Vei Ira mai Roma 2:1-29
2 O koya gona taciqu se o cei ga o iko,+ o na sega ni galala ke o veivakalewai. Ni o vakalewa e dua, o sa vakalewai iko tale tiko ga, ni ka ga o vakalewa o cakava tiko.+
2 Eda kila ni lewa ena tauca na Kalou vei ira na cakava tiko na ka kece qo, e salavata kei na dina.
3 Ia na wekaqu, o nanuma mo na drovaka na veilewai ni Kalou ena nomu vakalewai ira na cakava na ka kece qo, ia o cakava tale tiko ga o iko?
4 Se o beca na yalololoma levu+ ni Kalou, nona yalorawarawa,+ kei na nona dauvosota,+ ni o sega ni kila ni yalovinaka tiko vei iko ena nona vinakata mo veivutuni?+
5 Ia ena nomu yalokaukaua kei na yalo e sega ni veivutuni, o binia tiko kina na cudru ni Kalou vei iko ena siga ni nona cudru kei na siga me na tauca kina nona lewadodonu.+
6 Ena qai sauma o koya na tamata yadua me vaka na nona ivalavala.+
7 Na bula tawamudu vei ira era qara na lagilagi, na vakarokoroko, kei na yago e sega ni vuca rawa,+ ena nodra vakayacora tiko ga na ka vinaka ena yalovosota.
8 Ia vei ira na dau veileti, era beca na ka dina ra qai talairawarawa ina ka e sega ni dodonu, era na totogitaki, era na cudruvi.+
9 Era na rarawa ra yaluma tale ga o ira kece era cakava na ka ca, e liu vei ira na Jiu qai tarava vei ira na kai Kirisi.
10 Ia na lagilagi, na vakarokoroko, kei na vakacegu, vei ira kece era cakava na ka vinaka, e liu vei ira na Jiu+ qai tarava vei ira na kai Kirisi.+
11 Ni sega ni dau veivakaduiduitaki na Kalou.+
12 Ni o ira kece era valavala ca ni sega na lawa, era na mate ga, e dina ni sega na lawa.+ Ia o ira kece era valavala ca nira vauci tiko ena lawa era na lewai ena lawa.+
13 Nira sega ni yalododonu ena mata ni Kalou o ira na rogoca wale ga na lawa, o ira ga era muria na lawa era na okati mera yalododonu.+
14 Ena gauna era cakava kina vakataki ira na lewe ni veimatanitu na ka e tukuni ena lawa, era sega ni kila na lawa+ ia o ira ga na lawa.
15 E kilai ena ka era cakava ni sa volai tu e lomadra na lawa, e vakadinadina vei ira na nodra lewaeloma, na veika tale ga era vakananuma e beitaki ira se vakadonui ira.
16 Ena qai yaco qo ena siga e lewa kina na Kalou ena liga i Jisu Karisito, na veika e cakava vakavuni na tamata+ se dau vakananuma. Na itukutuku qo e tiki ni itukutuku vinaka au dau vunautaka.
17 Ia kaya mada ke o Jiu,+ o vakararavi ina lawa, o sakitaka nomu veiwekani kei na Kalou,
18 o kila na lomana o qai vakadonuya na veika e uasivi ni o vakavulici* ena Lawa,+
19 o qai nanuma ni o dauveituberi vei ira na mataboko, o rarama vei ira na tiko ena butobuto,
20 o dauveivakavulici vei ira na sesewa, o dauveituberi vei ira na gone, o kila vinaka tale ga na yavu ni ivakavuvuli dina e volai ena Lawa—
21 ia o iko o vakavulica tiko e dua tale, o sa bau vakavulici iko mada?+ O iko, o vunautaka tiko “Kua ni butako,”+ o butako tiko?
22 O iko o kaya tiko “Kua ni veibutakoci,”+ o veibutakoci tiko? O iko o dau sevaka na matakau, o butako tale tiko mai na vale ni qaravi matakau?
23 O iko o sakitaka na lawa, o sa beca na Kalou ena nomu sega ni muria na Lawa?
24 Me vaka e volai, “sa mai vosabeci na yaca ni Kalou vei ira na lewe ni veimatanitu ena nomuni ivalavala.”+
25 Ena yaga wale ga na cili+ ke o muria na lawa,+ ia ke o beca na lawa sa na tawayaga vei iko na nomu cili.
26 O koya gona, ke muria vakadodonu na Lawa e dua e sega ni cili,+ sa na okati me cili na nona sega ni cili, se vakaevei?+
27 Ke muria na Lawa e dua e sega ni cili, ena lewai iko o koya ni o beca na lawa, dina ni tu vei iko na kena ivola kei na veicilivi.
28 Na nona okati me Jiu e dua e sega ni vakatau ena ka e sau+ se na cilivi ni yagona.+
29 E kilai ga na Jiu dina ena ka e tu e lomana,+ na lomana tale ga e cilivi+ vakayalo, e sega ni cilivi ena vuku wale ga ni ka e volai.+ O koya qo e vakacaucautaki koya sara ga na Kalou, e sega ni vakacaucautaki koya na tamata.+
iVakamacala e ra
^ Se “veivakavulici e tukuni ga ena gusu.”
