Vola o Joni 14:1-31
14 “Dou kua ni lomaleqa.+ Me laurai ni dou vakabauta na Kalou,+ me laurai tale ga ni dou vakabauti au.
2 E levu tu na tikina ena vale nei Tamaqu. Ke sega keu sa tukuna vei kemudou. Au sa lako tiko qo meu lai vakarautaka e dua na tikina me nomudou.+
3 Keu lako meu vakarautaka e dua na tikina me nomudou, au na lesu tale mai meu kauti kemudou, mo dou tiko tale ga ena vanua au tiko kina.+
4 Dou sa kila tale ga na sala ina vanua au lako kina.”
5 Mani kaya vua o Tomasi:+ “Turaga, keitou sega ni kila na vanua oni lako kina. Keitou na kila vakacava na kena sala?”
6 E kaya vua o Jisu: “O yau na sala,+ na dina,+ kei na bula.+ Ena vukuqu ga ena qai torovi Tamaqu rawa kina e dua.+
7 Ke dou kilai au, dou na kilai Tamaqu tale ga, ia tekivu qo lako yani, dou sa kilai koya, dou raici koya tale ga.”+
8 E qai kaya vua o Filipi: “Turaga, vakatakilai Tamamuni mada vei keitou, keitou na qai cegu.”
9 E tukuna o Jisu: “Sa dede na noqu tiko vata kei kemudou, o se sega ga ni kilai au Filipi? O koya sa raici au sa raici Tamaqu tale ga.+ Na cava o tukuna kina, ‘Vakatakilai Tamamuni vei keitou’?
10 O sega ni vakabauta niu duavata kei Tamaqu, e duavata tale ga kei au o Tamaqu?+ E sega ni vu ga mai lomaqu na ka au tukuna vei kemudou,+ na Tamaqu ga e duavata kei au e cakava tiko nona cakacaka.
11 Vakabauti au niu duavata kei Tamaqu, ni duavata tale ga kei au o Tamaqu. Ke sega, vakabauta ga na ka au sa cakava.+
12 Au tukuna vakadodonu sara vei kemudou, o koya e laurai vua ni vakabauti au ena cakava tale ga na cakacaka au cakava. Na cakacaka tale ga e cakava ena levu sara,+ niu sa lako tiko vei Tamaqu.+
13 Na ka kece tale ga dou kerea ena yacaqu, au na cakava, me vakalagilagi kina na Tamaqu ena vuku i Luvena.+
14 Na ka kece ga dou kerea ena yacaqu, au na cakava.
15 “Ke dou lomani au, dou na muria na noqu ivakaro.+
16 Au na kerei Tamaqu, ena qai solia mai o koya e dua tale na dauveivuke* me tiko vata kei kemudou me tawamudu,+
17 qo na yalo tabu na vu ni dina+ e sega ni taukena o vuravura, ni sega ni raica, e sega tale ga ni kila.+ Ia dou kila, ni tiko vei kemudou, e sobuti kemudou tale ga.
18 Au na sega ni laiva mo dou rarawa.* Au na lako mai vei kemudou.+
19 Sega ni dede sa na sega ni raici au tale o vuravura, ia dou na raici au,+ niu bula tiko, dou na bula tale ga.
20 Ena siga ya, dou na kila niu duavata kei Tamaqu, dou duavata kei au, o yau tale ga au duavata kei kemudou.+
21 O koya e vakabauta na noqu ivakaro qai muria, e lomani au. Ia o koya e lomani au ena lomani koya o Tamaqu, au na lomani koya, au na vakatakilai au tale ga vua.”
22 E qai kaya vua o Jutasa+ [sega ni o Isikarioti]: “Turaga, na cava oni via vakatakilai kemuni ga kina vei keitou, oni sega ni vakatakilai kemuni i vuravura?”
23 E sauma vua o Jisu: “O koya e lomani au, ena muria na noqu vosa,+ ena lomani koya o Tamaqu, keirau na lako vua me keirau tiko vata kei koya.+
24 O koya e sega ni lomani au e sega ni muria na noqu vosa. Na vosa tale ga dou rogoca tiko e sega ni noqu, e nei Tamaqu ga e talai au mai.+
25 “Au tukuna vei kemudou na veika qo niu se tiko vata kei kemudou.
26 Ia na dauveivuke, na yalo tabu ena tala mai o Tamaqu ena yacaqu, ena qai vakavulica vei kemudou na ka kece, ena vakalesuya tale ga ina nomudou vakasama na ka kece au tukuna vei kemudou.+
27 Au sa solia vei kemudou na vakacegu, au solia vei kemudou na noqu vakacegu.+ Au sega ni solia vei kemudou ena kena ivalavala e solia o vuravura. Dou kua ni lomaleqa, dou kua tale ga ni rere.
28 Dou rogoca niu a kaya vei kemudou, ‘Au na lako, au na lesu tale mai vei kemudou.’ Ke dou lomani au, dou na marau niu lako vei Tamaqu, ni cecere sara vei au o Tamaqu.+
29 Au sa tukuna rawa qo vei kemudou ni se bera ni yaco. Mo dou vakabauta ena gauna sa yaco kina.+
30 Au na sega tale ni vosa vakadede vei kemudou, ni sa lako tiko mai na turaga ni vuravura qo.+ E sega ni dua na nona kaukaua vei au.+
31 Ia au na vakayacora na ka e vakarota vei au o Tamaqu meu cakava,+ me kila kina o vuravura niu lomani Tamaqu. Dou tucake me tou sa lako.
