Vola o Joni 9:1-41
9 Ni lako tiko o Jisu e raica sara e dua na tagane e sucu mataboko.
2 Eratou tarogi koya na nona tisaipeli: “Rapai,+ o cei e valavala ca me sucu mataboko kina na tagane qo, o koya se o rau na nona itubutubu?”
3 E sauma o Jisu: “E sega ni valavala ca na tagane qo se o rau na nona itubutubu, e yaco qo me vakaraitaki kina na cakacaka ni Kalou.+
4 E dodonu meda cakava na cakacaka i koya e talai au mai ni se siga,+ sa voleka mai na bogi ena sega ni dua e cakacaka kina.
5 Niu tiko e vuravura, au na rarama tiko kei vuravura.”+
6 Ni vosa oti, sa qai kasivi ina qele, wakia vata na qele kei na ikasivi, boroya sara kina na mata i tagane+
7 qai kaya vua: “Lai tavoi ena tobu o Sailoama” (ni vakadewataki e kena ibalebale “Talai Yani”). Mani lako sara qai tavoi, ni lesu mai sa rai tu.+
8 Era mani kaya na tiko voleka, kei ira na dau raici koya ni kerekere: “Sega ni o koya ga qo na daukerekere?”
9 Eso era kaya: “O koya ga.” So tale era kaya: “Sega, e vakataki koya.” E qai kaya na tagane ya: “O yau ga qori.”
10 Era sa qai tarogi koya: “O qai rai vakacava?”
11 E sauma: “Na tagane e vakatokai o Jisu e wakia na qele, boroya e mataqu qai kaya vei au: ‘Lako i Sailoama, lai tavoi.’+ Au lako sara, au tavoi, au mani rai.”
12 Era tarogi koya: “I vei o koya?” E sauma: “Au sega ni kila.”
13 Era mani kauta na tagane a mataboko tu vei ira na Farisi.
14 E Siga ni Vakacecegu+ tiko na siga e wakia kina na qele o Jisu qai vakavuna me rai na matana.+
15 Era sa qai tarogi koya na Farisi se rai vakacava. E kaya vei ira: “E boroya na mataqu ena qele, au lai tavoi au mani rai kina.”
16 Era kaya eso na Farisi: “E sega ni tamata ni Kalou qo ni sega ni doka na Siga ni Vakacecegu.”+ Era kaya eso tale: “Ke tamata ivalavala ca e qai cakamana ga vakacava?”+ Era mani veisei vakataki ira.+
17 Era qai kaya tale vua na tagane mataboko: “Cava o kaya me baleti koya ni a vakavuna nomu rai?” E tukuna: “E parofita o koya.”
18 Era sega ni vakabauta na nodra iliuliu ni lotu na Jiu ni a mataboko tu qai rai rawa na tagane ya, me yacova nira kacivi rau na nona itubutubu.
19 Era mani tarogi rau: “Qo na luvemudrau drau tukuna ni sucu mataboko? E qai rai vakacava?”
20 Erau sauma nona itubutubu: “Keirau kila ni luvei keirau, keirau kila tale ga ni sucu mataboko.
21 Ia keirau sega ni kila se rai vakacava. Keirau sega tale ga ni kila se o cei e vakavuna me rai. Ni tarogi koya ga, e sa tamata bula. O koya ga me vakamacala kina.”
22 Erau vosa va ya na itubutubu ni rau rerevaki ira na Jiu,+ nira sa lewa oti me vakatalai tani mai na nodra valenilotu+ o koya e vakabauta ni o Jisu na Karisito.
23 Oya na vuna erau tukuna kina nona itubutubu: “E sa tamata bula o koya. Ni tarogi koya ga.”
24 Era kaciva tale na tagane a mataboko tu ya ena ikarua ni gauna, ra qai kaya vua: “Vakalagilagia na Kalou, keimami kila ni tamata ivalavala ca o ka qori.”
25 E tukuna vei ira: “Au sega ni kila se tamata ivalavala ca se sega. Na ka ga au kila niu a mataboko, qo au sa rai rawa.”
26 Era qai kaya vua: “Cava e cakava vei iko? Cava e cakava mo rai kina?”
27 E sauma vei ira: “Au sa tukuna oti vei kemuni, oni sega ni via rogoca. Cava oni via rogoca tale kina? E cava, oni sa via nona tisaipeli tale ga?”
28 Era sa qai vakalialiai koya: “O iko ga o nona tisaipeli na tamata ya, o keimami na tisaipeli i Mosese.
29 Keimami kila ni vosa vei Mosese na Kalou, ia na tamata qori keimami sega ni kila se lako mai vei.”
30 E mani tukuna vei ira: “Sa dua na ka veivakurabuitaki qo ni oni sega ni kila se lako mai vei, ia e vakavuna meu rai.
31 Eda kila ni sega ni dau rogoci ira na ivalavala ca na Kalou,+ ia ke dua e rerevaka na Kalou qai cakava na lomana, ena rogoci koya.+
32 Eda se sega ni bau rogoca ni dua e vakavuna me rai o koya e sucu mataboko.
33 Ke sega ni tamata ni Kalou na tagane qo, ena sega ni rawata e dua na ka.”+
34 Era tukuna vua: “O sucu ivalavala ca ga, o qai via vakavulici keimami?” Era mani cemuri koya i tuba!+
35 E rogoca o Jisu nira sa vakatalai koya i tuba. Ni raici koya, e kaya vua: “O vakabauta na Luve ni tamata?”
36 E sauma na tagane ya: “O cei o koya turaga? Ni tukuna mada mai meu vakabauti koya tale ga.”
37 E kaya vua o Jisu: “O sa raici koya, o koya sara ga drau veivosaki tiko.”
38 E qai kaya vei Jisu: “Au vakabauti koya Turaga.” Mani cuva sara vua.
39 E qai kaya o Jisu: “Au lako mai vuravura meu veilewai, mera rai na mataboko,+ mera mataboko tale ga na rai.”+
40 Era rogoca na vosa ya na Farisi era tu voleka, ra mani kaya vua: “Keimami sega ni mataboko!”
41 E kaya vei ira o Jisu: “Ke oni mataboko, e sega nomuni valavala ca. Ia oni kaya, ‘Keimami sa rai.’ Kena ibalebale, e se tiko ga na nomuni valavala ca.”+
