Vei Taito 3:1-15
3 Tukuna tiko ga vei ira mera dau vakamalumalumu, mera talairawarawa ina matanitu kei ira na veiliutaki,+ mera dau tu vakarau ena cakacaka vinaka kece ga,
2 mera kua ni vosavakacacataka e dua, mera kua ni dau veiba, mera yalorawarawa ga,+ mera qai yalomalua vei ira kece na tamata.+
3 Ni o keda tale ga eda a lecaika tu, eda talaidredre, eda a vakasesei tu, eda a bobula tu ena veimataqali gagadre kei na lasa, e dau laurai vei keda na yaloca kei na vuvu, eda a sevaki, eda a veicati tale ga.
4 E qai vakatakilai vei keda na yalovinaka kei na loloma ni Kalou, na noda iVakabula,+
5 (e sega ni vu qo ena noda cakava na ka e vinaka,+ na nona yalololoma ga)+ e vakabulai keda ena nona vakasavasavataki* keda meda vakabulai kina,+ e vakavoui keda tale ga ena yalo tabu.+
6 E sovaraka vakayauyau vei keda na yalona tabu qo ni vakayagataki Jisu Karisito na noda iVakabula,+
7 meda okati kina meda yalododonu ena vuku ni nona loloma soli wale,+ da qai rawa ni itaukei,+ me vaka na noda inuinui ni bula tawamudu.+
8 E nuitaki na veivosa qo, au vinakata tale ga mo dau vakadreta na ka kece qo, me rawa kina vei ira na vakabauta na Kalou mera vakasamataka tiko ga na cakacaka vinaka. Na ka kece qo e vinaka qai yaga vei keda.
9 Kua ni vakaogai iko ena taro vakalialia, na tuva kawa, na veileti, na veibataki ni Lawa, nira sega ni yaga qai vakaoti gauna.+
10 Ia mo yawaki koya+ e vakatetea tiko na ivakavuvuli e veisaqasaqa kei na ka dina,+ ni o sa vakasalataki koya oti vakarua,+
11 ena nomu kila ni sa gole tani mai na sala, e valavala ca tiko, e tukuni koya tale ga na nona ivalavala.
12 Niu talai Aritema yani se o Tikiko,+ saga sara mo lako mai vei au e Nikopoli, niu sa nanuma meu na tiko e kea ena vulaililiwa.
13 Mo vakarautaka sara vakavinaka na ka kece vei Sina, o koya e kila vinaka na Lawa, kei Apolosa me baleta na nodrau ilakolako, me kua ni dua na ka me rau leqa kina.+
14 Mera vakavulici tale ga na wekada mera cakava na ka vinaka, mera qarava kina vakatotolo na nodra bula ni yaco eso na ka dredre,+ mera vuavuaivinaka tiko ga kina.+
15 Era loloma tu yani o ira kece era tiko vata kei au. Au loloma vei ira kece eda vakabauta vata.
Me tiko mada ga kei kemuni kece na loloma soli wale ni Kalou.
iVakamacala e ra
^ Kir., “sili.”
