Vei Ira mai Kalatia 3:1-29
-
Muria na Lawa kei na vakabauta (1-14)
-
Bula na tamata yalododonu ena vuku ni vakabauta (11)
-
-
Sega ni yavutaki ena Lawa na veiyalayalati kei Eparama (15-18)
-
Kawa nei Eparama o Karisito (16)
-
-
Yavu ni Lawa kei na kena inaki (19-25)
-
Luve ni Kalou ena vuku ni vakabauta (26-29)
-
Kawa nei Eparama o ira na nei Karisito (29)
-
3 Kemuni na kai Kalatia lialia! O cei e lawakitaki kemuni,+ ni a vakamacalataki vakamatata vei kemuni nona lauvako ena kau o Jisu Karisito?+
2 Qo na ka au via taroga vei kemuni: Oni rawata na yalo tabu ena nomuni muria na lawa se na nomuni vakabauta na ka oni rogoca?+
3 Sa va sara ga qori nomuni lialia? Ena nomuni tekivu oni a vakayalo, ia qo na cava oni sa tini tale kina ena ka vakayago?+
4 Vakaevei, a sega ni yaga na nomuni sotava e levu na ka rarawa? E yaga dina.
5 Vakacava o koya e solia vei kemuni na yalo tabu qai cakava na cakacaka veivakurabuitaki vei kemuni,+ e cakava ya ena nomuni muria na lawa se nomuni vakabauta na ka oni rogoca?
6 O Eparama ena nona “vakabauti Jiova,* e okati kina me yalododonu.”+
7 Oni kila vinaka ni o ira na vakabauta era luvei Eparama.+
8 Ia e sa raica tu mai liu na tikinivolatabu, ni Kalou ena okati ira na lewe ni veimatanitu mera yalododonu ena vuku ni nodra vakabauta, e tukuna kina e liu vei Eparama na itukutuku vinaka: “Ena vakalougatataki na matanitu kece ena vukumu.”+
9 O koya gona, o ira tale ga era vakabauta era na vakalougatataki vata kei na turaga vakabauta o Eparama.+
10 Era na cudruvi o ira kece era nuitaka na muri ni lawa, ni volai: “Era na cudruvi o ira na sega ni muria tiko na ka kece e volai ena ivolavivigi ni Lawa.”+
11 E macala tale ga ni na sega ni okata na Kalou me yalododonu e dua ena vuku ni lawa,+ ni volai, “ena bula na yalododonu ena vuku ni nona vakabauta.”+
12 E sega ni yavutaki na Lawa ena vakabauta, ia “o koya e muria na veika qo ena bula kina.”+
13 E voli keda o Karisito+ me sereki keda+ mai na cudru e vu mai na Lawa ni a cudruvi ena vukuda, ni volai: “E cudruvi o koya e vakaliligi ena kau.”+
14 E kena inaki mera vakila na veimatanitu, ena vuku i Karisito Jisu,+ na veivakalougatataki a tau vei Eparama, me sobuti keda kina na yalo tabu a yalataki+ ena noda vakabauta.
15 Raveitacini, meu tukuna mada e dua na vosa vakatautauvata: Ke sa vakadeitaki e dua na veiyalayalati, ke veiyalayalati mada ga vakatamata, ena sega ni dua e bokoca se vakuria.
16 E tukuni gona vei Eparama kei na nona kawa na vosa ni yalayala.+ E sega ni tukuni, “vei ira tale ga na nomu kawa,” baleta ni levu. Ia e tukuni ga, “vua na nomu kawa,” baleta ni ledua ga, oya na Karisito.+
17 Kena ikuri, au kaya qo: Na veiyalayalati a vakadeitaka taumada na Kalou, e sega ni vakatawayagataki tale ena Lawa e tauyavutaki ni oti e 430 na yabaki+ me bokoci kina na veiyalayalati.
18 Ke yavutaki ena lawa na ivotavota sa na sega ni yavutaki ena veiyalayalati, ia na ivotavota e solia vakayalololoma na Kalou vei Eparama e solia ga ena vuku ni veiyalayalati.+
19 Na cava gona na yaga ni Lawa? A caka me vakavotui kina na ivalavala ca,+ me yaco mada mai na kawa+ a tukuni vua na vosa ni yalayala, era qai vakadewa mai qori na agilosi+ ena liga i koya na dauveisorovaki.+
20 E sega ni gadrevi me dua na mata ni veiyalayalati ke okati kina e le dua ga, ia e dua ga na Kalou.
21 Vakacava, e veisaqasaqa na Lawa kei na vosa ni yalayala ni Kalou? Sega sara! Ke a soli e dua na lawa e veivakabulai, sa na rawati na yalododonu ena vuku ni lawa.
22 Ia na iVolatabu e sogolatia na ka kece ena ivalavala ca, me rawa ni soli vei ira na cakacakataka nodra vakabauti Jisu Karisito na vosa ni yalayala ni Kalou.
23 Ia ni bera ni yaco mai na vakabauta, e vakatawai keda na lawa, qai kauti keda yani meda vesuki, da qai vakanamata ina vakabauta ena vakarau vakatakilai.+
24 E noda qasenivuli gona na Lawa me tuberi keda vei Karisito,+ me rawa nida okati meda yalododonu ena vuku ni vakabauta.+
25 Ia ni yaco mai na vakabauta,+ eda sa sega tale ni vakarorogo vua na qasenivuli.+
26 Oni luve kece ni Kalou+ ena nomuni vakabauti Karisito Jisu.+
27 Ni o kemuni kece na papitaiso oni qai duavata tiko qo kei Karisito, oni sa tokari Karisito.+
28 Sa na sega na Jiu se kai Kirisi,+ sega na bobula se tamata galala,+ sega na tagane se yalewa,+ ni oni sa duabau ena nomuni duavata kei Karisito Jisu.+
29 O koya gona, ke oni nei Karisito, oni kawa dina i Eparama,+ oni itaukei+ me vaka na vosa ni yalayala.+
