Esiteri 6:1-14
-
Rokovi Motekai na tui (1-14)
6 E sega ni moce rawa na tui* ena bogi oya. E mani kaya me kau mai na ivola ni itukutuku ni gauna oya,+ e mai wiliki sara vua na tui.
2 E laurai ni volai tu kina na ka e tukuna o Motekai me baleta na nodrau via vakamatei Tui Esuerosi o Pikicani kei Teresi, e rua na vakailesilesi ni tui erau ivakatawa ni katuba.+
3 E taroga na tui: “Sa bau rokovi mada qai vakaicovitaki o Motekai ena ka qo?” Era kaya sara na dauveiqaravi ni tui: “E sega sara ga ni dua na ka e caka vua.”
4 Oti e kaya na tui: “O cei e tiko ena raranivale?” Se qai curu sara ga mai o Emani ena rara e tuba+ ni valenitui me tukuna vua na tui me vakaliligi o Motekai ena kau sa vakarautaka tu me baleti koya.+
5 Era kaya vua na tui na nona dauveiqaravi: “E duri tiko ena raranivale o Emani.”+ E kaya sara na tui: “Vakacurumi koya mai.”
6 Ni curu i loma o Emani, e kaya mai na tui: “Na cava me vakayacori vua e vinakata na tui me rokova?” E kaya ga e lomana o Emani: “O cei tale e via rokova na tui me uasivi au?”+
7 E kaya sara o Emani vua na tui: “O koya e vinakata na tui me rokova,
8 mera kauta mai na isulu vakatui+ e dau tokara na tui kei na ose e dau vodoka na tui kei na iubiniulu vakatui e uluna.
9 Me soli na isulu kei na ose vua e dua na vakailesilesi liu ni tui, mera vakaisulutaki koya e vinakata na tui me rokova, mera vakavodoki koya ena ose mera qai kauti koya ena rara ni koro. Mera kacivaka e matana: ‘Qo na ka e dau vakayacori vua e vinakata na tui me rokova!’”+
10 Sega ni bera ni tukuna na tui vei Emani: “Vakatotolo! Kauta na isulu kei na ose me vaka o tukuna, mo cakava sara qori vei Motekai na Jiu e dabe tiko ena matamata ni tui. Me kua ni dua na ka e lutu ena ka o tukuna.”
11 E qai kauta na isulu kei na ose o Emani, e vakaisulutaki Motekai,+ e vakavodoki koya qai kauti koya voli ena rara ni koro, e kacivaka e matana: “Qo na ka e dau vakayacori vua e vinakata na tui me rokova!”
12 Oti e lesu yani o Motekai ina matamata ni tui, ia o Emani e vakusakusa i nona vale, e tagi qai ubia na uluna.
13 Ni talanoataka o Emani na ka kece e yacovi koya vei Seresi na watina+ kei ira kece na nona itokani, eratou tukuna vua na nona tamata vuku kei Seresi na watina: “Ke kawa ni Jiu o Motekai o sa tekivu bale tiko vua, o na sega sara ni qaqa vua, o na bale dina ga e matana.”
14 Ni ratou se vosa tiko ga vua sa ra yaco yani na nona vakailesilesi na tui mera kauti Emani vakatotolo ina kanavata e vakarautaka o Esiteri.+
iVakamacala e ra
^ Ipe., “vuka nona moce na tui.”
