamatei koya.”
3 Ia e davo toka ga e kea o Samisoni me bogilevu tutu. Ni sa bogilevu tutu e duri mai, e taura na katuba ruarua ni matamatanikoro kei na kena duru ruarua e sau qai cavuta vata na kena ivakadei. E biuta e tabana qai colata ina ulunivanua donui Epironi.
4 Oti oya e domona o Samisoni e dua na yalewa e tiko ena Buca* o Soreki, na yacana o Tilaila.+
5 Era lako yani vua na turaga ni Filisitia, era kaya: “Dabui* koya+ mada mo kila na vu ni nona kaukaua levu, na cava me keimami cakava me keimami rawati koya kina, me keimami vesuki koya me vakamalumalumutaki koya. Keimami na qai solia yadudua vei iko e 1,100 na tikinisiliva.”
6 Oti e kaya vei Samisoni o Tilaila: “Yalovinaka, tukuna mada vei au na vu ni nomu kaukaua levu, na cava tale ga mo vesu kina me vakamalumalumutaki iko.”
7 E kaya vua o Samisoni: “Ke ra vesuki au ena vitu na wa ni dakaititi* vou e sega ni sigani, au na malumalumu me vaka ga na tamata wale.”
8 Era mani kauta cake vei Tilaila na turaga ni Filisitia e vitu na wa ni dakaititi vou e sega ni sigani qai vesuki koya kina.
9 Ia era toka vuni eso ena rumu e loma, e kaci yani vei Samisoni o Tilaila: “Era sa mai vesuki iko na kai Filisitia Samisoni!” E qai drutia o koya na wa ni dakaititi me vaka ga na tasere totolo ni wa feleki ni tara na bukawaqa.+ E sega ni kilai na vu ni nona kaukaua.
10 E kaya sara vei Samisoni o Tilaila: “Raica! O sa vakaisini au, o lasutaki au. Ia qo mo tukuna mada vei au na ka mo vesu kina.”
11 E kaya vua o Samisoni: “Ke ra vesuki au ena dali vou se bera ni vakayagataki, au na malumalumu me vaka ga na tamata wale.”
12 E kauta sara na dali vou o Tilaila qai vesuki koya kina, e kacivaka: “Era sa mai vesuki iko na kai Filisitia, Samisoni!” (Era toka vuni ga eso ena rumu e loma.) E qai drutia o Samisoni na dali mai ligana me vaka ga na waniculacula.+
13 Oti oya e kaya vei Samisoni o Tilaila: “O se vakaisini au tiko ga me yacova mai qo, o lasutaki au.+ Mo tukuna vei au na ka mo vesu kina.” E qai tukuna o Samisoni: “Mo talia vata na wa* ni isulutali kei na tobe vituvitu ni uluqu.”
14 E vakadreta sara ena pini, oti e kaya vua: “Era sa mai vesuki iko na kai Filisitia Samisoni!” E yadra mai ena moce qai dreta laivi na pini kei na wa ni isulutali.
15 E kaya sara vua o Tilaila: “O kaya vakacava, ‘Au domoni iko,’+ ni sega ni dina vei au na lomamu? O sa vakaisini au vakatolu, o se sega ga ni tukuna vei au na vu ni nomu kaukaua levu.”+
16 E cikevi koya tiko ga e veisiga, e vakasosani koya tiko ga, sa sega ni vosota rawa o Samisoni, e via mate sara ga.+
17 Oti sa qai talaucaka vua na lomana, e kaya: “Se sega vakadua ni tasi na uluqu niu Nasaraiti ni Kalou ena gauna au sucu kina.*+ Niu tasi ga sa na oti na noqu kaukaua, au na malumalumu qai tautauvata kei na vo ni tamata kece.”
18 Ni raica o Tilaila ni sa talaucaka kece vua na lomana, e talatala sara mera kacivi mai na turaga ni Filisitia,+ e kaya: “Moni lako mai ena gauna qo ni sa talaucaka kece vei au na lomana.” Era mani lako cake vua na turaga ni Filisitia nira kauta tiko na ilavo.
19 E vakamoceri Samisoni e duruna o Tilaila qai kaciva mai na tamata me tasia na vitu na tobe ni uluna. Oti oya e rawai Samisoni o Tilaila, ni sa oti yani na nona kaukaua.
20 E kacivaka o Tilaila: “Era sa mai vesuki iko na kai Filisitia Samisoni!” E yadra mai na moce o Samisoni, e kaya sara: “Au na lako yani me vaka au dau cakava+ meu veimoqeyaki meu sereki au.” Ia e sega ni kila ni sa biuti koya o Jiova.
21 Era vesuki koya sara na kai Filisitia, era ceuta na yalokanimatana. Era kauti koya sobu i Kesa ra qai vesuki koya ena rua na ivesu kopa. E dau qaqi covuata e valeniveivesu o koya.
22 Ia sa tekivu tubu tale na drauniuluna ena gauna e tasi oti kina.+
23 Era soqoni vata na nodra turaga na kai Filisitia mera cabora e dua na isoro levu vei Tekoni+ na nodra kalou, mera marau tale ga, era kaya: “Sa solia e ligada na noda kalou na keda meca o Samisoni!”
24 Nira raici koya na tamata era vakacaucautaka na nodra kalou, era kaya: “Sa solia e ligada na noda kalou na keda meca e dau vakacacana na noda vanua,+ e vakamatea tale ga e levu vei keda.”+
25 Ni marau tiko na lomadra, era kaya sara: “Kacivi Samisoni mai me vakalasai keda.” Era qai kacivi Samisoni mai valeniveivesu me vakadredrei ira, era vakaduri koya ena maliwa ni duru.
26 E kaya sara o Samisoni vua na gonetagane e taura tiko na ligana: “Laivi au mada meu tara na duru e taura tu na vale, meu ravita.”
27 (Ia era osodrigi tu e lomanivale na tagane kei na yalewa. Era tiko kece e kea na nodra turaga na kai Filisitia, era le 3,000 na tagane kei na yalewa era sarasara tiko mai delanivale ni vakalasalasa tiko o Samisoni.)
28 E masuti Jiova sara o Samisoni:+ “Kemuni na Turaga Cecere Duadua Jiova, yalovinaka moni nanumi au, yalovinaka moni vakaukauataki au+ tale mada kemuni na Kalou, meu sauma vei ira na kai Filisitia na ka era cakava ena dua mada ga na mataqu.”+
29 E tautauri vinaka o Samisoni ena rua na duru e lomadonu e taura tu na vale, e ravita, e dua ena ligana imatau e dua tale ena ligana imawi.
30 E kacivaka o Samisoni: “Meu mate vata kei ira na kai Filisitia!” E qai biliga na duru ena nona igu taucoko, e mani lutuki ira na turaga kei ira kece na tiko e kea na vale.+ E levu sara e vakamatea o Samisoni ena gauna e mate kina, e lailai e vakamatea ena gauna se bula kina.+
31 Oti era lako sobu na tacina kei ira kece na lewe ni vuvale i tamana. Era kauti koya cake mera buluti koya ena maliwa kei Sora+ kei Esitaoli ena ibulubulu i Manoa+ na tamana. A lewai ira na Isireli o Samisoni me 20 na yabaki.+
iVakamacala e ra
^ Se “Waimaca.”
^ Se “Mari.”
^ Se “ua ni saga ni manumanu.”
^ Se “wa vakadodonu.”
^ Ipe., “mai na katonigone i tinaqu.”
