Vola o Joni 3:1-36
3 E dua na nodra turaga na Jiu, na Farisi o Nikotimo,+
2 e lako vei Jisu ena bogi+ qai kaya vua: “Rapai,+ keimami kila ni oni qasenivuli e talai kemuni mai na Kalou, ni sega ni dua e cakamana+ me vakataki kemuni ke sega ni tiko vata kei koya na Kalou.”+
3 E kaya vua o Jisu: “Au tukuna vakadodonu sara vei iko, ke dua e sega ni sucu tale,+ ena sega ni raica na Matanitu ni Kalou.”+
4 E kaya vua o Nikotimo: “Ena sucu vakacava e dua ni sa qase? Me curu vakarua ina katonigone i tinana me qai sucu tale mai?”
5 E sauma o Jisu: “Au tukuna vakadodonu sara vei iko, ke dua e sega ni sucu ena wai+ kei na yalo tabu+ ena sega ni curu ina Matanitu ni Kalou.
6 E vakayago na ka e sucu ena yago, e vakayalo na ka e sucu ena yalo tabu.
7 Mo kua ni kurabui niu kaya, e dodonu moni sucu tale.
8 E liwa na cagi ena vanua ga e via liwa kina, o na rogoca na kena rorogo, ia o sega ni kila se liwa mai vei se na vanua e liwa kina. E vaka tale ga kina o ira kece era sucu ena yalo tabu.”+
9 E sauma vua o Nikotimo: “Ena yaco vakacava na ka kece qo?”
10 E sauma o Jisu: “O iko na nodra qasenivuli na Isireli, o qai sega tale ni kila na veika qo?
11 Au tukuna vakadodonu sara vei iko, keimami tukuna na ka keimami kila, keimami vakadinadinataka na ka keimami raica, ia oni sega ni vakabauta na neimami itukutuku.
12 Ke oni sega ni vakabauta na veika vakavuravura au tukuna vei kemuni, oni na qai vakabauta vakacava na veika vakalomalagi au tukuna vei kemuni?
13 Kena ikuri, se sega ni dua na tamata e lako cake i lomalagi,+ o koya ga e lako sobu mai lomalagi,+ na Luve ni tamata.
14 Me vaka nona laveta cake na gata o Mosese mai na vanua talasiga,+ e dodonu gona me laveti cake na Luve ni tamata,+
15 mera bula tawamudu+ kina o ira kece na vakabauti koya.
16 “Na levu ni nona lomani vuravura na Kalou e solia kina na Luvena e duabau ga e bulia,+ mera kua ni rusa kina o ira na vakaraitaka nodra vakabauti koya, mera rawata ga na bula tawamudu.+
17 E sega ni talai Luvena mai vuravura na Kalou me mai veilewaitaki vuravura, me vakabulai ga o vuravura ena vukuna.+
18 Ena sega ni lewai+ o koya e vakaraitaka nona vakabauti Jisu. O koya e sega ni vakaraitaka nona vakabauta sa lewai oti, ni sega ni laurai vua nona vakabauta na yaca ni Luve ni Kalou, e duabau ga e bulia.+
19 Qo na yavu ni veilewai: ni sa lako mai vuravura na rarama,+ e taleitaka ga na tamata na butobuto sega ni rarama, ni torosobu na nodra ivalavala.
20 O koya e ca na nona ivalavala e cata na rarama qai sega ni lako mai ina rarama, me kua ni vunauci* kina ena ka e cakava.
21 Ia o koya e cakava na ka dodonu e lako mai ina rarama,+ me laurai kina ni salavata na nona ivalavala kei na ka e vinakata na Kalou.”
22 Oti ya sa qai lako o Jisu kei ratou na nona tisaipeli ina lomanivanua kei Jutia. Eratou tiko e kea ena loma ni dua na gauna, e veipapitaisotaki tale ga.+
23 E veipapitaisotaki tale tiko ga o Joni mai Inoni volekati Selimi, ni levu kina na wai,+ era lako tiko ga yani na tamata ra qai papitaiso,+
24 qo ni se bera ni bala i valeniveivesu.+
25 Eratou mani veiletitaka na ka e vauca na veivakasavasavataki na tisaipeli i Joni kei na dua na Jiu.
26 Eratou qai lako vei Joni ratou kaya vua: “Rapai, o koya drau a tiko vata ena tai ni Joritani, o dau tukuni koya voli,+ sa veipapitaisotaki tiko, ra sa tabili tale ga vua na lewenivanua kece.”
27 E sauma o Joni: “E sega ni dua e tu tu ga e taura e dua na ka, vakavo ke soli vua mai lomalagi.
28 O kemudou sara ga dou vakadinadinataka noqu kaya, ‘au sega ni Karisito,+ ia au talai ga meu liu vua.’+
29 E taganevou+ o koya e taura na yalewavou. Ia na itokani ni taganevou, ni tu e kea qai rogoca na domo i taganevou, ena marau vakalevu. E vaka sara ga qori na levu ni noqu marau.
30 Ena levu cake tiko ga o koya, au na lailai sobu tiko ga o yau.”
31 O koya e lako mai cake+ e cecere vei ira kece. O koya e lako mai vuravura e vu ga e vuravura, e vosataka tale ga na ka ni vuravura. O koya e lako mai lomalagi e cecere vei ira kece.+
32 E tukuna ga na ka e raica kei na ka e rogoca,+ ia e sega ni dua e vakabauta nona itukutuku.+
33 O koya e ciqoma na itukutuku i Karisito e vakaraitaka ni vakabauta ni dina na Kalou.+
34 O koya e tala mai na Kalou ena tukuna ga na veika ni Kalou,+ ni sega ni dau bureitaka na yalona tabu.
35 E lomani Luvena o Tamana,+ e sa solia na ka kece i ligana.+
36 Ena bula tawamudu o koya e vakaraitaka ni vakabauta na Luvena,+ o koya e talaidredre vua na Luvena ena sega ni vakabulai,+ ena tiko ga vua na cudru ni Kalou.+
iVakamacala e ra
^ Se “laurai.”
