Vakatakila e Vola o Joni 10:1-11
10 Au qai raica e dua tale na agilosi kaukaua ni lako sobu mai lomalagi, e vakaisulu* ena o, e toka e uluna na drodrolagi, na matana e vaka na matanisiga,+ na yavana* e vaka na duru e caudre,
2 e taura tiko e dua na ivolavivigi lailai e dola tu. Na yavana imatau e tu e wasawasa, na yavana imawi e tu ena dela ni vanua,
3 e qai kaci ena domolevu me vaka na tagi ni laione.+ Ena gauna e kaci kina, eratou dui vosa mai na vitu na kurukuru.+
4 Au vakarau vola sara tu ga na ka eratou tukuna na vitu na kurukuru, au qai rogoca e dua na domo mai lomalagi+ ni kaya: “Dregata na ka eratou tukuna na vitu na kurukuru, kua ni vola.”
5 Na agilosi au raica ni duri tu e wasawasa kei na dela ni vanua e laveta na ligana imatau i lomalagi,
6 qai bubului vei koya e bula tawamudu,+ o koya e bulia na lomalagi kei na ka kece e tu kina, na vuravura kei na ka kece e tu kina, na wasawasa kei na ka kece e tu kina+ ni kaya: “Ena sega sara ni bera.
7 Ia ena siga e vakarau uvuca kina na nona biukila+ na ikavitu ni agilosi,+ qori na siga e vakacavari kina na ka vuni tabu+ ni Kalou e vakatakilai me itukutuku vinaka vei ira na parofita era nona dauveiqaravi.”+
8 E qai vosa tale mai vei au na domo au a rogoca mai lomalagi,+ e kaya: “Lako, lai taura na ivolavivigi e dola tu ena liga ni agilosi e duri tu ena wasawasa kei na dela ni vanua.”+
9 Au mani lako vua na agilosi, au tukuna vua me solia vei au na ivolavivigi lailai. E kaya vei au: “Taura, kania,+ ena wiwi kina na ketemu, ia ena kamica e gusumu me vaka na denioni.”
10 Au taura sara mai na liga ni agilosi na ivolavivigi lailai, au kania,+ e kamica e gusuqu me vaka na denioni,+ ia niu kania oti, e wiwi sara ga na ketequ.
11 E qai tukuni vei au: “Mo parofisai tale me baleti ira na tamata, na veimatanitu, na duivosavosa, kei na levu na tui.”
