Vola o Joni 7:1-52
7 Oti ya sa qai lako voli e Kalili o Jisu ni sega ni vinakata me lako i Jutia, nira saga tiko na Jiu mera vakamatei koya.+
2 Ia sa voleka na nodra Soqo ni Valevakacevaceva*+ na Jiu.
3 Eratou mani kaya vua na tacina:+ “Mo biubiu mo lako i Jutia mera raica tale ga na nomu tisaipeli na veika o cakava tiko.
4 Ni sega ni dua e cakava vakavuni tiko ga na ka, ke vinakata me kilai. Ke o cakava tiko ga na veika qo, vakaraitaki iko yani me raici iko o vuravura.”
5 Eratou sega ni vakaraitaka na tacina ni ratou vakabauti koya.+
6 Mani kaya vei ratou o Jisu: “Se bera mai na noqu gauna,+ ena tu ga na nomudou gauna.
7 E sega ni dua na yavu me cati kemudou kina o vuravura, ia e cati au niu vakaraitaka vakadodonu na torosobu ni nodra ivalavala.+
8 Dou lako cake ina soqo, au na sega mada ni lako ena soqo qo ni se bera ni yaco mai na noqu gauna.”+
9 Ni vosa oti vei ratou e tiko voli ga e Kalili.
10 Ni ratou sa lako cake ina soqo na tacina, sa qai lako cake tale ga o Jisu, e sega ga ni vakaraitaki koya.
11 Era mani vaqarai koya na Jiu ena soqo, era kaya: “I vei na tamata ya?”
12 Era veivosakitaki koya vakalevu na lewenivanua. Eso era kaya: “E tamata vinaka.” Eso tale era kaya: “Sega, e vakacalai ira voli ga na lewenivanua.”+
13 Ia era veivosaki lo ga nira rerevaki ira na Jiu.+
14 Ni sa veimama tu na soqo, sa qai lako cake o Jisu ina valenisoro lai veivakavulici sara.
15 Era kurabui na Jiu, era kaya: “E kila mai vei na tamata qo na iVolatabu,*+ ni sega mada ga ni vuli ena kena koronivuli?”*+
16 E sauma vei ira o Jisu: “E sega ni noqu na ka au vakavulica, e nei koya ga e talai au mai.+
17 Ke dua e via cakava na loma ni Kalou, ena kila se vu vakalou na noqu ivakavuvuli+ seu tukuna tiko ga na ka au nanuma.
18 O koya e tukuna ga na ka e nanuma e vinakata me dokai, ia o koya e vinakata me dokai o koya e talai koya mai,+ o koya qo e dina e dodonu tale ga.
19 E solia vei kemuni o Mosese na Lawa,+ se cava? Ia e sega ni dua vei kemuni e muria na Lawa. Na cava oni via vakamatei au kina?”+
20 Era sauma na lewenivanua: “E curumi iko tiko na timoni. O cei e via vakamatei iko?”
21 E sauma vei ira o Jisu: “E dua ga na ka au cakava, oni sa kurabui kece kina.
22 Qo na vuna e vakarota kina o Mosese moni cilivi+—a sega ni tekivuna o Mosese, era tekivuna sara ga na tukamuni+—oni qai ciliva e dua na tagane ena siga ni vakacecegu.
23 Ke cilivi e dua na tagane ena siga ni vakacecegu me muri kina na Lawa e vola o Mosese, na cava oni qai cudruvi au kina niu vakabula e dua na tagane ena siga ni vakacecegu?+
24 Ni kua ni vakalewa na ka ena kena irairai ga e sau, ia moni lewa ga vakadodonu.”+
25 Era qai kaya eso na lewe i Jerusalemi: “E sega ni tagane qo era vaqara tiko mera vakamatea?+
26 Ia raica! E vosa tiko e matanalevu, era sega ni tukuna vua e dua na ka. Vakacava, era se sega ni vakadeitaka na iliuliu ni o koya ga qo na Karisito?
27 Eda kila na vanua e lako mai kina na tagane qo,+ ia ni lako mai na Karisito, e sega ni dua ena kila na vanua e lako mai kina.”
