Vola o Marika 8:1-38
8 Nira soqoni yani e dua na ilala levu ena gauna ya, e sega na ka mera kania. E mani kacivi ratou na tisaipeli qai kaya:
2 “Au sa lomani ira na ilala levu,+ ni sa tolu na siga nodra tiko vata kei au, ia era sega ni kania e dua na ka.+
3 Keu vakasukai ira ina nodra vale nira waloloi tu,* era na bale koso e gaunisala, ni levu era lako mai vakayawa.”
4 Eratou sauma na nona tisaipeli: “E vanua lala qo, me kau mai vei na madrai me rauti ira kece?”
5 E mani tarogi ratou o koya: “E vica na ibuli qori?” Eratou kaya: “E vitu.”+
6 Mani vakaroti ira na ilala levu mera dabe ena qele. E taura na vitu na ibuli, e vakavinavinakataka, tikitikica, qai tekivu veisoliyaka vei ratou nona tisaipeli, eratou wasea sara vei ira na ilala levu.+
7 E tiko tale ga vei ratou e vica na ika lalai, ni vakavinavinakataka oti, e qai tukuna vei ratou me ratou wasea yani.
8 Era kana era mamau, eratou qai taura e vitu na basikete* sa sinai tu ena ivovo ni ka sa tikici oti tu.+
9 Era tiko e kea e rauta ni 4,000 na tagane. Oti sa qai talaci ira.
10 E lai vodo sara ena dua na waqa kei ratou na nona tisaipeli me ratou soko yani ina yasayasa o Dalamanuca.+
11 Qo na vanua era vakavuveiba kina vei Jisu na Farisi, era vakaroti koya tale ga me vakaraitaka vei ira e dua na ivakatakilakila mai lomalagi mera vakatovolei koya kina.+
12 E rarawa vakalevu na lomana, mani kaya: “Na cava e vaqara kina na itabatamata qo e dua na ivakatakilakila?+ Au tukuna vakadodonu, ena sega sara ni vakaraitaki ina itabatamata qo e dua na ivakatakilakila.”+
13 Mani biuti ira tu, vodo tale i waqa me gole i tai.
14 Ia eratou guilecava me ratou kau madrai, e dua wale ga na ibuli+ e tu e waqa, sega ni dua tale na kakana.
15 Mani vakaroti ratou ni kaya: “Me rai tiko na matamudou, dou qarauna na nodra leveni na Farisi kei na nodra leveni na ito i Eroti.”+
16 Eratou veivosakitaka vakalevu na nodratou sega ni kau madrai.
17 Ni rogoci ratou o Jisu, e kaya vei ratou: “Na cava dou veivosakitaka tiko kina nomudou sega ni kau madrai mai? Dou sega tiko ga ni raica se kila? Se buawa tiko ga na lomamudou e dredre kina mo dou kila?
18 ‘E tu na matamudou, dou sega ni raica, e tu na daligamudou, dou sega ni rogoca?’ Dou sa guilecava tale
19 niu a tikitikica na lima na madrai+ vei ira na 5,000 na tagane? E sinai e vica na basikete ena kena vo?” Eratou kaya vua: “E Tinikarua.”+
20 “Niu tikitikica na vitu na ibuli vei ira na 4,000 na tagane, e vica na basikete* dou vakasinaita kina na ivovo ni ka e tikici tu?” Eratou kaya vua: “E vitu.”+
21 Mani kaya vei ratou: “Dou se sega tiko ga ni kila?”
22 Ni ratou yaco i Peciseita, era kauta vua na lewenivanua e dua na tagane mataboko, ra qai vakamasuti Jisu me tarai koya.+
23 E tubera na liga i mataboko ina ibili. Ni kasivita oti na matana,+ e tabaki koya e ligana qai taroga: “O bau raica e dua na ka?”
24 E rai cake na tagane qai kaya: “Au raici ira na tamata, ia era vaka na irairai ni vunikau era taubale voli.”
25 E tabaka tale na matana e ligana o Jisu, sa qai rai vinaka. Sa qai vinaka tale na matana, e raica vinaka na ka kece.
26 E vakatalai koya i vale o Jisu qai kaya: “Kua ni curu i lomanikoro.”
27 Sa qai biubiu o Jisu kei ratou na nona tisaipeli me ratou lako ina veikoro e Sisaria Filipai. Ni ratou lako tiko, e mani tarogi ratou nona tisaipeli: “Na cava era tukuna eso me baleti au?”+
28 Eratou kaya: “O Joni na Dauveipapitaisotaki,+ eso era kaya ni o Ilaija,+ eso tale era kaya ni dua vei ira na parofita.”
29 E qai tarogi ratou: “Vakacava o kemudou, cava dou nanuma?” E sauma vua o Pita: “O kemuni na Karisito.”+
30 E qai vakaroti ratou matua me ratou kua ni tukuna e dua na ka me baleti koya.+
31 E tekivu me vakavulica vei ratou ni levu na ka rarawa ena sotava na Luve ni tamata, era na cati koya tale ga na qase, na iliuliu ni bete, kei ira na vunivola, ena vakamatei,+ qai vakaturi ni oti e tolu na siga.+
32 E doudou ni cavuta na vosa oya. Ia e kauti koya vakatikitiki o Pita qai vunauca.+
33 E vuki, raici ratou nona tisaipeli qai vunauci Pita, e kaya: “Lako tani i dakuqu Setani! E sega ni tiko vei iko na vakasama ni Kalou, na vakasama ga ni tamata.”+
34 E kacivi ira na ilala levu kei ratou nona tisaipeli qai kaya vei ira: “Ke dua e via muri au, me kua tale ni muria na lomana, me colata ga na nona kaunirarawa* qai muri au tiko ga.+
35 Ni o koya e via maroroya na nona bula ena vakayalia, ia o koya e vakayalia na nona bula ena vukuqu kei na itukutuku vinaka, ena maroroya.+
36 Ena yaga vakacava vua e dua ke rawati vuravura taucoko, qai vakayalia nona bula?+
37 Na cava sara mada ena solia na tamata me isau ni nona bula?+
38 O koya ena maduataki au kei na noqu vosa ena itabatamata dauveibutakoci* qai valavala ca qo, ena maduataki koya tale ga na Luve ni tamata+ ni lako mai ena lagilagi i Tamana kei ira na agilosi savasava.”+
iVakamacala e ra
^ Se “nira lolo.”
^ Se “basikete ni ivaqa.”
^ Se “basikete ni ivaqa.”
^ Raica na iVakamacala ni Vosa.
^ Se “tawayalodina.”
