Isikeli 20:1-49
20 Ena ikavitu ni yabaki, ena ikalima ni vula ena ikatini ni siga ni vula, era lako mai eso na qase ni Isireli mera mai dabe e mataqu mera tarogi Jiova.
2 E qai vosa vei au o Jiova, e kaya:
3 “O iko na luve ni tamata, mo vosa vei ira na qase ni Isireli, mo kaya vei ira: ‘Qo na ka e tukuna na Turaga Cecere Duadua o Jiova: “Oni lako mai moni mai tarogi au? ‘Niu bula dina tiko, au na sega ni sauma na nomuni taro,’+ e kaya na Turaga Cecere Duadua o Jiova.”’
4 “O sa tu vakarau mo lewai ira? O sa tu vakarau mo lewai ira, o iko na luve ni tamata? Mo vakatakila vei ira na sevaki ni ka era vakayacora na tukadra.+
5 Mo tukuna vei ira, ‘Qo na ka e kaya na Turaga Cecere Duadua o Jiova: “Ena siga au digitaki Isireli kina,+ au bubului* tale ga vei ira na kawa ena vuvale nei Jekope, au vakatakilai au vei ira ena vanua o Ijipita.+ Io au bubului vei ira, au kaya, ‘O yau o Jiova na nomuni Kalou.’
6 Au bubuluitaka ena siga oya meu kauti ira tani ena vanua o Ijipita meu kauti ira ina vanua au vakaraica me nodra, e drodro kina na sucu kei na oni.+ E vanua rairai vinaka vei ira kece na vanua.
7 Au qai kaya vei ira, ‘Moni dui biuta tani na ka vakasevaki e tu e matamuni, moni kua ni vakadukadukalitaki kemuni ena nodra matakau vakasisila* na Ijipita.+ O yau o Jiova na nomuni Kalou.’+
8 “‘“Ia era talaidredre vei au, era sega ni via rogoci au. Era sega ni biuta tani na ka vakasevaki e tu e matadra, era sega ni biuta na matakau vakasisila ni Ijipita.+ Au mani yalataka meu sova vei ira na noqu cudru levu, meu cudruvi ira sara ena vanua o Ijipita.
9 Ia au yavala ena vuku ni yacaqu me kua ni beci e matadra na veimatanitu era tiko kina.+ Niu vakatakilai au vei ira* e matadra na veimatanitu qori ena gauna au kauti ira* tani kina mai na vanua o Ijipita.+
10 Au mani kauti ira tani ena vanua o Ijipita meu kauti ira ina vanua talasiga.+
11 “‘“Au qai solia vei ira na noqu lawa, au vakatakila vei ira+ na noqu lewa me bula kina o koya e muria.+
12 Au solia tale ga vei ira na noqu siga ni vakacecegu+ me ivakatakilakila vei au kei ira,+ mera kila kina ni o yau o Jiova au vakatabui ira.
13 “‘“Ia era talaidredre vei au na vuvale ni Isireli ena vanua talasiga.+ Era sega ni muria na noqu lawa, era cata na noqu lewa, ke dua na tamata e muria ena bula kina. Era beca vakalevu na noqu siga ni vakacecegu. Au mani yalataka meu cudruvi ira vakalevu ena vanua talasiga, meu vakawabokotaki ira.+
14 Au yavala ena vuku ni yacaqu me kua ni beci e matadra na veimatanitu au kauti ira* tani mai kina.+
15 Au bubuluitaka tale ga vei ira ena vanua talasiga meu kua ni kauti ira ena vanua au solia vei ira,+ na vanua e drodro kina na sucu kei na oni,+ e rairai vinaka vei ira kece na vanua,
16 nira cata na noqu lewa, era sega ni muria na noqu lawa ra qai beca na noqu siga ni vakacecegu ni gole tiko na lomadra ina nodra matakau vakasisila.+
17 “‘“Ia au* vosoti ira, au sega ni vakarusai ira. Au sega ni vakawabokotaki ira ena vanua talasiga.
