Vola o Joni 10:1-42
10 “Au tukuna vakadodonu sara vei kemuni, o koya e sega ni curu ena katuba ni bainisipi, e kaba ga ena duatani tale na vanua, e daubutako e daukocokoco tale ga.+
2 Ia na ivakatawanisipi ena curu e katuba.+
3 Na ivakatawa ni katuba e dolava na katuba vua na ivakatawanisipi,+ era rogoca na domona na sipi.+ E kacivi ira nona sipi ena yacadra qai kauti ira i tuba.
4 Ni sa kauti ira kece i tuba na nona sipi, ena liu tiko ra qai muri koya na sipi nira kila na domona.
5 Era na sega sara ni muria na vulagi, era na dro nira sega ni kila na domo ni vulagi.”
6 E tukuna vei ira o Jisu na vosa vakatautauvata qo, ia era sega ni kila na ka e tukuna tiko vei ira.
7 E kaya tale vei ira o Jisu: “Au tukuna vakadodonu sara vei kemuni, o yau na katuba ni sipi.+
8 O ira kece era vakalecaleca mai era daubutako ra qai daukocokoco, ia o ira na sipi era sega ni rogoci ira.
9 O yau na katuba. O koya e curu kina ena vakabulai, ni curu yani se curu mai ena kunea na kakana.+
10 E lako mai na daubutako me butako, me veivakamatei, me veivakarusai tale ga.+ Au lako mai mera rawata na bula, mera rawata sara vakalevu.
11 O yau na ivakatawa vinaka.+ Na ivakatawa vinaka e solia nona bula ena vukudra na sipi.+
12 O koya e saumi me vakatawa na sipi, e sega ni ivakatawanisipi, e sega tale ga ni itaukei ni sipi. Ni raica ni lako yani na olifa ena biuta tu na sipi qai dro—ena qai toqovi ira na olifa, ra qai cerebu—
13 ni saumi ga o koya e mai vakatawa sipi, e sega ni kauaitaki ira kina na sipi.
14 O yau na ivakatawa vinaka, au kilai ira na noqu sipi, era kilai au tale ga,+
15 me vaka ga nona kilai au o Tamaqu, au kilai Tamaqu tale ga,+ au solia kina noqu bula ena vukudra na sipi.+
16 “Eso tale na sipi era noqu era sega ni tiko ena bai qo+ au na kauti ira tale ga mai, era na rogoca na domoqu, ena qai dua ga na qelenisipi, dua ga na kena ivakatawa.+
17 Qo na vuna e lomani au kina o Tamaqu+ niu solia noqu bula,+ ena qai solia tale vei au.
18 Au solia ga vakataki au na noqu bula, e sega ni dua e vakasaurarataki au kina. E tu vei au na lewa meu solia, e tu tale ga vei au na lewa meu taura tale.+ Qo na ivakaro e solia vei au o Tamaqu.”
19 Era mani veisei tale na Jiu+ ena vosa ya.
20 Levu era kaya: “E curumi koya tiko na timoni, sa leqa nona vakasama. Cava oni rogoci koya kina?”
21 Era kaya eso tale: “E sega ni vosa va qo na tamata e curumi koya na timoni. Na timoni e sega ni rawa ni vakavuna me rai na mataboko!”
22 Ena gauna ya e caka tiko mai Jerusalemi na Soqo ni Vakatabui ni Valenisoro. E vulaililiwa,
23 e lako voli o Jisu ena loma ni valenisoro ena varada i Solomoni.+
24 Era qai wavokiti koya na Jiu, ra taroga: “Ena vakacava mada na dede ni neimami lomatarotaro tiko? Ke o Karisito, mo tukuna mai vakadodonu.”
25 E sauma vei ira o Jisu: “Au sa tukuna vei kemuni, oni qai sega ni vakabauta. E tukuni au na cakacaka au cakava tiko ena yaca i Tamaqu.+
26 Ia oni sega ni vakabauta ni oni sega ni noqu sipi.+
27 Era rogoca na domoqu na noqu sipi, au kilai ira tale ga, ra qai muri au.+
28 Au solia vei ira na bula tawamudu,+ era na sega sara ni rusa, ena sega tale ga ni dua me na kaliraki ira mai ligaqu.+
29 Na sipi e solia vei au o Tamaqu e uasivia na ka kece, e sega tale ga ni dua ena kaliraki ira mai na liga i Tamaqu.+
30 Keirau duavata kei Tamaqu.”+
31 Era se baci tomi vatu na Jiu mera vakaviriki Jisu.
32 E tukuna vei ira o Jisu: “E levu na cakacaka vinaka i Tamaqu au vakaraitaka vei kemuni. Na cakacaka cava oni via vakaviriki au kina?”
33 Era sauma na Jiu: “Keimami sega ni vakaviriki iko ena vuku ni cakacaka vinaka, ia ena nomu vosaveibeci,+ ni o tamata ga o qai viavia kalou.”
34 E kaya vei ira o Jisu: “Vakaevei, e sega ni volai ena nomuni Lawa, ‘Au a kaya: “Oni sa kalou?”’+
35 Ke vakatoka o koya mera ‘kalou’+ o ira e tau vei ira na vosa ni Kalou—qai sega ni vakacala e dua na tikinivolatabu—
36 oni tukuna vakacava vei au, o koya e digitaka qai tala mai vuravura o Tamaqu, ‘O vosabeca na Kalou,’ niu tukuna niu ‘Luve ni Kalou’?+
37 Keu sega ni cakava tiko na cakacaka i Tamaqu, ni kua ni vakabauti au.
38 Ia keu cakava tiko na cakacaka i Tamaqu, oni qai sega ni vakabauti au, ni vakabauta mada ga na cakacaka,+ moni qai kila sara kina ni duavata kei au o Tamaqu, au duavata tale ga kei Tamaqu.”+
39 Era tovolea tale mera vesuki koya, ia e dro yani.
40 E gole sara ina tai ni Joritani, na vanua e tekivu veipapitaisotaki kina o Joni,+ me lai tiko kina.
41 Era tabili vua e levu na lewenivanua ra qai kaya: “E sega mada ga ni dua na cakamana e cakava o Joni, ia e dina kece na ka e tukuna me baleta na tamata qo.”+
42 E levu era vakabauti koya mai kea.
