Vola o Joni 15:1-27
15 “O yau na vaini dina, o Tamaqu na ivakatawaniwere.
2 Na tabaqu kece e sega ni vua e kauta laivi o koya, na tabaqu kece e vua e samaka me rawa ni vua vakalevu.+
3 Dou sa samaki oti ena vuku ni vosa au tukuna vei kemudou.+
4 Dou duavata tiko ga kei au, au na duavata tiko ga kei kemudou. Ena sega ni vua ga vakataki koya na tabanivaini, vakavo ke sema tiko ga ina vuna. O kemudou tale ga dou na sega ni vua rawa ke dou sega ni duavata tiko ga kei au.+
5 O yau na vaini, o kemudou na tabaqu. O koya e duavata tiko ga kei au, au na duavata kei koya, o koya qo ena vua vakalevu,+ ke sega o yau, dou na sega ni rawata e dua na ka.
6 O koya e sega ni duavata tiko ga kei au, ena viritaki laivi vaka na tabanikau qai malai. Era na kumuna na tabanikau qo, qai kolotaka ina buka me kama.
7 Ke dou duavata tiko ga kei au, qai tiko ga e lomamudou na noqu vosa, na ka ga dou kerea ena yaco vei kemudou.+
8 E vakalagilagi o Tamaqu ke dou vua tiko ga vakalevu, dou qai vakaraitaka ni dou noqu tisaipeli.+
9 Me vaka ga nona lomani au o Tamaqu+ kei na noqu lomani kemudou, dou cakava na ka meu lomani kemudou tiko ga kina.
10 Ke dou muria na noqu ivunau, au na qai lomani kemudou tiko ga, me vaka ga na noqu muria na ivakaro i Tamaqu qai lomani au tiko ga o koya.
11 “Au tukuna vei kemudou na ka qo me rawa ni dou vakila kina na marau au vakila tiko, mo dou marau tale ga kina vakalevu.+
12 Qo na noqu ivakaro, mo dou veilomani me vaka ga na noqu lomani kemudou.+
13 E sega ni dua na loloma e sivia na loloma qo, me dua e solia nona bula ena vukudra na nona itokani.+
14 Dou noqu itokani ga ke dou cakava na ka au vakarota vei kemudou.+
15 Au sa sega ni qai kacivi kemudou mo dou bobula, baleta na bobula e sega ni kila na ka e cakava na nona turaga. Ia au sa kacivi kemudou mo dou noqu itokani, baleta na ka kece au rogoca vei Tamaqu au vakatakila vei kemudou.
16 Dou sega ni digitaki au, o yau ga au digitaki kemudou. Au lesi kemudou mo dou vua tiko ga, mo dou vua me tawamudu, me rawa kina ni solia vei kemudou o Tamaqu na ka kece dou kerea vua ena yacaqu.+
17 “Au vakarota vei kemudou na ka kece qo, mo dou veilomani.+
18 Ke cati kemudou o vuravura, mo dou kila ni a cati au e liu qai cati kemudou e muri.+
19 Ke dou vakavuravura, ena lomani kemudou o vuravura me vaka ni dau lomana na ka e nona. Ia ni dou sega ni vakavuravura,+ au digitaki kemudou ga mai vuravura, qo na vuna ena cati kemudou kina o vuravura.+
20 Dou nanuma tiko na vosa au tukuna vei kemudou: Na bobula e sega ni uasivia na nona turaga. Ke ra vakacacani au, era na vakacacani kemudou tale ga,+ ke ra muria na noqu vosa, era na muria tale ga na nomudou vosa.
21 Ia era na cakava na ka kece qo vei kemudou ena vuku ni yacaqu, nira sega ni kilai koya e talai au mai.+
22 Keu a sega ni lako mai meu vosa vei ira, ke ra sega ni okati mera ivalavala ca.+ Ia qo e sega nodra ulubale ena vuku ni nodra ivalavala ca.+
23 O koya e cati au e cati Tamaqu tale ga.+
24 Keu a sega ni cakava vei ira na cakacaka e se sega ni cakava e dua tale, ke ra sega ni okati mera ivalavala ca,+ ia qo era sa raica na ka au cakava, era cati au, era cati Tamaqu tale ga.
25 Me vakayacori kina na vosa e volai ena nodra Lawa: ‘E sega na vuna era cati au kina.’+
26 Niu na tala yani vei kemudou e dua na dauveivuke mai vei Tamaqu mai lomalagi, qo na yalo ni ka dina+ e vu mai vei Tamaqu. Ni yaco mai na dauveivuke, ena qai tukuni au,+
27 ia o kemudou tale ga mo dou tukuni au,+ ni dou tiko vata kei au ena gauna au tekivu vunau kina.
