Dauveilewai 21:1-25
-
Ra vakabulai vakayavusa na Penijamini (1-25)
21 Era bubuluitaka qo na Isireli e Misipa:+ “Ena sega ni dua vei keda ena solia na luvena yalewa vua e dua na tagane ni Penijamini me watina.”+
2 Era mani lako i Peceli+ na tamata, era dabe e kea ena mata ni Kalou dina me yacova na yakavi, era tagi, era tagilagalaga.
3 Era kaya: “Kemuni Jiova na Kalou ni Isireli, na cava me yaco kina qo e Isireli? Na cava me yali kina nikua e Isireli e dua na yavusa?”
4 Era yadra sara vakamataka na tamata ena siga e tarava, era tara e kea e dua na icabocabonisoro mera cabora kina na isoro kama kei na isoro ni veiyaloni.+
5 Era qai kaya na Isireli: “O cei ena yavusa kece e Isireli e sega ni lako cake mai mera soqoni ena mata i Jiova?” nira sa vakayacora oti e dua na bubului bibi oya me vakamatei sara ga o koya e sega ni lako cake vei Jiova e Misipa.
6 Era rarawataka sara ga na Isireli na ka e yacovi Penijamini na wekadra. Era kaya: “Nikua sa muduki tani e Isireli e dua na yavusa.
7 Na cava meda cakava mera vakawati kina na kena vo, nida sa bubuluitaka oti vei Jiova+ meda kua ni solia vei ira na luveda yalewa me watidra?”+
8 Era taroga: “O cei ena yavusa e Isireli e sega ni lako cake vei Jiova e Misipa?”+ E sega ni dua e lako mai Jepesikiliati ina keba e tiko kina na ivavakoso.
9 Ena gauna era wiliki kina na tamata, era raica ni sega ni dua na lewe i Jepesikiliati e tiko e kea.
10 Era mani tala e kea na isoqosoqo e 12,000 na tamata qaqa sara. Era vakaroti ira: “Moni lako moni ravuti ira na lewe i Jepesikiliati ena iseleiwau, o ira tale ga na yalewa kei ira na gone.+
11 Qo na ka moni cakava: Moni vakamatei ira kece na tagane kei ira kece na yalewa era veiyacovi kei na tagane.”
12 Ia era raica e Jepesikiliati e 400 na goneyalewa era se sega ni veiyacovi kei na tagane. Era kauti ira yani ena keba e Sailo+ ena vanua o Kenani.
13 Era qai vakauitukutuku na isoqosoqo taucoko vei ira na Penijamini era tiko ena vatu mai Rimoni+ me tukuni vei ira mera veiyaloni.
14 Era lesu sara na Penijamini ena gauna oya. Era solia vei ira na yalewa ni Jepesikiliati+ era vakabula, ia e sega ni rauti ira.
15 Era rarawataka na tamata na ka e yacovi ira na Penijamini+ ni wasei ira na yavusa e Isireli o Jiova.
16 Era kaya na qase ni isoqosoqo: “Na cava meda cakava vei ira na vo ni tagane e sega na watidra, nira sa vakawabokotaki na nodra yalewa kece na Penijamini?”
17 Era sauma: “Me dua na nodra ivotavota na Penijamini era bula, me kua kina ni kawaboko e dua na yavusa e Isireli.
18 Ia e tabu meda solia na luveda yalewa me watidra nira sa bubuluitaka oti na Isireli, ‘Ena kalouca o koya e solia na yalewa me watina na Penijamini.’”+
19 Era qai kaya: “Raica! E dau caka e veiyabaki e dua na soqo vei Jiova e Sailo,+ ena vualiku kei Peceli donuya na tokalau ni gaunisala levu e gole cake mai Peceli i Sikemi e qara ina ceva kei Lipona.”
20 Era vakaroti ira sara na Penijamini: “Moni lai toka vuni ena loganivaini.
21 Ena gauna ga oni raici ira kina na goneyalewa ni Sailo nira meke wavoki, moni biuta na loganivaini moni tauri ira na goneyalewa ni Sailo me watimuni, moni qai lesu ina nodra vanua na Penijamini.
22 Nira kudruvaki keimami na tamadra se ganedra, keimami na kaya vei ira, ‘Moni lomani keimami ena vukudra, ni keimami sega ni vakarautaka rawa e yadua na watidra e kau mai na ivalu,+ oni na cala tale ga ni oni sega ni solia na watidra.’”+
23 Era mani vakayacora qori na Penijamini, era dui kauta mai na watidra vei ira na yalewa era meke tiko. Oti oya era lesu ina nodra ivotavota, era tara tale na nodra koro+ mera tiko kina.
24 Era biubiu sara mai kea ena gauna qori na Isireli mera dui lako ina nodra yavusa kei na nodra vuvale, era biubiu mai kea mera dui lako ina nodra ivotavota.
25 E sega na tui e Isireli ena gauna oya.+ Era vakayacora ga na ka e donu e matadra.*
iVakamacala e ra
^ Se “na ka era nanuma ni donu.”