28 Ni veivakavulici tiko o Jisu ena valenisoro e qai kaya ena domoilevu: “Oni kilai au kei na vanua au lako mai kina. Au sega ni lako mai ena noqu lewa ga,+ ia e bula dina o koya e talai au mai, oni sega ni kilai koya.+
29 Au kilai koya+ niu matataki koya, ni o koya ga e talai au mai.”
30 Era mani via vesuki koya,+ ia e sega ni dua e vesuki koya rawa ni se bera na nona gauna.+
31 Levu na lewenivanua era vakabauti koya+ ra qai kaya: “Ni yaco mai na Karisito, vakacava ena levu na nona cakamana ni vakatauvatani kei na tagane qo?”
32 Era rogoca na Farisi nodra veivosakitaka lo na lewenivanua na veika e baleti Jisu, era qai talai ira na ovisa na iliuliu ni bete kei ira na Farisi mera lai vesuki koya.
33 E qai tukuna o Jisu: “Au na tiko tale vakalekaleka kei kemuni, au sa na qai lako vei koya e talai au mai.+
34 Oni na vaqarai au, ia oni na sega ni raici au, na vanua au na tiko kina oni na sega ni lako rawa kina.”+
35 Era mani veikayaka na Jiu: “E via lako i vei na tagane qo meda na sega ni raici koya kina? Ena via lako vei ira na Jiu era veiseyaki tu vei ira na kai Kirisi me lai vakavulici ira na kai Kirisi?
36 Na cava na ibalebale ni ka e tukuna, ‘Oni na vaqarai au, ia oni na sega ni raici au, na vanua au na tiko kina oni na sega ni lako rawa kina’?”
37 Ena iotioti ni siga, na siga bibi ni soqo,+ e tucake o Jisu qai kaya ena domoilevu: “Ke dua e karamaca, me lako mai vei au me gunu.+
38 O koya e vakabauti au, me vaka e tukuni ena tikinivolatabu, ‘Ena drodro mai lomana na uciwai ni bula.’”+
39 Ia e tukuna tiko qo o koya me baleta na yalo tabu, e vakarau soli vei ira na vakabauti koya, a se sega ni soli na yalo tabu+ ni se bera ni vakalagilagi o Jisu.+
40 Nira rogoca ya eso na lewenivanua era kaya: “Qo dina na Parofita.”+
41 Era kaya eso: “Qo na Karisito.”+ Ia era kaya eso tale: “Oi, ena lako mai Kalili na Karisito?+
42 Vakacava, e sega ni vakamacalataki ena tikinivolatabu ni na lako mai ena kawa i Tevita na Karisito,+ mai Peceliema+ tale ga na koro a tiko kina o Tevita?”+
43 Era sa qai veisei na lewenivanua ena vukuna.
44 Era via vesuki koya eso, ia e sega ni dua e tarai koya.
45 Era qai lesu na ovisa vei ira na iliuliu ni bete kei ira na Farisi, era qai taroga na Farisi: “Cava oni sega ni kauti koya mai kina?”
46 Era sauma na ovisa: “Keimami se sega ni bau rogoca e dua e vosa me vakataki koya.”+
47 Era kaya na Farisi: “Oni sa vakacalai tale ga?
48 Vakacava, sa vakabauti koya e dua vei ira na iliuliu se Farisi?+
49 Ia o ira na ilala levu qo era tamata cudruvi, era sega ni kila na Lawa.”
50 Sa qai kaya vei ira o Nikotimo, o koya a lai raici Jisu mada, e Farisi tale ga:
51 “Na noda Lawa e sega ni vakatara me lewai e dua ni se bera ni rogoci mada e liu o koya, me kilai na ka e cakava, se vakacava?”+
52 Era qai sauma vua: “Oi, o kai Kalili tale ga o iko? Ni o vaqaqara ena iVolatabu o na raica ni sega ni dua na parofita ena basika mai Kalili.”*
iVakamacala e ra
^ Se “Valetabanikau.”
^ Kir., “ivola.”
^ Oya na nodra koronivuli na rapai.
^ E sega ni laurai ena ivolavivigi na Codex Sinaitic, Codex Vaticanus, kei na Sinaitic Syriac codex na tikina e 53 me yaco ina wase 8 tikina e 11.
