Vei Ira na Iperiu 7:1-28
7 O Melikiseteki qo e tui Selemi, e bete ni Kalou Cecere Duadua, e sotavi Eparama ni vakamatei ira oti mai na tui, qai vosavakalougatataki koya,+
2 e solia vua o Eparama e dua na ikatini ni ka kece, ni vakadewataki na yacana e kena ibalebale “Tui ni Yalododonu,” e tui tale ga kei Selemi, kena ibalebale, “Tui ni Sautu.”
3 E sega na tamana, sega na tinana, sega nona kawa, sega ni dua nona itekitekivu, sega tale ga ni oti nona bula, ia e sa mai vakataki koya na Luve ni Kalou, e bete me tawamudu.+
4 Moni vakasamataka mada na cecere ni turaga qo vei koya na ulunivuvale* o Eparama, ni solia vua o Eparama na ikatini ni itokinivalu vinaka duadua.+
5 Dina nira bete na tagane era luvei Livai,+ era vakaroti ena Lawa mera kumuna na ikatini mai vei ira na lewenivanua,+ oya vei ira na tacidra, ke ra kawa mada ga i Eparama,
6 ia na turaga e sega ni kawa i Livai e taura mai vei Eparama na ikatini, qai vosavakalougatataki koya e nona na vosa ni yalayala.+
7 E macala eke ni a vosa vakalougatataki koya e lailai o koya e levu.
8 Ena dua na yasana o ira na taura na ikatini era tamata ga, era mate yani, ia ena yasana adua e tiko e dua e vakadinadinataki koya na iVolatabu ni bula tiko ga.+
9 Meu kaya mada o Livai mada ga o koya e dau taura na ikatini, e sa solia na ikatini ena vuku i Eparama,
10 ni na basika mai na kawa i nona qase ena gauna a sotavi koya kina o Melikiseteki.+
11 O koya gona, ke rawa nida vinaka vakaoti ena vuku ni matabete i Livai,+ (ni a okati ena Lawa a soli vei ira na lewenivanua), na cava me dua tale kina na bete me vakataki Melikiseteki,+ sega ni vakataki Eroni?
12 Ni sa veisau na matabete, sa na veisau tale ga na Lawa.+
13 O koya e vakamacalataki qo e lewe ni dua tale na yavusa, qai sega ni dua vei ira e se veiqaravi ena icabocabonisoro.+
14 E matata vakasigalevu ni basika mai Juta na noda Turaga,+ ia a sega ni tukuna o Mosese e dua na ka me baleta na matabete ena basika mai na yavusa oya.
15 E sa qai matata ga vei keda ni sa basika e dua tale na bete+ e tautauvata kei Melikiseteki,+
16 e sega ni bete ena vuku ni lawa e yavutaki ena veika vakayago, e yavutaki ga ena kaukaua ena sega tale kina ni vakarusai rawa na nona bula,+
17 ni tukuni ena dua na tikinivolatabu: “O bete tawamudu ena ivalavala vata ga i Melikiseteki.”+
18 O koya gona, sa mai bokoci na ivunau taumada ni malumalumu qai sega ni yaga.+
19 Ni sega ni dua na ka e taucoko rawa ena vuku ni Lawa,+ ia e sa mai rawa qo ena vuku ni dua na inuinui e vinaka cake,+ nida mai volekata sara na Kalou.+
20 Ia e salavata kei na bubului,
21 (ni so na tagane era bete ia era sega ni bubuluitaki, ia e dua e bubuluitaki vei koya a kaya: “Sa bubului o Jiova* ena sega ni veisautaka na nona nanuma,* ‘O bete tawamudu’”),+
22 ena sala vata ya, e ivakadei kina ni dua na veiyalayalati e vinaka cake o Jisu.+
23 Kena ikuri, levu na bete era veisosomitaki+ ni tagutuva koso o mate na nodra veiqaravi,
24 ia ni bula tu ga o koya me tawamudu,+ e sega kina ni sosomitaki na nona itutu vakabete.
25 O koya gona, e rawa ni taucoko sara na nona vakabulai ira tale ga era toro yani vua na Kalou ena vukuna, ni bula tu ga o koya me vakamamasu ena vukudra.+
26 E ganiti keda vinaka na bete levu va qo, ni yalodina, e sega ni cakava e dua na ka ca, e savasava,+ e tawasei koya mai vei ira na ivalavala ca, qai cecere cake mai na lomalagi.+
27 E sega ni vakataki ira na bete levu ya nira vakacaboisoro e veisiga,+ taumada ena vuku ni nodra cala, tarava ena vukudra na lewenivanua,+ e vakayacora ga vakadua o koya ena nona cabora nona bula,+
28 na Lawa e lesi ira na tamata ivalavala ca mera bete levu,+ ia na vosa ni bubului+ e muria mai na Lawa e lesia na Luvena, o koya e uasivi+ me tawamudu.