18 Au tukuna vei ira na luvedra ena vanua talasiga,+ ‘Moni kua ni muria na nodra ivakaro na tukamuni+ se vakayacora na nodra lewa se vakadukadukalitaki kemuni ena nodra matakau vakasisila.
19 O yau o Jiova na nomuni Kalou. Moni muria na noqu lawa, moni maroroya na noqu lewa, moni vakayacora sara.+
20 Moni vakatabuya na noqu siga ni vakacecegu,+ me ivakatakilakila vei au kei kemuni, moni kila ni o yau o Jiova na nomuni Kalou.’+
21 “‘“Ia era talaidredre vei au na luvedra.+ Era sega ni muria na noqu lawa, era sega ni vakayacora na noqu lewa, ke dua na tamata e muria ena bula kina o koya. Era beca na noqu siga ni vakacecegu. Au mani yalataka meu sova vei ira na noqu cudru levu, meu cudruvi ira sara ena vanua talasiga.+
22 Au sega ni vakayacora qori,+ au yavala ga ena vuku ni yacaqu+ me kua ni beci e matadra na veimatanitu au kauti ira* tani mai kina.
23 Au bubuluitaka tale ga vei ira ena vanua talasiga meu vakasavi ira ina veimatanitu, meu cemuri ira ina veivanua+
24 nira sega ni vakayacora na noqu lewa, era cata na noqu lawa,+ era beca na noqu siga ni vakacecegu, era muria* na matakau vakasisila nei tukadra.+
25 Au vakatara tale ga mera muria na ivakaro e sega ni vinaka kei na lewa era na sega ni bula kina.+
26 Au na sega ni tarova me vakadukadukalitaki ira na nodra isoro, nira cabora na nodra ulumatua ena bukawaqa,+ meu vakarusai ira, mera kila kina ni o yau o Jiova.”’
27 “Mo vosa gona ina vuvale ni Isireli, o iko na luve ni tamata, mo kaya vei ira, ‘Qo na ka e tukuna na Turaga Cecere Duadua o Jiova: “Era vosavakacacataki au tale ga va qo na tukamuni nira sega ni yalodina vei au.
28 Au kauti ira sara ena vanua au bubuluitaka meu solia vei ira.+ Nira raica ga na veidelana cecere kei na vunikau e levu na drauna,+ era cabora kina na nodra isoro kei na nodra isolisoli vakasisila. Era cabora na nodra isoro boivinaka,* era livia e kea na nodra isoro livi.
29 Au mani tarogi ira, ‘Na cava mada na vanua cecere qo oni lakova tiko? (Se vakatokai tiko ga me Vanua Cecere me yacova mai na siga qo.)’”’+
30 “Ia qo mo kaya ina vuvale ni Isireli, ‘Qo na ka e tukuna na Turaga Cecere Duadua o Jiova: “Oni sa vakadukadukalitaki kemuni me vakataki ira na tukamuni ni oni muria na nodra matakau vakasisila moni saqamua vakayalo kei ira?+
31 Oni se vakadukadukalitaki kemuni tiko ga me yacova mai na siga qo ni oni vakacaboisoro ina nomuni matakau vakasisila kece, oya moni cabora na luvemuni ena bukawaqa?+ Vakacava, meu sauma na nomuni taro ena gauna vata qori, kemuni na vuvale ni Isireli?”’+
“‘Niu bula dina tiko,’ e kaya na Turaga Cecere Duadua o Jiova, ‘Au na sega ni sauma na nomuni taro.+
32 Ena sega ni yaco na ka oni nanuma, ni oni kaya: “Meda vakataki ira na veimatanitu, oya na veivanua era qarava na kau kei na vatu.”’”+
33 “‘Niu bula dina tiko,’ e kaya na Turaga Cecere Duadua o Jiova, ‘au na nomuni tui meu lewai kemuni ena ligaqu kaukaua, ena ligaqu e dodo tu, kei na cudru levu.+
34 Au na kauti kemuni tani mai vei ira na lewe ni veivanua, au na soqoni kemuni mai na veivanua oni vakasavi kina ena ligaqu kaukaua, ena ligaqu e dodo tu, kei na cudru levu.+
35 Au na kauti kemuni ina nodra vanua talasiga na lewe ni veivanua meu lewai kemuni e kea nida veiraimata.+
36 “‘Me vaka ga niu lewai ira na tukamuni ena vanua talasiga ni vanua o Ijipita, au na lewai kemuni tale ga,’ e kaya na Turaga Cecere Duadua o Jiova.
