Lako Yani 21:1-36
21 “Qo na lewa mo vakadewataka vei ira:+
2 “Ke o volia e dua na bobula Iperiu,+ ena veiqaravi vakabobula o koya me ono na yabaki, ia ena ikavitu ni yabaki ena sereki o koya qai sega ni sauma e dua na ka.+
3 Ke lako duadua mai o koya, ena lako duadua yani. Ke tagane vakawati, ena lako vata kei koya o watina.
4 Ke solia vua o nona turaga e dua na watina qai vakasucuma vua eso na luvena tagane se luvena yalewa, sa na taukeni watina kei ratou na luvena na nona turaga, ia ena lako duadua yani o koya.+
5 Ia ke dre ga na bobula qai kaya, ‘Au lomana na noqu turaga, na watiqu kei na luvequ, au sega ni via sereki,’+
6 me qai kauti koya na nona turaga ina mata ni Kalou dina. Ena kauti koya me lai duri ravita na katuba se na duru ni katuba, ena qai culabasikata na daligana ena dua na icula na nona turaga, ena qai nona bobula o koya ena nona bula taucoko.
7 “Ke dua na tagane e volitaka vakabobula na luvena yalewa, ena sega ni lako ena galala o yalewa me vaka na tagane bobula.
8 Ke sega ni taleitaki yalewa na nona turaga qai sega ni lesi koya me dua na watina lailai, ia e laiva me dua tale e voli koya,* ena sega ni tu vua na dodonu me volitaki koya vei ira na kaitani, ni sa vakaisini koya.
9 Ke digitaki yalewa o koya me nei luvena tagane, me qai solia vua na dodonu ni dua na luvena yalewa.
10 Ke taura o koya e dua tale na yalewa me watina, me kua sara ni vakawaletaki na ka me bula kina na imatai ni yalewa a vakawatitaka, na isulu, kei na itavi ni vakawati e dodonu me vakayacori vua.+
11 Ke sega ni vakarautaka vei yalewa o koya na tolu na ka qori, me qai lako ena galala o yalewa, ena sega ni sauma e dua na ilavo.
12 “O koya e mokuta* e dua na tamata mani mate kina, me vakamatei sara ga.+
13 Ia ke sega ni nakita nona cakava qai vakalaiva na Kalou dina me yaco qori, au na lesia vei iko e dua na vanua e rawa ni dro kina o koya.+
14 Ke dua na tamata e katakatataka na kainona qai nakita nona vakamatei koya,+ me vakamatei na tamata qori, veitalia mada ga ke o lai kauti koya mai ena noqu icabocabonisoro.+
15 O koya e mokuti* tamana se tinana, me vakamatei sara ga.+
16 “Ke dua e kauta vakaukaua e dua na tamata+ qai volitaki koya, se tobo ni tauri koya voli,+ me vakamatei sara ga.+
17 “O koya e vosavakacacataka* na tamana se tinana, me vakamatei sara ga.+
18 “Qo na ka me caka ke ra veiba na tagane qai dua vei ira e mokuta na kainona ena vatu se na ivacu* qai sega ni mate o koya, ia sa davo tu ga vakadua ena nona loga:
19 Ke rawa ni duri cake qai veilakoyaki e tautuba ni vakaititoko voli, me kua ni totogitaki o koya e veimoku. Ena sauma ga vua e mavoa na gauna e vakayalia mai na nona cakacaka me yacova ni sa bula vinaka sara.
20 “Ke dua na tamata e mokuta na nona tagane bobula se yalewa bobula ena kau, mani mate kina e ligana, me caka na veisausaumi ena vuku ni bobula.+
21 Ia ke bula tiko me dua se rua na siga, me kua ni caka na veisausaumi, ni a voli ga o koya ena nona ilavo na kena itaukei.
22 “Ke ra veimulomulo na tagane, ra qai vakamavoataka e dua na yalewa bukete, mani vakasucudole* o koya,+ ia e sega ni vakavumate* na mavoa e yaco, me qai sauma o koya e cala na ka e lavaka vua na wati yalewa, ia me sauma me vaka na nodra lewa na turaganilewa.+
23 Ia ke vakavumate na mavoa e yaco, me qai isau ni bula na bula,+
24 me isau ni mata na mata, me isau ni bati na bati, me isau ni liga na liga, me isau ni yava na yava,+
25 me isau ni kama na kama, me isau ni mavoa na mavoa, me isau ni moku na moku.
26 “Ke dua na tamata e mokuta* na matana na nona tagane bobula se na matana na nona yalewa bobula, qai vakacacana, me laiva na bobula me lako ena galala me isau ni matana.+
27 Ke vaqera na bati nona tagane bobula se nona yalewa bobula, me qai laiva na bobula me lako ena galala me isau ni batina.
28 “Ke dua na bulumakau tagane e cumuta e dua na tagane se dua na yalewa qai mate kina, me vakaviriki ena vatu na bulumakau tagane me mate,+ me kua tale ga ni laukana na lewena, ia ena galala mai na itotogi na itaukei ni bulumakau tagane.
29 Ke sa dau veicumu tiko na bulumakau tagane qai vakasalataki kina na kena itaukei, ia e sega ni qarauna o koya, qai vakamatea e dua na tagane se dua na yalewa, me vakaviriki ena vatu na bulumakau tagane, me vakamatei tale ga na kena itaukei.
30 Ke lavaki vua e dua na ivoli,* me solia o koya na ka kece e lavaki vua me ivoli ni veisereki ni nona bula.
31 Se mani cumuta e dua na gonetagane se goneyalewa, me caka vua na itaukei ni bulumakau tagane me vaka ga na lewa qo.
32 Ke cumuta e dua na tagane bobula se yalewa bobula na bulumakau tagane, ena solia o koya me kena isau e 30 na sikeli* vua na nona turaga na tamata oya, ena qai vakaviriki mate ena vatu na bulumakau tagane.
33 “Ke dua na tamata e kauta laivi na isogo ni qara, se kelia e dua na qara qai sega ni sogota, mani lutu kina e dua na bulumakau tagane se dua na asa,
34 me sauma qori o itaukei ni qara.+ Me sauma na ilavo vua na itaukei ni bulumakau, ena qai nona na manumanu sa mate tu.
35 Ke vakamavoataka e dua tale na bulumakau tagane na nona bulumakau tagane e dua, mani mate kina, me rau volitaka na bulumakau tagane bula, rau wasea na kena ilavo, rau wasea tale ga na manumanu mate.
36 Se, ke sa kilai tu ni dau veicumu voli na bulumakau tagane qori qai sega ni qarauna na kena itaukei, me solia o koya e dua na bulumakau tagane me isosomi ni bulumakau tagane oya, ena qai nona na ka mate.
iVakamacala e ra
^ Ipe., “me voli lesu.”
^ Se “vakayagataka na ligana me veivakamavoataki.”
^ Se “veimoku ena kau se iyaragi cava tale.”
^ Se “tukuna me yaco na ca vei.”
^ Se rawa ni, “dua na iyaya ni cakacaka.”
^ Se “mavoa bibi.”
^ Ipe., “basika mai tuba na luvei yalewa.”
^ Se “vakayagataka na ligana me veivakamavoataki.”
^ Se “ilavo me isau ni ka e vakacacani.”
