Lako Yani 4:1-31
4 Ia e sauma o Mosese: “Kaya mada ke ra sega ni vakabauti au ra qai sega ni rogoca na domoqu,+ nira na kaya, ‘A sega ni rairai vei iko o Jiova.’”
2 Sa qai kaya vua o Jiova: “Na cava e tiko qori e ligamu?” e sauma o koya: “Na ititoko.”
3 E kaya: “Viritaka ina qele.” E viritaka sara ina qele qai vuki me gata,+ e qai drovaka o Mosese.
4 E kaya vei Mosese o Jiova: “Dodoka yani na ligamu, taura na buina.” E dodoka yani na ligana qai taura, e vuki tale me ititoko e ligana.
5 E qai kaya na Kalou: “Qo mera vakabauta kina ni a rairai vei iko+ o Jiova na nodra Kalou na tukadra, na Kalou i Eparama, na Kalou i Aisake, kei na Kalou i Jekope.”+
6 E kaya tale vua o Jiova: “Yalovinaka, biuta na ligamu ena ilobi ni nomu isulu i cake.” E biuta sara na ligana e loma ni nona isulu. Ni biuta mai tuba, me cava tale, sa vukavuka na ligana me vaka na ucacevata!+
7 E qai kaya o koya: “Biuta lesu na ligamu ena ilobi ni nomu isulu i cake.” E biuta lesu na ligana ena loma ni nona isulu. Ni biuta mai tuba, sa vinaka tale na ligana me vaka ga na vo ni kuliniyagona!
8 E kaya: “Ke ra sega ni vakabauti iko se kauai ena imatai ni ivakatakilakila, era na qai kauaitaka na ivakatakilakila e tarava.+
9 Ia ke ra sega tiko ga ni vakabauta na rua na ivakatakilakila qo ra qai bese ni vakarorogo ina domoqu, mo takiva mai eso na wai mai na Uciwai na Naile qai sova ena vanua mamaca, ia na wai o na takiva mai na Naile ena vuki me dra ena vanua mamaca.”+
10 E kaya vei Jiova o Mosese: “Ni vosoti au Jiova, au se sega vakadua ni maqosa ena vosa, se mailiu, se mai na gauna oni vosa kina vua na nomuni dauveiqaravi, ni dau berabera na noqu vosa* qai berabera na yamequ.”+
11 E tukuna vua o Jiova: “O cei e bulia na gusu ni tamata, se o cei e vakavuna me galu e dua, me didivara, me rai vinaka, se me mataboko? Sega ni o yau, o Jiova?
12 Mo lako sara, niu na tiko vata kei iko ena gauna o vosa* kina, au na vakavulici iko ena ka mo tukuna.”+
13 Ia e kaya o koya: “Ni vosoti au Jiova, yalovinaka moni tala ga o cei oni vinakata.”
14 E qai waqa mai na cudru i Jiova vei Mosese, e kaya: “Ia vakacava ga na tuakamu o Eroni+ na Livai? Au kila ni kenadau ena vosa. Sa lako mai qo o koya me tavaki iko. Ni raici iko, ena marau na lomana.+
15 Mo vosa vua, biuta i gusuna na vosa,+ au na qai tiko kei kemudrau ni drau vosa,+ au na vakavulici kemudrau ena ka mo drau cakava.
16 Ena vosa ena vukumu o koya vei ira na tamata, ena nomu gusunivosa o koya, o na vaka na Kalou vua.*+
17 Mo taura na ititoko qo e ligamu mo cakava kina na ivakatakilakila.”+
18 E mani lesu o Mosese vei Jecoro na vugona,+ e kaya vua: “Kerekere, au via lesu vei ira na taciqu e Ijipita meu lai raica se ra bula tiko se sega.” E kaya o Jecoro vei Mosese: “Lako ena vakacegu.”
19 Oti oya e kaya o Jiova vei Mosese e Mitiani: “Lako, mo lesu i Ijipita, nira sa mate kece o ira na via vakamatei iko.”+
20 E kauti watina kei rau na luvena tagane o Mosese, vakavodoki ratou ena asa, qai lesu ina vanua o Ijipita. E taura tale tiko ga e ligana o Mosese na ititoko ni Kalou dina.
21 E kaya vei Mosese o Jiova: “Ni o lesu i Ijipita, mo cakava sara ena mata i Fero na cakacaka mana kece ena kaukaua au solia vei iko.+ Ia au na vakalaiva me kaukaua na lomana,+ me kua kina ni laivi ira na tamata mera lako.+
22 Mo kaya vei Fero, ‘Qo na ka e tukuna o Jiova: “O Isireli e luvequ tagane, na noqu ulumatua.+
23 Au tukuna vei iko, Laivi luvequ tagane me lako me rawa ni qaravi au. Ia ke o bese ni laivi koya, au na vakamatea na luvemu tagane ulumatua.”’”+
24 Ia a sotavi koya o Jiova*+ ena gaunisala e donuya na icili, e qai saga tiko me vakamatei koya.+
25 Mani taura o Sipora+ e dua na vatu gagata* qai cilivi luvena, e qai cakava me tara na yavana na kuliniyagona vakatagane, e kaya: “Ni o taganevou vei au ena vuku ni dra qo.”
26 E mani laivi koya me lako. E kaya sara ena gauna ya o Sipora, “o dua na taganevou vei au ena vuku ni dra qo,” baleta na veicilivi.
27 Oti oya e kaya vei Eroni o Jiova: “Mo lai tavaki Mosese ena vanua talasiga.”+ E gole sara yani qai tavaki koya ena ulunivanua ni Kalou dina,+ e kidavaki koya ena iregu.
28 E qai tukuna vei Eroni o Mosese na vosa kece i Jiova, o koya e talai koya yani,+ kei na ivakatakilakila kece e vakarota me cakava.+
29 Oti erau lako sara o Mosese kei Eroni rau qai kumuni ira kece na qase ni Isireli.+
30 E tukuna vei ira o Eroni na vosa kece e tukuna o Jiova vei Mosese, e qai cakava o koya na ivakatakilakila+ e matadra na tamata.
31 Era sa qai vakabauta na tamata.+ Nira rogoca ni sa kauaitaki ira mai na Isireli o Jiova+ qai raica na nodra vakalolomataki,+ era cuva ra qai davo vakatoboicu.
iVakamacala e ra
^ Ipe., “bi ni gusu.”
^ Ipe., “kei na gusumu.”
^ Se “na matataka na Kalou vua.”
^ E volai ena so tale na ivolavivigi, ‘agilosi i Jiova.’
^ Se “na isele e caka ena vatu.”