37 ‘Au na dusimaki kemuni ena ruku ni nona ititoko na ivakatawa+ meu vauci kemuni ena veiyalayalati.
38 Au na kauti ira tani na vakaduduile kei ira na cakacala vei au mai na kemuni maliwa.+ Au na kauti ira tani ena vanua era tiko vulagi kina, ia era na sega ni butuka na vanua o Isireli,+ oni na qai kila ni o yau o Jiova.’
39 “Kemuni na vuvale ni Isireli, qo na ka e tukuna na Turaga Cecere Duadua o Jiova: ‘Moni dui qarava na nomuni matakau vakasisila.+ Ia e muri, ke oni sega tiko ga ni rogoci au, oni na sega tale ni beca na yacaqu tabu ena nomuni isoro kei na nomuni matakau vakasisila.’+
40 “‘Ena noqu ulunivanua tabu, ena ulunivanua cecere ni Isireli,’+ e kaya na Turaga Cecere Duadua o Jiova, ‘era na qaravi au kece e kea na vuvale taucoko ni Isireli ena vanua.+ Au na marautaki ira e kea, au na lavaka e kea na nomuni cau kei na isevu ni nomuni isoro, oya na ka tabu kece oni solia.+
41 Au na marautaki kemuni ena isoro boivinaka* niu kauti kemuni tani mai vei ira na lewe ni veivanua, au soqoni kemuni mai na veivanua oni vakasavi kina;+ oni na qai rokovi au e matadra na veimatanitu.’+
42 “‘Oni na kila ni o yau o Jiova+ niu kauti kemuni ina vanua o Isireli,+ ina vanua au bubuluitaka meu solia vei ira na tukamuni.
43 Oni na nanuma e kea na nomuni itovo kei na nomuni ivalavala oni vakadukadukalitaki kemuni kina,+ oni na vakasisilataki kemuni* ena ka ca kece oni vakayacora.+
44 Oni na qai kila ni o yau o Jiova niu yavala ena vuku ni yacaqu,+ au sega ni yavala ena vuku ni ka ca oni vakayacora se na velavela ni nomuni ivalavala kemuni na vuvale ni Isireli,’ e kaya na Turaga Cecere Duadua o Jiova.”
45 E vosa tale vei au o Jiova, e kaya:
46 “O iko na luve ni tamata, mo vakanamata ina mata ni ceva, mo vunau ena ceva, mo parofisai ina veikau ni vanua ena ceva.
47 Mo tukuna ina veikau ena ceva, ‘Mo rogoca na vosa i Jiova. Qo na ka e kaya na Turaga Cecere Duadua o Jiova: “Au na vakamai iko,+ ena kama na nomu kau drokadroka kece kei na kau madu. Ena sega ni boko rawa na yameyame ni buka,+ ena kama kece kina na matadra mai na ceva me yaco ina vualiku.
48 Era na raica na tamata kece ni o yau o Jiova au vakama, ena sega ni boko rawa.”’”+
49 Au mani kaya: “Oilei kemuni na Turaga Cecere Duadua Jiova! Era kaya me baleti au, ‘E vosa vakaibalebale tiko o koya.’”
iVakamacala e ra
^ Ipe., “laveta na ligaqu.”
^ Kena vosa vakaIperiu e rairai veiwekani kei na dua na vosa ni “denimanumanu,” e vosa ni veibeci.
^ Oya o Isireli.
^ Oya o Isireli.
^ Oya o Isireli.
^ Ipe., “na mataqu.”
^ Oya o Isireli.
^ Ipe., “na matadra e muria.”
^ Se “veivakalomavinakataki, malumu.” Ipe., “veivakacegui.”
^ Se “veivakalomavinakataki, malumu.” Ipe., “veivakacegui.”
^ Ipe., “vakasisilataka na matamuni.”
