Esera 1:1-11
1 Ena imatai ni yabaki i Tui Sairusi+ e Perisia, me vakayacori na vosa i Jiova ena gusu i Jeremaia,+ e uqeta o Jiova na loma i Tui Sairusi e Perisia me kacivaki e dua na ivakaro ena nona matanitu taucoko, me vola+ tale ga:
2 “Qo na ka e tukuna o Tui Sairusi e Perisia, ‘Sa solia vei au o Jiova na Kalou ni lomalagi na matanitu kece e vuravura,+ e lesi au tale ga meu tara e dua na nona vale e Jerusalemi,+ e Juta.
3 O koya ga e maliwai ira tiko na nona tamata kece, me tokoni koya mada ga na nona Kalou, me lako cake i Jerusalemi oya e Juta, me tara tale na vale i Jiova na Kalou ni Isireli, e Kalou dina o koya, e tiko e Jerusalemi na nona vale.*
4 O koya e tiko vulagi+ ena vanua cava ga e tiko kina, mera tokoni koya na wekana* nira solia vua na siliva kei na koula, na iyau kei na manumanu, kei na isolisoli me baleta na vale ni Kalou dina+ a tiko e Jerusalemi.’”
5 Era qai vakarau na turaga ni mataqali nei tamadra na Juta kei Penijamini, o ira na bete kei ira na Livai, o ira kece e uqeta na lomadra na Kalou dina, mera lako cake mera tara tale na vale i Jiova a tiko e Jerusalemi.
6 O ira kece na tiko volekati ira era tokoni ira nira solia vei ira na iyaya siliva kei na koula, na iyau, na manumanu, kei na veika talei, me ikuri ni nodra cau.*
7 E kauta tale ga mai o Tui Sairusi na iyaya ni vale i Jiova a kauta mai Jerusalemi o Nepukanesa qai biuta ena vale ni nona kalou.+
8 E lesi Miciritaci na dauniyau o Tui Sairusi na tui Perisia me kauta mai qai wilika na kena levu me soli vei Sesipasa*+ na turaga e Juta.
9 Qo na kedra levu: e 30 na dari koula e vaka na basikete, e 1,000 na dari siliva e vaka na basikete, e 29 na kena isosomi,
10 e 30 na boulu koula lalai, e 410 na boulu siliva lalai, e 1,000 na iyaya tale eso.
11 E 5,400 kece na iyaya koula kei na iyaya siliva. Qori kece na ka e kauta cake o Sesipasa, ni kauti ira i Jerusalemi na vesu tu+ mai Papiloni.
iVakamacala e ra
^ Se rawa ni, “e tiko mai Jerusalemi.”
^ Ipe., “o ira na tiko ena nona vanua.”
^ Ipe., “isolisoli sega ni lavaki.”
