Isikeli 35:1-15
-
Parofisaitaki na ka ca ina veiulunivanua o Sia (1-15)
35 E vosa tale vei au o Jiova, e kaya:
2 “O iko na luve ni tamata, mo vakanamata ina veiulunivanua o Sia,+ mo parofisaitaka kina na ka ca.+
3 Mo kaya kina, ‘Qo na ka e tukuna na Turaga Cecere Duadua o Jiova: “O iko na veiulunivanua ena yasayasa o Sia, au na cudruvi iko, au na dodoka vei iko na ligaqu, au na vakalalai iko.+
4 Au na vakarusa na nomu koro kece, o na lala,+ o na qai kila ni o yau o Jiova.
5 Ni o cati ira tiko na Isireli+ o qai soli ira ina iseleiwau ena gauna era leqa kina, ena iotioti ni gauna era cudruvi kina.”’+
6 “‘Niu bula dina tiko,’ e kaya na Turaga Cecere Duadua o Jiova, ‘au na vakarautaki iko ina vakadavedra, ena cicimuri iko na vakadavedra.+ Ni o cata na dra, ena cicimuri iko na vakadavedra.+
7 Au na vakalala gona na veiulunivanua ena yasayasa o Sia,+ au na vakamatei koya e lako kina kei koya e lesu mai kina.
8 Au na vakasinaita na kena veiulunivanua ena yagodra na vakamatei. O ira era mate ena iseleiwau era na bale ena nomu veidelana, ena nomu buca, kei na nomu uciwai kece.
9 Au na vakalalai iko vakadua, ena sega ni tawani tale na nomu koro kece,+ oni na qai kila ni o yau o Jiova.’
10 “Ni o tukuna, ‘Ena noqu na matanitu ruarua qo kei na vanua ruarua qo, keimami na taukeni rau,’+ ia e tu kina o Jiova,
11 ‘o koya gona niu bula dina tiko,’ e kaya na Turaga Cecere Duadua o Jiova, ‘au na vakaraitaka vei iko na cudru kei na vuvu vata ga o vakaraitaka ni o cati rau,+ au na vakatakilai au vei ira niu totogitaki iko.
12 O na qai kila ni o yau o Jiova, au rogoca na ka ca kece o tukuna ina veiulunivanua e Isireli ni o kaya, “Sa vakalalai tu, sa soli vei keda meda kania.”*
13 Oni vosa viavialevu vei au, oni vosavakacacataki au vakalevu.+ Au rogoca kece.’
14 “Qo na ka e tukuna na Turaga Cecere Duadua o Jiova: ‘Ena marau vakalevu o vuravura taucoko niu na vakalalai iko.
15 Me vaka ga ni o marautaka vakalevu na kena vakalalai na ivotavota ni vuvale ni Isireli, qori tale ga na ka au na vakayacora vei iko.+ O na vakalalai, o iko na ulunivanua ena yasayasa o Sia, io, o Itomi kece,+ era na qai kila ni o yau o Jiova.’”
iVakamacala e ra
^ Ipe., “me kakana.”
