Sakaraia 14:1-21
14 “Raica! Sa voleka na siga, na siga i Jiova, ni na votai vei iko* na nomu itokinivalu.
2 Au na soqoni ira na veimatanitu kece mera valuti Jerusalemi, ena kabai na koro, ena yanaraki na veivale, era na kucuvi na yalewa. Era na kau vakavesu e veimama na lewenikoro, ia o ira na kena vo era na sega ni kau tani mai na koro.
3 “Ena lako yani o Jiova me valuti ira na veimatanitu qori+ me vaka ga na nona vala ena siga ni ivalu.+
4 Ena siga oya ena tu na yavana ena Ulunivanua ni Veiolive+ donui Jerusalemi ena tokalau, ena kavida rua na Ulunivanua ni Veiolive mai na tokalau* ina ra* me dua na buca levu, ena toso ina vualiku e dua na veimama ni ulunivanua, e dua tale na veimama ina ceva.
5 Oni na dro ina buca ni noqu veiulunivanua, ni na yacovi Aseli na buca ni ulunivanua. Oni na dro me vaka ga oni dro ena vuku ni uneune ena gauna nei Tui Usaia e Juta.+ Ena lako mai o Jiova na noqu Kalou kei ira kece na yalosavasava era tiko vata kei koya.+
6 “Ena siga oya ena sega na rarama talei,+ ena cevata na ka kece.
7 Ena kilai na dua na siga qori me siga i Jiova.+ Ena sega ni siga, ena sega ni bogi, ni sa yakavi ena qai rarama.
8 Ena siga oya ena vure mai Jerusalemi+ na wai ni bula,+ e veimama ena drodro yani ina wasa ena tokalau,*+ e veimama ena drodro yani ina wasa ena ra.*+ Ena yaco qori ena vulaikatakata kei na vulaililiwa.
9 O Jiova ena Tui ni vuravura taucoko.+ Ena siga oya o Jiova ena dua ga,+ na yacana ena dua ga.+
10 “Na vanua taucoko ena vaka na buca na Arapa,+ mai Kipa+ i Rimoni+ ena ceva kei Jerusalemi, ena tubu o koya me tawa na nona vanua+ mai na Matamata i Penijamini+ me yaco ina vanua e tiko kina na iMatai ni Matamata, me yaco sara ina Matamata ni Ucunikoro, mai na Valececere i Ananeli+ me yacova nona ikeliniwaini na tui.
11 Era na tawana na lewenivanua, ena sega tale ni cudruvi me vakarusai,+ ena tikovakacegu o Jerusalemi.+
12 “Qo na kuita ena kuitataki ira kece kina na lewe ni veivanua era valuti Jerusalemi+ o Jiova: Ena midra na lewedra nira tucake tu e yavadra, ena midra na yalokanimatadra ena kena itokatoka, ena midra tale ga na yamedra ena loma ni gusudra.
13 “Ena siga oya ena vakasesei ira kece o Jiova, era na dui taura na liga i nodra itokani, ena laveta na ligana vua na liga i nona itokani.*+
14 Ena vala tale ga o Juta e Jerusalemi, ia ena kumuni na nodra iyau na veimatanitu kece era tiko voleka, na koula, na siliva kei na isulu, e levu sara.+
15 “Ena va tale ga qori na kedra kuita na ose, na meule, na kameli, na asa, kei na manumanu kece era tiko ena keba qori.
16 “Era lako cake ena veiyabaki+ o ira era vo tiko ena veimatanitu kece era valuti Jerusalemi, mera cuva sobu* vua na Tui o Jiova ni lewe vuqa,*+ mera soqova na Soqo ni Valetabanikau.*+
17 Ia ke sega ni dua na lewe ni vuvale e vuravura me lako cake i Jerusalemi me cuva sobu vua na Tui o Jiova ni lewe vuqa, ena sega ni tau vei ira na uca.+
18 Ke sega ni lako cake na vuvale i Ijipita qai sega ni curu kina, ena sega ni tau vei ira na uca. Ia ena kuitataki ira o Jiova ena kuita vata ga e kuitataki ira kina na veimatanitu era sega ni lako cake mera soqova na Soqo ni Valetabanikau.
19 Qori na itotogi ni cala nei Ijipita kei na nodra cala na matanitu kece era sega ni lako cake mera soqova na Soqo ni Valetabanikau.
20 “Ena siga oya ena volai ena lali ni ose na vosa ‘E nei Jiova na savasava!’+ Na kuro ni vakasaqa*+ ena vale i Jiova ena vaka na bilo+ ena mata ni icabocabonisoro.
21 Na kuro ni vakasaqa* kece e Jerusalemi kei Juta ena savasava me nei Jiova ni lewe vuqa, era na lako yani o ira kece era vakacaboisoro mera vakayagataka eso mera vakasaqa kina. Ena siga oya, ena sega tale ni tiko e dua na kai Kenani* ena vale i Jiova ni lewe vuqa.”+
iVakamacala e ra
^ Oya na koro e tukuni ena tikina e 2.
^ Se “na icabecabe ni siga.”
^ Ipe., “na wasawasa.”
^ Oya na Wasa na Mediterranean.
^ Oya na Waitui Mate.
^ Se “veivala.”
^ Se “Vale Sega ni Tudei.”
^ Qo na mataivalu vakalomalagi.
^ Se “sokalou.”
^ Se “kuro ni vakasaqa gusu levu.”
^ Se “kuro ni vakasaqa gusu levu.”
^ Se rawa ni, “na dauveivoli.”
