Lako Yani 35:1-35
35 E qai vakasoqoni ira kece na isoqosoqo taucoko ni Isireli o Mosese, qai kaya vei ira: “Qo na ka e vakarota o Jiova me caka:+
2 Me ono na siga me caka kina na cakacaka, ia na ikavitu ni siga ena ka tabu vei kemuni, e siga ni vakacecegu moni cegu sara ga kina vei Jiova.+ O koya e cakacaka kina ena vakamatei.+
3 Moni kua ni vakawaqa buka ena dua na nomuni itikotiko ena Siga ni Vakacecegu.”
4 E qai kaya o Mosese vei ira na isoqosoqo taucoko ni Isireli: “Qo na ka e vakarota o Jiova,
5 ‘Kauta mai na cau nei Jiova ena kemuni maliwa.+ O ira kece era lomasoli mai vu ni lomadra+ mera kauta mai na cau vei Jiova: na koula, na siliva, na kopa,
6 na wa karakarawa, na vutinisipi lokaloka, na isulu kulakula, na lineni matailalai, na vutinime,+
7 na kuli ni tamanisipi boro damudamu, na kulinisili, kei na kau na akasia,
8 na waiwai ni cina, na waiwai vakaisaluaki ni veilumuti kei na ka boivinaka e dau vakamai,+
9 na vatu onikisa, kei na vatu tale eso me vakadaberi ena efoti+ kei na taga ni lomasere.+
10 “‘Me lako mai o ira kece na kenadau*+ ena kemuni maliwa, qai cakava na ka kece e vakarota o Jiova,
11 oya na valeniveitavaki kei na kena valelaca kei na kena iubi, na kena iqamu kei na kena feremi, na kena kau balavu, na kena duru kei na kena veleti e sivi vakalomana,
12 na Kato+ kei na kena ivua,+ na isogo+ kei na ilatilati+ me ilati,
13 na teveli+ kei na kena ivua, na kena iyaya taucoko kei na madrai dauraici,+
14 na itutu ni cina+ me vunirarama kei na kena iyaya, na kena cina kei na waiwai me waqari,+
15 na icabocabo ni ka boivinaka+ kei na kena ivua, na waiwai ni veilumuti kei na ka boivinaka+ e dau vakamai, na ilati* me icurucuru ni valeniveitavaki,
16 na icabocabo ni isoro kama+ kei na kena lawalawa kopa, na kena ivua kei na kena iyaya taucoko, na beseni kei na kena itutu,+
17 na ilatilati ni rara,+ na kena duru kei na kena veleti e sivi vakalomana, na ilati* ni matamata ni rara,
18 na pini ni valelaca ena valeniveitavaki, na pini ni valelaca ena rara kei na kena dali,+
19 na isulu tali vakamatailalai+ ni veiqaravi ena tikina tabu, na isulu tabu nei Eroni+ na bete, kei na nodratou isulu ni veiqaravi vakabete na luvena tagane.’”
20 Era mani gole tani mai na mata i Mosese na isoqosoqo taucoko ni Isireli.
21 Era qai lako yani o ira kece e uqeti na lomadra+ kei ira kece na gu na yalodra, ra qai kauta yani na nodra cau vei Jiova me baleta na valelaca ni veitavaki, me baleta na kena veiqaravi kece, kei na isulu tabu.
22 Era lako tiko ga yani, na tagane kei na yalewa, o koya yadua e lomasoli mai vu ni lomana, e kauta yani na pini iukuuku, na sau, na mama, na iukuuku tale eso, kei na veimataqali iyaya koula kece. Era cabora kece na nodra isoro* koula vei Jiova.+
23 O ira kece e tiko na nodra wa karakarawa, na vutinisipi lokaloka, na isulu kulakula, na lineni matailalai, na vutinime, na kuli ni tamanisipi boro damudamu, kei na kulinisili, era kauta yani.
24 O ira kece era cautaka na siliva kei na kopa era kauta yani na cau i Jiova, o ira kece tale ga e tiko vei ira na kau na akasia ena yaga ena cakacaka cava ga era kauta yani.
25 Na yalewa kece era kenadau+ era mulomulo e ligadra, ra qai kauta yani na ka era muloca: na wa karakarawa, na vutinisipi lokaloka, na isulu kulakula, kei na lineni matailalai.
26 Era muloca tale ga na vutinime na yalewa kece era kenadau, e uqeti na lomadra.
27 Era qai kauta yani na iliuliu na vatu onikisa kei na vatu tale eso me biu vata ena efoti kei na taga ni lomasere,+
28 kei na waiwai vakaisaluaki kei na waiwai me waqari, kei na waiwai ni veilumuti+ kei na ka boivinaka e dau vakamai.+
29 O ira kece na tagane kei na yalewa e uqeti na lomadra era kauta yani eso na ka me baleta na cakacaka e vakarota o Jiova ena gusu i Mosese, era kauta yani na Isireli me isolisoli sega ni lavaki vei Jiova.+
30 E qai kaya vei ira na Isireli o Mosese: “Raica, o Jiova sa digitaki Pisalieli na luvei Urei, e luvei Ure mai na yavusa o Juta.+
31 E vakasinaiti koya ena yalo ni Kalou, e solia vua na vuku, na yalomatua, kei na kila ni cakacakaniliga kece ga,
32 me baleta na buli iyaya vakamaqosa, na cakacaka ena koula, siliva, kei na kopa,
33 na kena ta kei na kena vakadaberi na vatu, kei na caka vakamaqosa ni veimataqali iyaya kau.
34 E sa biuta tale ga e lomana me dau veivakavulici, o koya kei Aoliapi+ na luvei Eiisamaki mai na yavusa o Tani.
35 E vakasinaiti rau o koya ena kila*+ me rau cakava na cakacaka ni dua e kenadau ena cakacakaniliga, dua e dau culaiukuuku, dua e dau talitali ena wa karakarawa, na vutinisipi lokaloka, na isulu kulakula, kei na lineni matailalai, kei na dua e dautali isulu. O rau na tagane qo erau na cakava na veimataqali cakacaka, qai vakarautaka na veimataqali peleni.
iVakamacala e ra
^ Ipe., “lomavuku.”
^ Se “ilatilati.”
^ Se “ilatilati.”
^ Se “isoro yalovaki.”
^ Ipe., “lomavuku.”
