Isikeli 26:1-21
26 Ena ika11 ni yabaki, ena imatai ni siga ni vula, e vosa vei au o Jiova, e kaya:
2 “O iko na luve ni tamata, ni tukuni Jerusalemi vakaca o Taia,+ ‘Maleka! Sa botei na nodra matamata na lewe ni veivanua!+ Ena lako mai vei au na ka kece, au na vutuniyau ni sa vaqeavutaki o koya,’
3 ia qo na ka e kaya na Turaga Cecere Duadua o Jiova: ‘Au na valuti iko Taia, au na kauta cake yani e levu na matanitu mera valuti iko, me vaka ga na se ni ua mai wasawasa.
4 Era na vakarusa na bai kei Taia, era na basuka na kena valececere,+ au na karia tani na kena qele, au na cakava me dua na vatu taliva.
5 Ena vuki o koya me vanua ni sigani lawa e loma ni wasawasa.’+
“‘Au tukuna sara ga,’ e kaya na Turaga Cecere Duadua o Jiova, ‘ena nodra itokinivalu na veimatanitu.
6 Ena ravuta na iseleiwau na nona itikotiko* ena taudaku ni koro, era na qai kila na lewenivanua ni o yau o Jiova.’
7 “Qo na ka e kaya na Turaga Cecere Duadua o Jiova: ‘Au na kauti Tui Nepukanesa* mai Papiloni me valuti Taia mai na vualiku,+ e nodra tui na tui,+ e salavata mai na ose,+ na qiqinivalu,+ na sotia dauvodo ose, kei na dua na mataivalu e levu na kena sotia.*
8 Ena vakarusa o koya na nomu itikotiko ena taudaku ni koro ena iseleiwau, ena tara e dua na bai, ena viribaiti iko, ena vakaduria tale ga e dua na isasabai levu me valuti iko.
9 Ena tukia na nomu bai ena nona itukinibai, ena basuka na nomu valececere ena nona matau.*
10 Ena levu sara na nona ose, era na ubi iko ena kuvuniqele, ena yavalata na nomu bai na rorogo ni sotia dauvodo ose, na yavaniqiqi, kei na qiqinivalu ni curu yani o koya ena nomu matamata me vaka na nodra curuma na tagane e dua na koro e kabasu tu na kena bai.
11 Ena butubutuka na nomu gaunisala kece na ququ ni nona ose,+ ena vakamatei ira na nomu tamata ena iseleiwau, ena kasura ina qele na nomu duru kaukaua.
12 Era na kauta na nomu iyau, era na yauta na nomu ivoli,+ era na botea na nomu bai, era na basuka na nomu vale totoka, era na kolotaka i wai na nomu vatu, na nomu iyaya kau, kei na nomu qele.’
13 “‘Au na muduka na domo ni nomu sere, ena sega ni rogo tale na nomu api.+
14 Au na vukici iko mo vatu taliva, o na vanua ni sigani lawa.+ O na sega ni tara tale, ni o yau o Jiova au tukuna,’ e kaya na Turaga Cecere Duadua o Jiova.
15 “Qo na ka e kaya na Turaga Cecere Duadua o Jiova vei Taia: ‘Era na sautaninini na veiyanuyanu ena rorogo ni nomu vakarusai nira vutugu na voleka ni mate ni yaco tiko na veivakamatei ena kemu maliwa.+
16 Era na siro mai na nodra idabedabe vakaturaga na turaga kece ni wasawasa, era na biuta laivi na nodra isulu balavu tabaleka, era na luvata na nodra isulutali, era na sautaninini. Era na dabe ena qele nira sautaninini tiko ra qai kidroa nira raici iko.+
17 Era na lagata vei iko e dua na sere ni lolosi,+ era na kaya vei iko:
“‘“O sa rusa+ o iko o vakaitikotiko e wasawasa, na koro dau vakacaucautaki,O iko kei ira na tiko vei iko oni kaukaua e wasawasa,+Oni vakarerei ira kece na lewe i vuravura!
18 Era na sautaninini na veiyanuyanu ena siga o bale kina,Era na lomaleqa na veiyanuyanu e wasawasa ni o sa yali.”’+
19 “Qo na ka e kaya na Turaga Cecere Duadua o Jiova: ‘Au na vakarusai iko me vaka na koro e sega ni tawani, au na luvuci iko ena kui ni wai, ena ubi iko na wai voravora,+
20 au na kauti iko kei ira na lako sobu vata kei iko ina qara* vei ira ena gauna makawa, au na vakatikori iko ena vanua lolovira duadua me vaka na vanua makawa e vakarusai, vata kei ira na lako sobu ina qara,+ mo kua ni tawani. Au na qai vakacaucautaka* na nodra vanua na bula tiko.
21 “‘Ena vakadomobula na ka au na cakava vei iko, o na yali vakadua.+ Era na vaqarai iko, o na sega ni kune tale,’ e kaya na Turaga Cecere Duadua o Jiova.”
iVakamacala e ra
^ Ipe., “luvena yalewa.”
^ Ipe., “Nepukatiresa,” e dua tale na kena ivolavolai.
^ Ipe., “tamata.”
^ Se “iseleiwau.”
^ Se “ibulubulu.”
^ Se “ukutaka.”
