Sere i Solomoni 5:1-16
5 “Au sa curu ena noqu basenikau,+I ganequ, na watiqu.
Au betia na noqu mura* kei na noqu kau boivinaka.+
Au kania na kequ qanioni kei na denioni,Au gunuva na mequ waini kei na mequ sucu.”+
“Moni kana, na noqu itokani!
Moni gunu moni mateni ena vosa ni veidomoni!”*+
2 “Au sa moce, ia e yadra tiko na lomaqu.+
E rogo mai na nona tukituki na noqu daulomani!”
‘Dola mada ganequ, noqu daulomani,Noqu ruve, noqu ka savasava!
E suasua na uluqu ena tegu,Na tobe ni drauniuluqu ena tegu ni bogi.’+
3 Au sa luvata na noqu isulu balavu.
Meu dara tale?
Au sa savata oti na yavaqu.
Meu vakadukara tale?
4 Sa vakasuka na ligana na noqu daulomani mai na qara ni katuba,Dua na ka na noqu marautaki koya.
5 Au tucake meu dolava na katuba vua na noqu daulomani,E tiri na mura e ligaqu,Kei na waiwai mura ena iqaqaloniligaqu,Ena itautauri ni loka.
6 Au dolava na katuba vua na noqu daulomani,Ia sa vakanadaku na noqu daulomani, sa lako.
Au yalolailai ni sa biubiu.*
Au vaqarai koya, ia au sega ni raici koya.+
Au kacivi koya, ia e sega ni rogo mai.
7 Era raici au na yadra era veilakoyaki tiko ena koro.
Era mokuti au, era vakamavoataki au.
Era kauta na noqu iovi* o ira na yadrava tiko na bai.
8 Moni bubuluitaka vei au na goneyalewa ni Jerusalemi:
Ke oni raica na noqu daulomani,Moni tukuna vua niu sa mate ena dodomo.”
9 “Na cava sa rui talei kina na nomu daulomani vei ira na vo ni daulomani,O iko o matavinaka sara vei ira na yalewa?
Na cava sa rui talei kina na nomu daulomani vei ira na vo ni daulomani,Mo kaya vei keimami me keimami bubului va qo?”
10 “E matakamica na noqu daulomani, e damudamu,E duatani sara vei ira na lewe tininaudolu.
11 Na uluna e koula, na koula savasava.
Na tobe ni drauniuluna e vaka na drauniniu e veisuayaki,*E loaloa me vaka na reveni.
12 Na matana e vaka na ruve ena bati ni uciwaiEra sili tiko ena sucu,Era dabe tiko ena bati ni tobu.*
13 Na baluna e vaka e dua na loga ni kau boivinaka,+Na ibinibini kau boivinaka.
Na tebenigusuna na viavia, e tiri kina na waiwai mura.+
14 E koula na iqaqaloniligana, e kirisilaite na kena itaukuku.
Na ketena e tabua lumisa e ubi ena sefaia.
15 Na yavana na duru vatu mapolo e sodo ena qara koula savasava.
Na kena irairai e vakataki Lepanoni, e talei sara me vaka na sitari.+
16 E kamica dina na gusuna,*E talei na ka kece me baleti koya.+
Qo na noqu itau, na noqu daulomani, kemuni na goneyalewa ni Jerusalemi.”
iVakamacala e ra
^ Drega boivinaka e dau isaluaki ni waiwai ena so na gauna.
^ Se “veilomani.”
^ Se rawa ni, “Au veilecayaki ni vosa mai.”
^ Se “iubi.”
^ Se rawa ni, “isoso vuaniniuniu.”
^ Se rawa ni “bati ni waivure.”
^ Ipe., “gadro.”
