Dauveilewai 19:1-30
-
Ra kucu mai Kipea na Penijamini (1-30)
19 Ena gauna oya ni sega na tui e Isireli,+ e vakaitikotiko e dua na Livai ena vanua yawa ena veiulunivanua e Ifireimi+ ena gauna oya, e kauta sara e dua na yalewa mai Peceliema+ e Juta me watina lailai.
2 Ia e sega ni yalodina o watina lailai, e biuti koya sara o yalewa me lako ina vale nei tamana e Peceliema e Juta. E tiko e kea me va na vula.
3 E qai muri koya o watina me vakamasuti koya me lesu, e tomani koya na nona dauveiqaravi tagane kei na rua na asa. E vakacurumi koya sara o yalewa ina vale nei tamana. Ni raici koya o tamai yalewa e marau sara ga ni rau sota.
4 E uqeti koya o vugona, qo o tamai goneyalewa, me tiko vata kei koya me tolu na siga, eratou kana, eratou gunu, e moce tale ga e kea ena bogi.
5 Ena ikava ni siga ni ratou yadra vakamataka me ratou lako, e kaya vei vugona o tamai goneyalewa: “Mo kana mada mo kaukaua, dou qai lako.”
6 Erau dabe sara, erau kana erau gunu, oti oya e tukuna o tamai goneyalewa vei tagane: “Yalovinaka, mo moce tale ena bogi nikua, mo marau.”*
7 Ni tucake na tagane me lako, e cikevi koya tiko ga o vugona mani moce tale ena bogi oya.
8 Ni yadra vakamataka ena ikalima ni siga me lako, e kaya sara o tamai goneyalewa: “Yalovinaka, mo kana mada mo kaukaua.” Erau toka ga me yacova na yakavi. Erau kana tiko ga.
9 Ni tucake na tagane me lako vata kei watina lailai kei na nona dauveiqaravi, e kaya vei koya o tamai goneyalewa: “Raica! Sa voleka na yakavi. Au kerea mo dou moce tale. Sa vakarau cava na siga. Mo tiko eke ena bogi nikua, mo marau. Mo dou yadra vakamataka nimataka dou qai lako i nomu vale.”*
10 Ia e sega ni via tiko tale na tagane, e tucake me lako yani me yaco sara i Jepusa, oya o Jerusalemi.+ E tomani koya tiko e rua na asa vakaidabedabe, na watina lailai, kei na nona dauveiqaravi.
11 Ni ratou volekati Jepusa yani se rarama tiko ga na vanua. E kaya sara na dauveiqaravi vua na nona turaga: “Vakacava, me datou cegu ena nodra koro na Jepusaiti, me tou moce eke?”
12 Ia e kaya vua na nona turaga: “Me tou kua ni cegu ena dua na nodra koro na kaitani era sega ni Isireli. Me tou lako tiko ga me yaco sara i Kipea.”+
13 E kaya tale vua na nona dauveiqaravi: “Tou lako, tou saga me datou yaco ina dua na vanua qori, tou na moce e Kipea se i Rama.”+
14 Eratou lako tiko sa qai dromu na siga ni ratou volekati Kipea, e nodra na Penijamini.
15 Eratou cegu e kea, ratou gole i loma me ratou moce e Kipea. Ni ratou curu i loma, eratou lai dabe sara ena vanua ni wawa ena koro, ia e sega ni dua e kauti ratou i vale me ratou moce kina.+
16 E lesu tiko mai na nona cakacaka ena were e dua na kenaturaga ni sa yakavi. E turaga ni veiulunivanua e Ifireimi,+ sa dede na nona vakaitikotiko e Kipea, ia era Penijamini na lewenikoro oya.+
17 Ni tacake e raica sara na vulagi ena vanua ni wawa ena koro, e kaya na kenaturaga: “O lako tiko i vei, o lako mai vei?”
18 E kaya vua: “Keitou lako mai Peceliema e Juta me keitou lako ina vanua yawa ena veiulunivanua e Ifireimi, na noqu vanua. Au a lako i Peceliema e Juta,+ au lako tiko ina vale i Jiova,* ia e sega ni dua e kauti au ina nona vale.
19 E tiko qo na tolonicovuata madu kei na kedrau na asa,+ na madrai+ kei na waini me rauti au, na yalewa, kei na neirau dauveiqaravi. E sega ni vo e dua na ka.”
20 Ia e kaya na kenaturaga: “Mo vakacegu! Ena qai noqu itavi na ka e sega vei kemudou. Dou kua ga ni moce ena vanua ni wawa ena koro.”
21 E mani kauti koya ina nona vale, e solia na kena* na asa. Eratou savuya sara na yavadratou, eratou kana eratou gunu.
22 Ni ratou marau tiko, era sa wavokita na vale eso na tagane macawa ni koro, era tukia na katuba, era kaya tiko ga vua na kenaturaga na itaukeinivale: “Kauta mai tuba na tagane e lako mai ina nomu vale me keimami veiyacovi.”+
23 E curu i tuba na itaukeinivale, e kaya vei ira: “Sega kemuni na taciqu, moni kua ni vakayacora na ka ca qo. Yalovinaka, e vulagi na tagane qo ena noqu vale. Ni kua sara ni vakayacora na ka vakamadua qo.
24 E tiko qo na luvequ goneyalewa kei na watina lailai na tagane qo. Meu kauti rau mada mai moni vakamadualaki rau ke oni vinakata.*+ Ia moni kua ni vakayacora vua na tagane qo na ka vakamadua qori.”
25 Ia era sega ga ni via rogoci koya na tagane qori, e taura sara na Livai na watina lailai,+ e kauta vei ira i tuba. Era qai kucuvi koya, era vakacacani koya tiko ena bogi taucoko me yacova na mataka. Oti era qai vakatalai koya ni sa kida na mataka.
26 E lako sara yani na yalewa ni sa mataka qai bale ena nona mata ni katuba na tagane e tiko kina na nona turaga, e davo toka ga e kea me yacova na rarama.
27 Ni duri ena mataka na nona turaga me dolava na katuba me tomana na nona ilakolako, e raica sara na yalewa na watina lailai ni sa davo tu ena katuba ni vale, e toka na ligana ena ilago.
28 E kaya vua: “Duri, me datou lako.” Ia e sega ni sauma mai. E mani vakavodoki koya na tagane ena asa me lako yani ina nona vale.
29 Ni yaco ina nona vale, e kauta mai na isele,* e taura mai na watina lailai, e musuka na ligana kei na yavana qai musumusuka me 12 na tikina qai vakauta e yadua na tikina ina nodra dui vanua na Isireli.
30 Era kaya kece na raica: “Se sega vakadua ni vakayacori se laurai qo ena siga era biuta mai kina na Isireli na vanua o Ijipita me yacova na siga qo. Moni vakasamataka,* ni veivosakitaka,+ ni tukuna na nomuni nanuma.”
iVakamacala e ra
^ Se “me marau na lomamu.”
^ Ipe., “valelaca.”
^ Se rawa ni, “au veiqaravi ena vale i Jiova.”
^ Se “solia na kedra kakana veiwaki na manumanu.”
^ Se “moni vakacacani rau, moni vakayacora vei rau na ka e vinaka e matamuni.”
^ Se “isele ni vakamate manumanu.”
^ Se “Moni tugana e lomamuni.”
