Jeremaia 31:1-40
31 “Ena gauna oya,” e kaya o Jiova, “au na qai nodra Kalou na vuvale kece ni Isireli, era na noqu tamata.”+
2 Qo na ka e kaya o Jiova:
“Era lomani ena vanua talasiga na tamata era bula mai na iseleiwauNi lako tiko o Isireli ina nona vanua ni vakacegu.”
3 E rairai mai vei au o Jiova ena vanua yawa, e kaya:
“Au lomani iko ena loloma e sega ni mudu.
Oya na vuna au tuberi iko mai kina vei au ena dei ni loloma.*+
4 Ia au na tarai iko tale, o na qai tara tale,+O iko na goneyalewa ni Isireli, o na taura tale na nomu tibereliMo lai meke ena marau.*+
5 O na tea tale na loganivaini ena veiulunivanua e Samaria,+Era na teitei na dauteitei, era na vakayagataka na vuana.+
6 Ni na yaco mai na siga era na kacivaka kina na yadra ena veiulunivanua e Ifireimi:
‘Moni tucake, meda lako cake i Saioni vei Jiova na noda Kalou.’”+
7 Ni qo na ka e kaya o Jiova:
“Moni kaila ena marau vei Jekope.
Moni kaila ena reki ni oni liu vei ira na veivanua.+
Moni kacivaka, moni vakacaucautaki koya, moni kaya,‘Kemuni Jiova, moni vakabulai ira na nomuni tamata, na ivovo ni Isireli.’+
8 Au vakasukai ira mai na vanua ena vualiku.+
Au na vakasoqoni ira mai na veivanua yawa e vuravura.+
Ena tomani ira mai na mataboko kei na lokiloki,+Na yalewa bukete kei koya sa voleka ni sucu.
Me vaka e dua na ivavakoso levu era na lesu mai ke.+
9 Era na lako tagitagi mai.+
Au na tuberi ira nira kerea mera lomani.
Au na kauti ira ina veiuciwai,*+Ena sala tautauvata ena sega ni vakatarabetaki ira.
Ni o yau ga na Tamadra na Isireli, o Ifireimi na noqu ulumatua.”+
10 Moni rogoca na vosa i Jiova, o kemuni na veivanua,Moni tukuna ina veiyanuyanu tu yawa:+
“O koya e vakasavi Isireli ena kumuni koya mai.
Ena vakaraici koya me vaka na ivakatawa ni vakaraica na nona qelenisipi.+
11 Ni na sereki Jekope o Jiova+Ena vakabulai koya mai na liga i koya e kaukaua vua.+
12 Era na lako mai mera kaila ena marau ena delai Saioni,+Era na marautaka na yalovinaka* i Jiova,Ena vuku ni covuata kei na waini vou+ kei na waiwai,Kei na luvenisipi kei na bulumakau.+
Era na vaka na iteitei vakasuasuataki vinaka,+Era na sega tale ni rarawa.”+
13 “Ena gauna oya ena meke ena marau na goneyalewa,O ira tale ga na cauravou kei ira na kenaturaga.+
Au na vukica na nodra tagi me reki,+Au na vakacegui ira, au na vakamarautaki ira me isosomi ni nodra rarawa.+
14 Au na vakamamautaki ira na bete ena levu na ka,*Era na mamau na noqu tamata ena noqu yalovinaka,”+ e kaya o Jiova.
15 “Qo na ka e kaya o Jiova:
‘E rogo e dua na domo mai Rama,+ na lele kei na qoqolou:
E tagicaki ira tiko na luvena o Raijeli.+
E bese ni vakacegui ena vukudra na luvena,Nira sa yali kece.’”+
16 Qo na ka e kaya o Jiova:
“‘Me kua ni rogo na domo ni nomu tagi, me kua ni vakawai na matamu,Ni tiko na isau ni nomu cakacaka,’ e kaya o Jiova.
‘Era na lesu mai na vanua ni meca.’+
17 ‘Sa tu na ka mo nuitaka ena nomu gauna mai muri,’+ e kaya o Jiova.
‘Nira na lesu na luvemu ina nodra vanua.’”+
18 “Au rogoca dina ni tagi tiko o Ifireimi,‘Oni vakadodonutaki au, au sa vakadodonutaki,Me vaka na luvenibulumakau e sega ni vakavulici.
Moni vakalesui au, au na lesu totolo yaniNi o kemuni ga Jiova na noqu Kalou.
19 Niu lesu au veivutuni,+Ni tukuni oti vei au, au sabica na sagaqu ena rarawa.
Au madua, au matavelavela,+Ni luvuci au na ca ni kequ irogorogo niu se itabagone.’”
20 “E sega ni noqu gonenitoko o Ifireimi, na gone au dau lomana?+
Niu vosataki koya vakalevu, au nanumi koya tiko ga.
Oya na vuna e yavala kina na lomaqu* ena vukuna.+
Au na lomani koya sara ga,” e kaya o Jiova.+
21 “Mo vakaduria na nomu ivakatakilakila ni gaunisala,Mo vakatakilakilataka na sala.+
Mo nanuma vinaka na gaunisala levu, na sala mo muria.+
Mo lesu mai, o iko na goneyalewa ni Isireli, mo lesu ina nomu koro kece.
