Vei Ira mai Kalatia 4:1-31
4 Au tukuna qo, ena gauna kece se gone kina na itaukei e sega na kedrau duidui kei na bobula, e dina ni lewa na ka kece ga,
2 ia e vakarorogo vei ira na dauveisusu kei ira na dauniyau me yacova na siga e lokuca o tamana.
3 Nida se gone tale ga eda dau bobula tu ina ivakavuvuli vagonegonea ni vuravura.+
4 Ia ni yaco mai na kena gauna, sa qai tala mai na Kalou na Luvena, e vakasucumi koya e dua na yalewa,+ e vauci koya tale ga na lawa,+
5 me sereki ira na vauci ena lawa ena ivoli e vakarautaka,+ me rawa nida luve ni Kalou vakacabecabe.+
6 Ni oni luvena, e tala mai na Kalou na yalo tabu+ e soli vei Luvena me sobuta na lomada,+ e kacivaka: “Apa,* Tamaqu!”+
7 O koya gona, oni sa na sega tale ni bobula oni luvena ga, ni oni luvena sa okati kemuni tale ga na Kalou moni itaukei.+
8 Ena gauna oni se sega ni kila kina na Kalou, oni a bobula tu ina veika era sega dina ni kalou.
9 Ia qo ni oni sa kila na Kalou, se ni sa kilai kemuni na Kalou, na cava oni lesuva tale kina na veika tawayaga,+ e ka wale qai vagonegonea moni via bobula kina?+
10 Oni muria vinaka na siga, na vula,+ na gauna, kei na yabaki ni oni okata mera ka bibi.
11 Au leqataki kemuni sara ga, de tawayaga na noqu sasaga meu vukei kemuni.
12 Raveitacini, au vakamasuti kemuni moni vakataki au, niu a dau vakataki kemuni tale ga.+ E sega ni dua nomuni cala vei au.
13 Oni kila niu a vunautaka vei kemuni na itukutuku vinaka ena imatai ni gauna niu a tauvimate tu.
14 Oni a sega ni cata noqu tauvimate, dina ni oni vakatovolei kina, oni sega ni cati au se vakasisilataki au, ia oni vakacegui au me vaka e dua na agilosi ni Kalou, me vakataki Karisito Jisu.
15 I vei gona na marau oni a vakila tu? Au tukuna vei kemuni, ke a rawa sara ga ni oni leuta na yaloka ni matamuni moni solia vei au.+
16 Vakaevei, au sa kemuni meca niu tukuna vei kemuni na ka dina?
17 Era taleitaki kemuni vagumatua, sega ena inaki vinaka, ia era via vagolei kemuni tani vei au moni muri ira vagumatua.
18 Ena yaga vei kemuni ke oni vaqarai vagumatua ena inaki vinaka. Me yaco qori e veigauna, sega ni gauna ga au tiko kina kei kemuni
19 na luvequ lomani,+ o kemuni ga au taratara tale tiko kina me vaka na yalewa bukete me yacova ni buli o Karisito vei kemuni.
20 Ia au vinakata meu tiko vata kei kemuni ena gauna qo, meu vosa vakayalovinaka sara vei kemuni, niu sega ni kila na ka meu cakava vei kemuni.
21 Ni tukuna mada vei au o kemuni na via vauci ena lawa, oni rogoca na ka e tukuni ena Lawa?
22 Kena ivakaraitaki, e volai ni rua na luvena tagane o Eparama, e dua e vakasucuma na yalewa dauveiqaravi,+ e dua tale e vakasucuma na yalewa galala,+
23 ia o koya e vakasucuma na yalewa dauveiqaravi e sucu ena kena ivakarau vakatamata,+ o koya e vakasucuma na yalewa galala e sucu ena vosa ni yalayala.+
24 Na ka kece qo era drama vakaibalebale. O rau na yalewa erau vakaibalebaletaka e rua na veiyalayalati. E dua vei rau qo a caka ena Ulu i Saineai,+ o ira kece na vauci kina era bobula. Na veiyalayalati qo e vakataki Eka.
25 O Eka e vakaibalebaletaki Saineai,+ e dua na ulunivanua e Arapea, e dusia tale ga na Jerusalemi nikua, ni vakabobulataki o koya kei ira na luvena.
26 Ia na Jerusalemi mai cake e galala, e tinada.
27 E volai: “Mo marau na yalewa yava o sega ni vakasucu, mo kaila ena marau o iko na yalewa o sega ni taratara, ni levu sara na luvei koya na yalewa sa biu ni vakatauvatani kei na yalewa e tiko na watina.”+
28 Ia o keda raveitacini, eda vakataki Aisake nida gone ni vosa ni yalayala.+
29 Me vaka e liu, o koya e sucu ena kena ivakarau vakatamata a vakacacani koya e sucu vakayalo,+ e vaka tale ga kina ena gauna qo.+
30 Ia na cava e kaya na tikinivolatabu? “Vakatala na yalewa dauveiqaravi kei na luvena tagane, ni na sega ni itaukei vata kei na luve ni yalewa galala na luve ni yalewa dauveiqaravi.”+
31 O koya gona raveitacini, eda luve ni yalewa galala, eda sega ni luve ni yalewa dauveiqaravi.
iVakamacala e ra
^ E vosa vakaIperiu se vakaArame, kena ibalebale “I Tamaqu!”