22 Me vakacava na dede ni nomu veigoleyaki, o iko na goneyalewa tawayalodina?
Ni bulia o Jiova e dua na ka vou e vuravura:
E dua na yalewa ena cicimuria vakavoleka e dua na tagane.”
23 Qo na ka e kaya o Jiova ni lewe vuqa,* na Kalou ni Isireli: “Era na tukuna tale na vosa qo ena vanua o Juta kei na kena koro niu soqoni ira tale mai na nona bobula: ‘Me vakalougatataki iko mada ga o Jiova, o iko na itikotiko ni yalododonu,+ na ulunivanua tabu.’+
24 Era na tiko kina na Juta kei na kena koro kece, o ira na dauteitei kei ira na ivakatawa ni qelenisipi.+
25 Niu na vakaukauataki koya e oca, au na vakacegui ira yadua na rarawa tu.”+
26 Au mani yadra, au dolava na mataqu, ia au marautaka na noqu moce.
27 “Raica! Sa voleka na gauna,” e kaya o Jiova, “au na kaburaka ena vuvale ni Isireli kei na vuvale ni Juta na kawa ni tamata kei na kawa ni manumanu.”+
28 “Me vaka niu vakaraici ira meu cavuta, meu basuka, meu vakacacana, meu vakarusa, meu vakararawataka,+ au na vakaraici ira tale ga meu tara meu tea,”+ e kaya o Jiova.
29 “Ena gauna oya era na sega ni tukuna tale, ‘Era kania na tama na vuanivaini wiwi, ia e wiwi* kina na batidra na luvedra.’+
30 Era na dui mate ena nodra dui cala. Na tamata yadua e kania na vuanivaini wiwi ena wiwi ga kina na batina.”
31 “Raica! Sa voleka na siga,” e kaya o Jiova, “au na cakava e dua na veiyalayalati vou kei na vuvale ni Isireli kei na vuvale ni Juta.+
32 Ena sega ni vaka na veiyalayalati au cakava kei ira na tukadra ena siga au taura kina na ligadra meu tuberi ira tani mai na vanua o Ijipita,+ ‘na noqu veiyalayalati era beca,+ ni o yau ga na nodra turaga dina,’* e kaya o Jiova.”
33 “Qo na veiyalayalati au na cakava kei na vuvale ni Isireli ni oti na gauna oya,” e kaya o Jiova. “Au na tugana na noqu lawa e lomadra,+ au na vola tale ga e yalodra.+ Au na qai nodra Kalou, era na noqu tamata.”+
34 “Era na sega tale ni vakavulica na dui wekadra kei na dui tacidra mera kaya, ‘Moni kilai Jiova!’+ nira na kilai au kece, me tekivu vei ira na tamata wale me yacovi ira na turaga,”+ e kaya o Jiova. “Niu na vosota na nodra cala, au na sega tale ni nanuma na nodra ivalavala ca.”+
35 Qo na ka e tukuna o Jiova,O koya e solia na matanisiga me cila ena siga,Na lawa ni vula kei na kalokalo me cila ena bogi,O koya e yavalata na wasawasa me voravora na kena ua,Na yacana o Jiova ni lewe vuqa:+
36 “‘Ke yali na ivakaro qori,’ e kaya o Jiova,‘Era na sega tale ni matanitu tiko ga e mataqu na kawa ni Isireli.’”+
37 Qo na ka e kaya o Jiova: “‘Ke vakarautaki rawa na lomalagi e cake, me dikevi rawa na yavu ni vuravura e ra, au na biuta tale ga na kawa taucoko ni Isireli ena vuku ni ka kece era vakayacora,’ e kaya o Jiova.”+
38 “Raica! Sa voleka mai na gauna,” e kaya o Jiova, “ena tara me nei Jiova na koro+ me tekivu mai na Valececere i Ananeli+ me yacova na Matamata ni Ucunikoro.+
39 Ena lako vakadodonu na wa ni vakarau+ i dela i Karepi, ena gole vaka i Koa.
40 Ia na buca kece ni yago mate kei na dravusa,* na baba kece me yacova na Buca o Kitironi+ me yaco sara ina Matamata ni Ose+ donuya na tokalau, ena tabu me nei Jiova.+ Ena sega tale ni cavuraki se basu ena dua na gauna.”
iVakamacala e ra
^ Se “vakaraitaka tiko ga vei iko na dei ni noqu loloma.”
^ Se “lako ina nodra meke na dredre tiko.”
^ Se “waimaca.”
^ Se “na ka vinaka e solia o.”
^ Ipe., “kakana uro.”
^ Ipe., “noqu wawa.”
^ Qo na mataivalu vakalomalagi.
^ Ipe., “mucu.”
^ Se rawa ni, “watidra.”
^ Se “dravusa urouro,” oya na dravusa e veiwaki kei na uro ni isoro.
